Domande dei letori

Che “pensamento” Geovà suito el ndarà meter nel cuor dei governi?

Varda cossa che Apocalisse 17:16, 17 dise sora el scomìnsio dela granda tribolassion: “I diese corni che te ghè visto e la bèstia cativa i odiarà la prostituta, i la assarà rovinada e nuda, i magnarà la so carne e i la brusarà del tuto nel fogo. Parché Dio el ga metesto nel cuor de lori la voia de realisar el so pensamento, si, par realisar el ùnico pensamento de lori de dar el so pròpio regno ala bèstia cativa.” Prima, diseino che el “pensamento” che Geovà el ndaria meter nel cuor dei governi l’era finir fora cole religion false.

Ma, ghemo bio de cambiar quel che capiano. El “pensamento” che Geovà el ndarà meter nel cuor dei governi l’è de ‘dar el regno de lori ala bèstia cativa’. Ndemo capir un pochetin meio.

De chi che questa professia la parla? “La prostituta” la ze “Babilònia, la Granda”, o sia, tute le religion false del mondo. La “bèstia cativa de color scarlate” la ze la Organisassion dele Nassion Unide (ONU). Ela la ze stata creada in 1919 e la gavea nome Liga dele Nassion. (Apo. 17:3-5) “I diese corni” i ze tuti i governi che i giuta la bèstia cativa.

Cossa che la prostituta la fà cola bèstia cativa de color scarlate? La prostituta la ze “sentada” sora la bèstia cativa. Questo vol dir che la ghe giuta e la proa comandarla.

Cossa che ndarà suceder cola prostituta? La bèstia cativa e i diese corni i “odiarà la prostituta”. Lori i ndarà ciavar tuto quel che la ga e i ndarà mostrar che la ze rugna. Lori anca i ndarà finirla fora, cossita come Geovà el vol. (Apo. 17:1; 18:8) Alora, no ghen sarà pi le religion false. Ma, prima che questo suceda, Geovà el ndarà doperar i governi par far una roba che no ga mai sucedesto.

Cossa che i governi dele nassion i ndarà far? Geovà el ndarà meter nel cuor dei governanti el so pensamento, che l’è de dar el poder e la autorità che i ga ala “bèstia cativa”, la ONU. (Apo. 17:13) Alora, proa pensar in questo. Sarà che va esser una dessision dei governi de dar el so poder ala bèstia cativa? Nò! La professia la dise che Geovà ndarà meter nela so mente de far cossita. (Pro. 21:1; varda anca Isaia 44:28.) Sarà che questo ndarà suceder pin pian? Nò! Sarà de colpo. Dopo, la bèstia la ndarà doperar el so poder e autorità par far quel che Geovà el vol. Ela la ndarà finir fora con tute le religion false.

Alora, cossa che ndarà suceder nel futuro? No ghemo mia de spetar che le notìssie le parle che i governi pin pian i ze drio giutar de pi la ONU. Invesse, Geovà el ndarà far che i governi i dae tuto el so poder ala ONU de colpo. Quando questo sucede, podemo spetar che presto scominsiarà la granda tribolassion. Par quela, “ghemo de restar desmissiadi e atenti” parché presto tante robe ndarà cambiar de colpo! — 1 Tes. 5:6.