Mostra rispeto par i altri

1. Parché che tuti i ghe piase esser tratadi con rispeto? (Proverbi 22:1)

TI TE piase che i altri i te trate con rispeto e che i mostre che te ghè valor? Sicuro de si! A tuti noantri ne piase esser tratadi cossita parché se sentimo felici. Par quela che la Bìblia la dise che “el rispeto dei altri l’è meio che argento e oro”. — Ledi Proverbi 22:1.a

2-3. (a) Parché che dele volte ne fà fadiga rispetar i altri? (b) Cossa che ndaremo imparar in questo stùdio?

² Dele volte, no l’è fàcile mostrar rispeto ai altri. Parché? Parché noantri vedemo i sbali che le persone le fà e anca parché vivemo nte un mondo che tanti no i mostra rispeto. Ma, Geovà el vol che ‘ghe demo onor a tuti’. — 1 Pie. 2:17.

³ In questo stùdio, ndaremo imparar cossa che vol dir rispetar i altri. Ndaremo anca veder come che podemo mostrar rispeto (1) nela fameia, (2) nela congregassion, e (3) par le persone che no le serve mia a Geovà. Ma prima, ndaremo veder come mostrar rispeto anca quando l’è fadiga.

COSSA CHE VOL DIR RISPETAR I ALTRI?

4. Cossa vol dir “rispetar” una persona?

⁴ Cossa vol dir “rispetar” una persona? Vol dir che pensemo che la mèrita la nostra atension par via dele so qualità, de qualcossa che la ga fato o dela autorità che la ga. Ma par rispetar i altri anca ne ocore capir cossa vol dir “darghe onor”. Noantri ghe demo onor a una persona par via dela maniera che la tratemo. Come cossita? Ghemo de tratarla de una maniera che la se sinta valorisada e amada. Quando noantri ghe demo onor a qualchedun ghemo de farlo de cuor. (Mat. 15:8) Alora, rispeto l’è quel che sentimo par una persona e onor l’è la maniera che la tratemo.

5. Cossa che ne giuta a voler rispetar ai altri?

⁵ Geovà el vol che tratemo a tuti con rispeto. Par esémpio, lu el ga dito che ghemo de rispetar i governanti che i ga autorità. (Rom. 13:1, 7) Alora, qualchedun pol pensar: ‘Mi vao rispetar quei che i me rispeta.’ Ma sarà che l’è giusto pensar cossita? Nò! Noantri savemo che ghemo de rispetar a tuti, anca quei che no i ne rispeta. Femo cossita parché rispetemo a Geovà e volemo contentarlo. — Gio. 4:14; 1 Pie. 3:15.

6. Sarà che semo boni de tratar qualchedun con rispeto anca se lu no ne trata cossita? Spiega. (Varda anca la ilustrassion.)

⁶ Fursi te te domandi: ‘Ma, sarà che una persona la ze bona de tratar i altri con rispeto anca quando no i la trata cossita?’ Si. Varda un per de esempi. El rè Saul el ga tratà mal el so fiol Gionatan davanti dei altri. (1 Sam. 20:30-34) Stesso cossita, Gionatan el rispetea el so pare e el ga seità ndar con lu ala guera. (Éso. 20:12; 2 Sam. 1:23) Eli, che l’era el sasserdote pi importante, el ga dito che Ana la era ciuca. (1 Sam. 1:12-14) Tuti in Israel i savea che i fioi de Eli i era drio far robe sbaliade e che lu no l’era drio far gnente. Ancora cossita, Ana lo ga tratà con rispeto. (1 Sam. 1:15-18; 2:22-24) E, le persone de Atena le ga dito che Paolo el parlea robe sensa valor. (Ati 17:18) Ma Paolo el ga seità a parlar con lori con rispeto. (Ati 17:22) Alora, capimo che se amemo a Geovà e volemo contentarlo ndaremo tratar i altri con rispeto anca quando l’è fadiga. Adesso, ndemo veder a chi che ghemo de tratar con rispeto e parché.

MOSTRA RISPETO NELA FAMEIA

7. Parché che dele volte l’è fadiga par noantri mostrar rispeto nela fameia?

⁷ Parché che l’è fadiga? Come noantri stemo tanto tempo insieme ala nostra fameia, l’è fàcile veder le so qualità e anca i so difeti. Savemo che ghen’è tante robe che pol intrigar che ghen sìpia pace nela fameia. Par esémpio, pol esser che semo strachi de tender de qualchedun che l’è malà o che l’è massa ansioso. O pol esser che qualchedun nela nostra casa el parle o el fae robe che ne assa disgustadi o che ne trate sensa rispeto. Podemo dir che la fameia la ze come un corpo. Quando ghemo una malatia el corpo no’l laora pi tanto ben. E anca la fameia no la va mia ben quando no ghen’è rispeto. Ma come una malatia la pol esser curada anca la nostra fameia la pol imparar a mostrar rispeto.

8. Parché che ghemo de mostrar rispeto a quei dela nostra fameia? (1 Timòteo 5:4, 8)

⁸ Parché mostrar rispeto? (Ledi 1 Timòteo 5:4,b 8.c) Paolo el ga dito che mostremo rispeto ala nostra fameia quando ghe demo quel che la ghe ocore. Ma noantri no ghemo de far cossita sol parché ne toca. Paolo el ga dito che ghemo de rispetar la nostra fameia parché l’è stà Geovà che la ga creada. (Efe. 3:14, 15) Alora, quando rispetemo quei dela nostra fameia, semo drio dar onor a Geovà. Par quela, volemo tratar a tuti dela nostra fameia con rispeto par mostrar che adoremo a Geovà. — 1 Tim. 5:4.

9. Come che el omo e la dona i pol mostrar rispeto nel matrimònio? (Varda anca la ilustrassion.)

⁹ Come mostrar rispeto? El omo el ghe dà onor ala so dona quando i ze lori soli e anca quando i ze insieme con altri. (Pro. 31:28; 1 Pie. 3:7) Lu mai el ndarà darghe bote o parlar robe che la farà sentirse disgustada o sensa valor. Un fradel de nome Ariel,d dela Argentina, el ga dito: “Par causa de un problema de salute, dele volte la me dona la me dise robe che me assa disgustà. Quando la fà cossita, proo ricordarme che quel che la ga dito no l’è quel che la ze drio sentir. Un testo che me giuta tanto l’è 1 Corinti 13:5 che mostra che ghemo de tratar i altri con rispeto invesse de restar inrabiadi.” (Pro. 19:11) La dona la ghe dà onor al so omo se la parla ben de lu quando la ze insieme con altri. (Efe. 5:33) Ela mai la tol in giro el so omo, ghe dise su o ghe parla cole brute. Ela la sa che far cossita saria come la rusine che la pol finir fora col so matrimònio. (Pro. 14:1) Una sorela dela Itàlia la ga dito: “El me omo el ga tanta ansietà e dele volte lu l’è massa preocupà con robe che no ghe ocore. Prima, mi parlea e fea moti cola fàcia che mostrea che mi ghe manchea de rispeto. Ma go visto che quando mi son insieme con persone che mostra rispeto ai altri me fà pi voia de rispetar me omo.”

10. Come che i gióveni i pol mostrar rispeto ai so genitori?

¹⁰ I gióveni i ga de obedir ai so genitori e sempre parlarghe con rispeto. (Éso. 21:17; Efe. 6:1-3) Quando i nostri genitori i vien veci ghemo de far el nostro meio par tenderli e seitar a mostrarghe rispeto. Varda quel che ga sucedesto con una sorela de nome Maria. So pare no l’è Testimònia de Geovà e sempre la ga tratada mal. Alora, l’è stà fadiga par ela tenderlo quando lu l’è restà malà. Maria la ga dito: “Mi preghea che Geovà el me giutesse a gaver rispeto par me pare e anca par mostrarghelo. Mi pensea cossita: ‘Se Geovà el dise che ghemo de dar onor ai nostri genitori, alora l’è sicuro che lu ndarà giutarne a farlo.’ Dopo un tempo, son stata bona de tratar me pare con rispeto anca se lu no’l gavesse cambià.” Se ghe demo onor ale persone dela nostra fameia anca quando no l’è mia fàcile mostremo rispeto a Geovà, quel che el ga fato la fameia.

MOSTRA RISPETO NELA CONGREGASSION

11. Parché che dele volte pol esser fadiga tratar i nostri fradei con rispeto?

¹¹ Parché che l’è fadiga? I nostri fradei e sorele i proa far quel che la Bìblia la dise. Ma pol esser fadiga tratarli con rispeto quando ‘ghemo motivi par parlar contra lori’. (Col. 3:13) Par esémpio, pol suceder de qualche fradel o sorela pensar mal de noantri, parlar cole brute o assarne disgustadi. Ma cossa che pol giutarne?

12. De acordo con 2 Piero 2:9-12, parché che ghemo de rispetar i nostri fradei?

¹² Parché mostrar rispeto? (Ledi 2 Piero 2:9-12.e) El apòstolo Piero el ga dito che arquanti dela congregassion i era drio mancar de rispeto coi “gloriosi”, o sia, coi ansiani. Anca i àngeli fedeli i ga visto cossa l’era drio suceder. Alora, cossa lori i ga fato? Par rispeto a Geovà, i àngeli no i ga parlà gnente contra quei che i era drio dir robe rugne dei ansiani. Proa pensar: Àngeli perfeti no i ga mia parlà mal de quele persone orgoliose! Invesse, lori i ga assà Geovà giulgarle. (Rom. 14:10-12; varda anca Giuda 9.) Cossa che imparemo? Se no ghemo de mancar de rispeto con quei che i va contra Geovà, manco ancora coi nostri fradei. Pitosto, ghemo de ‘esser premosi de dar onor un al altro’. (Rom. 12:10) Se femo cossita, mostremo rispeto par Geovà.

13-14. Come che podemo mostrar rispeto nela congregassion? Parla de esempi. (Varda anca la ilustrassion.)

¹³ Come mostrar rispeto? I ansiani i ga de sempre insegnar con amor. (Filém. 8, 9) Quando lori i ga de dar un consìlio a qualchedun, lori i ga de farlo sempre con bontà e mai quando i ze cativi. Le sorele le giuta che ghen sìpia rispeto nela congregassion quando no le parla mal dei altri gnanca no le conta busie sora i fradei. (Tito 2:3-5) E tuti noantri podemo mostrar rispeto par i ansiani quando ndemo drio ale so orientassion. Anca podemo mostrar che ghe demo valor al so laoro de tender dele riunion, dela predicassion e de quei che i ga fato “un sbàlio”. — Gàl. 6:1; 1 Tim. 5:17.

¹⁴ Una sorela de nome Rachel la ga fato fadiga rispetar un ansiano che ghe ga dato un consìlio. Ela la ga dito: “Mi pensea che el fradel no’l me gavea dato el consìlio con amor e che no’l me badea mia. Par quela, no go fato quel che el me gavea dito e parlea mal de lu.” Cossa che ga giutà questa sorela? Ela la ga dito: “Quando go ledesto 1 Tessalonissensi 5:12, 13, go visto che era drio mancarghe de rispeto con quel fradel e me go sentio tanto mal. Mi go pregà a Geovà e go fato peschise nele nostre publicassion. Dopo un tempo, mi go capio che el problema no l’era el consìlio del ansiano, ma el me orgòlio. Adesso sò che me toca esser ùmile par rispetar i altri. Me toca ancora sforsarme par rispetar i altri, ma sento che Geovà l’è contento con mi.”

MOSTRA RISPETO PAR QUEI CHE NO I SERVE A GEOVÀ

15. Parché che dele volte l’è fadiga mostrar rispeto a quei che no i serve a Geovà?

¹⁵ Parché che l’è fadiga? Pol esser che el nostro paron de laoro o el nostro maestro mai l’è contento con quel che femo. O fursi quei che i stùdia o i laora con noantri i ne manche de rispeto. Nela predicassion, catemo tante persone che no le bada mia quel che la Bìblia la dise o che no le vol scoltar le bone notìssie par causa de quel che i ga imparà sora religion coi so genitori. (Efe. 4:18). Alora, col tempo, anca noantri podemo scominsiar a mancarghe de rispeto e a tratar i altri sensa bontà.

16. Parché che ghemo de mostrar rispeto a quei che no i serve a Geovà? (1 Piero 2:12; 3:15)

¹⁶ Parché mostrar rispeto? Parché Geovà l’è atento a come che tratemo quei che no i lo serve mia. El apòstolo Piero el ga dito che arquanti i pol scominsiar a lodar a Dio dopo de veder che i servi de Dio i fà le robe polito. Par quela che lu el ga anca dito che quando ndemo predicar ghemo de parlar “con brandura e tanto rispeto”. (Ledi 1 Piero 2:12;f 3:15.g) No vol mia dir se semo nte un tribunal o se semo drio predicar a al nostro visin, ghemo de ricordarse che Geovà l’è sempre atento a quel che femo. Par quela, volemo sempre tratar con tanto rispeto anca a quei che no i serve a Geovà!

17. Come che podemo mostrar rispeto a quei che no i serve a Geovà?

¹⁷ Come mostrar rispeto? Nela predicassion, no volemo far i altri sentirse manco importante de noantri parché i sa poco sora la Bìblia. Noantri volemo dar tanto valor a queste persone cossita come Geovà e vederle come pi importante de noantri. (Ageo 2:7; Fil. 2:3) Alora, se qualchedun ne dise su, no ndemo mia parlarghe cole brute o dirghe qualcossa par mostrar che semo furbi o che lo fae restar cativo. (1 Pie. 2:23) Se vedemo che ghemo parlà una roba che no se gavaria mia de dir, ne ocore domandarghe scusa suito. E, come che podemo mostrar rispeto nel laoro? Ghemo de esser bravi laoradori e sempre proar veder le qualità de quei che i laora con noantri e dei nostri paroni. (Tito 2:9, 10) L’è vera che tante volte noantri proemo far tuto polito nel nostro laoro e le persone gnanca no le bada. Ma, podemo esser sicuri che Geovà el vede quel che femo e l’è contento con noantri. — Col. 3:22, 23.

18. Parché che l’è bon par noantri rispetar i altri?

¹⁸ In questo stùdio, ghemo visto che l’è tanto importante mostrar rispeto ai altri. Ghemo imparà che, quando ghe demo onor ale persone dela nostra fameia e ai nostri fradei e sorele, ghe demo onor a Geovà. Ghemo anca visto che, quando tratemo con rispeto a quei che no i serve a Geovà, podemo farli gaver voia de vegner servirlo. E, se le persone no ne trata mia con rispeto, volemo seitar a rispetarle. Parché? Parché Geovà el ga prometesto: ‘Mi vao darghe onor a quei che i me dà onor.’ — 1 Sam. 2:30.