Ti te ghè tanto valor par Geovà!

1-2. Cossa che pol giutarne a esser sicuri che Geovà el ne vol tanto ben?

GEOVÀ el ghe dà tanto valor ai so servi fedeli. Ma arquanti i pensa che no i ga valor. Pol esser che lori i se sente cossita parché i ze stati tanto maltratadi par i altri. Se anca ti te te senti cossita, cossa che pol giutarte a capir che te ghè tanto valor par Geovà?

² La Bìblia la mostra come Geovà el vol che le persone le sìpie tratade. Par esémpio, Gesù el tratea le persone con bontà e rispeto. Cossita, lu el ga mostrà che lu e so Pare i ghe vol tanto ben ale persone che le se sente sensa valor. (Gio. 5:19; Ebr. 1:3) In questo stùdio ndaremo veder: (1) come che Gesù el ga giutà le persone che le se sentia sensa valor, e (2) come che noantri podemo esser sicuri che Geovà el ne vol tanto ben. — Ageo 2:7.

COME CHE GESÙ EL GA GIUTÀ LE PERSONE A SENTIR CHE LE GAVEA VALOR?

3. Come che Gesù el ga tratà le persone dela Galilea?

³ Quando Gesù l’era nel so terso giorno de predicassion nela Galilea, persone de tuti i posti le ze ndate fin lu par esser curade. Gesù el ga visto che quele persone le era ‘maltratade e butade de una banda al’altra come piégore sensa pastor’. (Mat. 9:36; varda le note nela Bìblia de Stùdio in portoghese) I lìderi religiosi de quele persone i pensea che lore no le gavea mia valor. Lori fin i disea che lore le era persone maledide. (Gio. 7:47-49, nota dela Bìblia de Stùdio in portoghese) Invesse Gesù, el se tolea el tempo par insegnarghe e curarle dele so malatie. (Mat. 9:35) Lu el ga fin giutà i so apòstoli a predicar e ghe ga dato autorità par curar malatie. Cossita, lori i podea giutar de pi persone. — Mat. 10:5-8.

4. Cossa che Geovà e Gesù i sente par quei che i ze maltratadi?

⁴ Gesù el ga tratà con bontà e rispeto le persone che le era maltratade. Cossita, lu el ga mostrà che lu e so Pare i ghe dà tanto valor a quei che i sofre. Par quela, se te servi a Geovà ma te pensi che te ghè mia valor, ricòrdate come Gesù el ga tratà le persone che le volea imparar la verità. Alora, ti te sarè sicuro che Geovà el te vol tanto ben.

5. Cossa che savemo sora la dona che Gesù el ga catà nela Galilea?

⁵ Gesù sempre el insegnea ale persone, ma anca el giutea e ghe dea atension a cada una che vegnea fin lu. Par esémpio, quando lu l’era nela Galilea, lu el ga cognossesto una dona che fea 12 ani che la gavea un flusso de sangue. (Mar. 5:25) La Lege la disea che persone cossita le era impure e no le podea star insieme dei altri. Alora, questa dona no la podea ndar ale festività e gnanca nela sinagoga. (Lev. 15:19, 25) Sicuro che questa dona la sofria tanto par causa dela so malatia e la se sentia sensa valor. — Mar. 5:26.

6. Cossa che la dona che la gavea un flusso de sangue la ga fato par esser curada?

⁶ Questa dona che la era drio sofrir tanto la volea che Gesù la curesse. Ma ela no la ze ndata domandarghe a Gesù parché la gavea vergogna dela so situassion. Anca pol esser che la gavea paura che Gesù ghe disesse che no la podea gnanca esser in meso quele persone. Ela la era sicura che se la tochesse nela roba de Gesù, ela la restaria meio. (Mar. 5:27, 28) La dona la ga bio fede e l’è stà pròpio quel che ga sucedesto. Quando Gesù el ga domandà chi che lo gavea tocà, ela la ga dito che la era stata ela. Cossa che Gesù el ga fato?

7. De acordo con Marco 5:34, come Gesù el ga tratà quela dona che la sofria tanto?

⁷ Gesù el ga tratà la dona con bontà e rispeto. Lu el ga visto che ela la “tremea de paura”. (Mar. 5:33) Come lu el savea quel che la era drio sentir, lu el ga parlà de una maniera che la ga assada tranquila. Lu la ga ciamada de “fiola” par mostrarghe rispeto, bontà e amor. (Ledi Marco 5:34.a) Nela Bìblia, questa la ze la ùnica volta che Gesù el ga ciamà una dona de “fiola”. Sicuro che la dona la ze restada tanto contenta par causa dela maniera che Gesù la ga tratada. Lu la ga fato sentirse sensa colpa. Alora, Gesù no’l volea sol curar la malatia dela dona, ma anca farla sentirse una cara fiola del so Pare del cielo.

8. Che dificoltà una sorela del Brasil la ga infrontà?

⁸ Ancoi, tanti servi de Geovà i pensa che nissun ghe vol ben par causa de bruti problemi de salute che i ga. Maria,b che la ze una pioniera regolar nel Brasil, la ze nassesta sensa le gambe e la man sanca. Ela la ga dito: “Nela scola, i me coleghi i me tratea tanto mal par causa del me problema. Tanti fin i me ciamea de bruti nomi e, dele volte, anca me fameia la me tratea mal.”

9. Cossa che ga giutà Maria?

⁹ Cossa che ga giutà Maria? Quando la ga scominsià a servir a Geovà, i fradei e sorele la ga consolada e la ga giutada a veder che Geovà la ama. Ela la ga dito: “No saria gnanca bona contar tuti i fradei che i me ga giutà. Mi ringràssio a Geovà par la bela fameia de fradei che el me ga dato.” Alora, i fradei e sorele i ga giutà Maria a capir che la ga tanto valor par Dio.

10. Che problema Maria Madalena la ga bio, e come la se sentia? (Varda anca la ilustrassion.)

¹⁰ Adesso, vedemo cossa che ga sucedesto nel passà con Maria Madalena, una dona che la gavea sete demoni! (Luc. 8:2) Par causa de questi demoni, fursi, la fea robe brute, e par quela, le persone no le volea mia starghe darente. Pol esser che Maria Madalena la gavesse paura che nissun ghe volesse ben e che mai i ndaria giutarla. Ma Gesù la ga giutada. Dopo che lu el ga parà via i demoni che la gavea, ela la ga scominsià a ndarghe drio a lu. Ma che altre robe Gesù el ga fato par assar Maria Madalena sicura che Geovà el ghe volea ben?

11. Come che Gesù el ga giutà Maria Madalena a veder che la gavea tanto valor par Dio? (Varda anca la ilustrassion.)

¹¹ Gesù el ga convidà Maria Madalena par ndar insieme con lu e i so dissìpoli nei so viai de predicassion.c Cossita, ela la ga podesto imparar tanto con Gesù. Dopo che lu l’è stà ressussità, una dele prime persone che el se ga fato veder l’è stà a Maria Madalena. E anca l’è stà a ela che el ga dito de avisar i so apòstoli che lu l’era stà ressussità. Cossita, Gesù el ga assà Maria Madalena sicura che Geovà el ghe dea tanto valor! — Gio. 20:11-18.

12. Cossa che ga fato Lidia pensar che nissun ghe volea ben?

¹² Cossita come Maria Madalena, tanti ancoi i pensa che nissun ghe vol ben. Lidia, una sorela dela Spagna la ga dito che, vanti che ela la nassesse, la so mare la volea far un aborto. Quando Lidia la era picinina, la so mama no la ghe tendea e la ghe disea robe brute. Lidia la ga dito: “Come la me mare mai la ga mostrà che me amea, mi volea tanto che i altri i me volesse ben. Ma come la me mama la me disea che mi ero una persona rugna, mi gavea paura che nissun saria me amigo.”

13. Cossa che ga giutà Lidia a capir che Geovà la ghe vol tanto ben?

¹³ Pregar a Geovà, studiar la Bìblia e el aiuto dei fradei ga giutà Lidia a capir che la ga tanto valor par Geovà. Ela la ga dito: “Tante volte, me omo el dise che el me ama e el me ricorda dele bele qualità che go. Anca i me cari amighi i fà compagno.” Te cognossi qualchedun che ga bisogno de aiuto par capir che Geovà el ghe vol tanto ben?

RICÒRDATE CHE GEOVÀ EL TE DÀ TANTO VALOR

14. De acordo con 1 Samuel 16:7, come che Geovà el vede le persone? (Varda anca el quadro “Parché che Geovà el dà tanto valor ai so servi?”.)

¹⁴ Ricòrdate che Geovà no’l vede le robe come che le persone le vede. (Ledi 1 Samuel 16:7.d) Tanti i pensa che una persona la ga valor se la ze bela, se la ga soldi o se la ga tanto stùdio. Ma Geovà no’l pensa mia cossita. (Isa. 55:8, 9) Alora, invesse de pensar compagno le persone del mondo, pensa compagno a Geovà. Cossa che pol giutarte? Te pol leder sora servi de Geovà del passà che i pensea che no i gavea mia valor. Par esémpio, te pol leder sora Elia, Noemi e Ana. Te pol anca scriver do le volte te ghè sentio el amor de Geovà. Te pol anca studiar le nostre publicassion che le parla sora quel che te pol far se te te senti cossita.e

15. Parché che Geovà el ga dito che Daniel l’era “un omo de grando valor”? (Daniel 9:23)

¹⁵ Ricòrdate che te ghè tanto valor par Geovà parché te sì fedele. Quando el profeta Daniel romai el gavea 90 ani, lu el se ga sentio tanto straco e desanimà. (Dan. 9:20, 21) Come che Geovà lo ga incoraià? Lu el ga mandà un àngelo par ricordar a Daniel che lu l’era “un omo de grando valor” e che lu el gavea scoltà le so orassion. (Ledi Daniel 9:23.f) Parché che Geovà el ghe dea tanto valor a Daniel? Parché Daniel el gavea bele qualità, el amea far quel che l’era giusto e l’era fedele. (Eze. 14:14) Geovà el ga volesto che el esémpio de Daniel fusse scrito nela so Parola par darne consolo. (Rom. 15:4) Alora, capimo che, se amemo quel che l’è giusto e semo leai a Geovà, lu el scolta le nostre orassion e el ne vol tanto ben. — Mic. 6:8, nota; Ebr. 6:10.

16. Cossa che pol giutarte a veder Geovà come un caro Pare?

¹⁶ Ricòrdate che Geovà l’è un Pare che el te ama. Lu el vol giutarte e nò catar fora i sbali che te ghè. (Sal. 130:3; Mat. 7:11; Luc. 12:6, 7) Pensar cossita ga giutà tanti fradei e sorele che i se sentia sensa valor. Varda el esémpio de una sorela dela Spagna de nome Michelle. Ela la se sentia sensa valor parché, par tanti ani, el so omo el ghe disea su. Michelle la ga dito: “Sempre che me sento desanimada, mi penso che Geovà l’è drio portarme in brasso e darme protession e amor.” (Sal. 28:9) Lauren, una sorela dela Àfrica del Sud, la ga dito: “Se Geovà el me ga fato vegner a lu, el me ga tendesto tuti questi ani e fin el me ga doperà par insegnar altri, l’è sicuro che mi go tanto valor par lu.” — Ose. 11:4.

17. Cossa che pol giutarte a esser sicuro che Geovà l’è contento con ti? (Salmo 5:12) (Varda anca la ilustrassion.)

¹⁷ Sìpia sicuro che Geovà l’è contento con ti. (Ledi Salmo 5:12.g) Davi el ga dito che gaver la aprovassion de Geovà l’è come un “grando scudo” che protege quei che i ze giusti. Come cossita? Quando semo sicuri che Geovà l’è contento con noantri, semo boni de darghene fora col sentimento che no ghemo mia valor. Come che te pol esser sicuro che Geovà l’è contento con ti? Come ghemo visto, par meso dela Bìblia, Geovà el ne dise che el ne vol tanto ben. Lu anca el dopera i ansiani e i nostri amighi par ricordarne de questo. Ma cossa che te ghè de far quando i altri i dise che te ghè valor?

18. Parché che te ghè de acetar quando i altri i te loda?

¹⁸ Quando qualchedun che te cognosse e te ama el vien lodarte, te ocore acetar. Ricòrdate che Geovà el dopera queste persone par giutarte a capir che lu l’è contento con ti. Michelle, che ghemo parlà prima, la ga dito: “Son drio imparar a acetar quando i altri i me loda. No l’è mia fàcile, ma mi sò che Geovà el vol che mi fao cossita.” I ansiani i ze drio giutar Michelle a capir che Geovà el ghe vol tanto ben. Ancoi, ela la serve come pioniera e la laora par Betel.

19. Parché che te pol esser sicuro che Dio el te dà tanto valor?

¹⁹ Gesù el ne ga ricordà che ghemo tanto valor par el nostro Pare Geovà. (Luc. 12:24) Alora, podemo esser sicuri che Geovà el ne vol tanto ben. Mai ghemo de desmentegarse de questo! E noantri anca ghemo de seitar a giutar i altri a capir che lori i ga tanto valor par Dio!