Come che el libro de Giò pol giutarte quando te sì drio sofrir?

1-2. Parché che l’è importante leder el libro de Giò?

FÀ TEMPO che te ghè ledesto el libro de Giò? Questo libro l’è stà scrito intorno de 3.500 ani indrio. Ma fin ancoi ghen’è de quei che i dise che l’è un dei meio libri che l’è stà scrito. Tanti i ghe piase de questo libro parché ghen’è parole bele, fàcile de capir e che le ne insegna tanto. Moisè che lo ga scrito, ma l’è stà Geovà che ghe ga dito cossa el gavaria de scriver. — 2 Tim. 3:16.

² El libro de Giò l’è una parte tanto importante dela Bìblia. Parché? Parché el ne giuta a capir che tute le persone e anca i àngeli i ga de scòlier se i ndarà adorar a Geovà par amor a lu e al so nome. Anca el ne insegna tante bele qualità de Geovà, come el so amor, la so sabedoria, la so giustìssia e el so grando poder. Par esémpio, el libro de Giò el parla 31 volte de Geovà come el “Tuto Poderoso”. Questo l’è de pi de che tuti i altri libri dela Bìblia insieme. El libro de Giò anca el risponde a tante domande importante, come par esémpio: ‘Parché che Dio el ne assa sofrir?’

3. Cossa che podemo imparar col libro de Giò?

³ Podemo dir che leder el libro de Giò l’è compagno a ndar su una montagna. Parché? Parché quando te vè su a una montagna te sì bon de veder tuto quel che ghen’è intorno. Dela medèsima maniera, leder el libro de Giò pol giutarne a capir meio come che Geovà vede el nostro sofrimento. In questo stùdio, ndaremo veder come che fursi questo libro el ga giutà arquanti israeliti e come che el pol giutarne ancoi. Dopo, ndaremo veder come che podemo doperar questo libro par giutar i altri.

GEOVÀ EL GA ASSÀ GIÒ SOFRIR

4. Che difarensa ghen’era intrà Giò e i israeliti che i era de star nel Egito?

⁴ Intanto che i israeliti i era schiavi nel Egito, Giò l’era de star in Uz. Fursi, questa cità la era al leste dela Tera Prometesta e al nort dela Aràbia. In quela època, i israeliti i gavea scominsià a adorar falsi dèi nel Egito. Invesse, Giò sempre l’è restà fedele a Geovà. (Gios. 24:14; Eze. 20:8) Par quela che Geovà el ga dito: “No ghen’è nissuni compagno de lu nela tera.”a (Giò 1:8) No ghen’era nissun che fusse tanto rispetà e che fusse pi sior che Giò in tuto el Oriente. (Giò 1:3) Sicuro che Sàtana l’è restà pròpio cativo de veder che quel omo sior e rispetà l’era fedele a Geovà!

5. Parché che Geovà el ga assà che Giò sofrisse? (Giò 1:20-22; 2:9, 10)

⁵ Sàtana el gavea dito che Giò no’l seitaria adorar a Geovà se el gavesse dificoltà. (Giò 1:7-11; 2:2-5) Geovà lo amea tanto, ma el ga assà che Sàtana mostresse se quel che lu el gavea dito l’era verità o nò. (Giò 1:12-19; 2:6-8) Alora, cossa che ga sucedesto? Nte un colpo, Giò el ga perso tute le so bèstie, i so diese fioi i ze morti e lu el ga bio una bruta malatia in tuto el so corpo. Ma ancora cossita, lu el ga seità fedele a Geovà. (Ledi Giò 1:20-22;b 2:9, 10.c) Dopo tuto questo, cossa ga sucedesto con Giò? Geovà lo ga curà, ghe ga dato capital, el ga fato che tute le persone lo rispetesse e el ghe ga dato altri diese fioi. E Giò el ga vivesto ancora 140 ani. Cossita lu l’è stà bon de veder i so fioi, i so neti, i so bisneti e i so tataraneti. (Giò 42:10-13, 16) Sicuro che el esémpio de Giò pol giutarne quando infrontemo dificoltà. Ma cossa che i servi de Geovà del passà fursi i ga imparà con Giò e cossa che noantri podemo imparar ancoi?

6. Come che la stòria de Giò fursi la ga giutà i israeliti? (Varda anca la ilustrassion.)

⁶ Come che el esémpio de Giò fursi el ga giutà i israeliti? I israeliti i ga bio tante dificoltà quando i era de star nel Egito. Vedemo par esémpio quel che ga sucedesto con Giosuè e Calebe. Lori i ze stati schiavi par tanti ani e i ga bio de restar nel deserto par 40 ani parché altri israeliti i ga desobedio a Geovà. Pol esser che la stòria de Giò la ga giutà tanto i israeliti. Lori fursi i ze stati boni de capir parché Geovà el assa che sofrimo e che l’è Sàtana che el ga la colpa del nostro sofrimento. Pol esser che lori i gàpia anca capio che Geovà el ama quei che i ze fedeli a lu e che sempre el ndarà benedirli.

7-8. Come che el libro de Giò pol giutarne quando semo drio sofrir? Parla de un esémpio.

⁷ Come quel che ga sucedesto con Giò pol giutarne? Tanti ancoi i ga perso la so fede in Dio parché i ga visto tante robe brute suceder con persone bone. Varda par esémpio quel che ga sucedesto con Hazeld, dela Ruanda. Quando la era gióvena ela la credea in Dio, ma la ga cambià quando tante brute robe ghe ga sucedesto. I so genitori i se ga divorsià e la so mare la se ga maridà con un omo che tratea Hazel tanto mal. Dopo de un tempo, un omo la ga violentada. In quela època la ndea nte una ciesa, ma no la ga bio consolo. Alora, ela la ga pregà: “Dio, mi go pregà a ti e go proà far quel che l’è giusto, ma te me ghè fato sofrir tanto. De qua avanti vao far sol quel che mi vui mi e no vao pi adorarte.” Noantri restemo tanto disgustadi de veder che anca ancoi ghen’è tante persone come Hazel. Lore le pensa che l’è Dio che el ga la colpa del so sofrimento.

⁸ El libro de Giò el mostra che Dio no’l ga la colpa del nostro sofrimento, invesse l’è Sàtana che ne fà sofrir. Noantri anca imparemo che dele volte le persone le sofre anca se no le ga fato gnente de sbalià. La Bìblia la dise che “a tuti pol suceder qualcossa rugna o che no i speta mia”. (Ecl. 9:11; Giò 4:1, 8) In questo libro, imparemo che se seitemo fedeli a Geovà anca con dificoltà, giutemo a mostrar che Sàtana l’è un busier. (Giò 2:3; Pro. 27:11) Noantri ghe demo tanto valor a quel che ghemo imparà nel libro de Giò. Queste verità le ne giuta a capir parché che anca le persone bone le sofre. Questo ga sucedesto con Hazel che ghemo pena parlà. Dopo che la ga capio che Dio no’l gavea la colpa del so sofrimento la so vita la ga cambià. Ela la ga dito: “Go pregà a Dio nantra volta e go parlà dei me sentimenti. Quando mi gavea dito che no ndaria pi adorarlo, no l’era pròpio questo che mi sentia. Mi go dito quel lì parché no cognossea a Geovà. Ma adesso lo cognosso, sò che lu el me ama e son tanto contenta.” Anca noantri restemo contenti de saver che no l’è Geovà che ne fà sofrir! Adesso, ndemo veder come che el esémpio de Giò el pol giutarne quando ghemo dificoltà.

COME CHE EL ESÉMPIO DE GIÒ EL POL GIUTARNE?

9. Cossa che Giò el ga fato intanto che l’era sentà sora le sendre? (Tiago 5:11)

⁹ Proa pensar come la era la situassion de Giò. Lu l’era sentà sora le sendre, el so corpo l’era pien de bruschi e el se ga ciapà tanto fiaco. In quela bruta situassion lu el ga catà un toco de vaso spacà par gratarse e quel lì ghe fea tanto mal. Ma, ancora che el fusse in quela bruta situassion, Giò el ga seità fedele a Geovà e el ga perseverà. (Ledi Tiago 5:11.e) Cossa che lo ga giutà?

10. Come che savemo che Giò el vedea Geovà come un amigo? Spiega.

¹⁰ Giò el ga dito a Geovà tuto quel che l’era drio sentir. (Giò 10:1, 2; 16:20) Par esémpio, nel capìtolo 3 vedemo che lu l’era tanto disgustà cole brute robe che ghe gavea sucedesto e che el pensea che l’era stà Geovà che el ghe gavea fato tute quele robe. Dopo, i so tre amighi i ga seità dirghe che Dio l’era drio castigarlo par causa dei so sbali. Alora, Giò el ga dito che lu l’era fedele e par meso dele so parole el ga dato de capir che lu l’era pi giusto che Dio. (Giò 10:1-3; 32:1, 2; 35:1, 2) Ma dopo, lu el se ga nicorto che el ga “parlà sensa pensar” quando el ga rispondesto ai so amighi. (Giò 6:3, 26) Nel capìtolo 31, vedemo che Giò el volea che Geovà ghe rispondesse e ghe disesse che lu no’l meritea esser castigà. (Giò 31:35) Ma lu no’l gavea de pensar che ghe tochea a Geovà risponder parché che lu l’era drio sofrir.

11. Cossa che Geovà el ga fato dopo de quel che Giò el ghe ga dito?

¹¹ Ancoi capimo che Giò el ga parlà con Geovà de quela maniera parché el gavea una forte amicìssia con lu e el se fidea che el ndaria giulgarlo dela maniera giusta. Cossa che Geovà el ga fato? Lu el ga fato suceder un forte vento e el ga rispondesto a Giò. Geovà no’l ga dito parché Giò l’era drio sofrir, ma gnanca lo ga castigà par quel che el gavea parlà. Invesse, lu el ghe ga insegnà, cossita come un pare el fà col so fiol. Questo ga giutà Giò a nicorderse che el savea poco o gnente e lu el se ga ciamà gramo de quel che el gavea parlà. (Giò 31:6; 40:4, 5; 42:1-6) Come quel che ga sucedesto con Giò fursi ga giutà tante persone nel passà e pol giutarne ancoi?

12. Come che el esémpio de Giò fursi el ga giutà i israeliti?

¹² Come che el esémpio de Giò fursi el ga giutà i israeliti? Pensa nel esémpio de Moisè. Intanto che el tendea dei israeliti, lu el ga infrontà tante dificoltà e l’è restà desanimà parché lori lo gavea disgustà e i gavea desobedio a Geovà. Ma, Moisè sempre el ga pregà a Geovà par domandar el so aiuto. Invesse, i israeliti sempre i sbrontolea contra Geovà quando i gavea qualche dificoltà. (Éso. 16:6-8; Nùm. 11:10-14; 14:1-4, 11; 16:41, 49; 17:5) El esémpio de Giò fursi el ga giutà Moisè quando lu el ga parlà sensa pensar e el ga ricevesto un forte consìlio de Geovà. (Sal. 106:32, 33) Quela volta, tuti i israeliti i era in Cades e fea 40 ani che i era in meso al deserto. Moisè l’è restà cativo e no’l ga dato a Geovà el onor che el meritea. Par quela, Geovà no’l ga assà che lu el ndesse rento ala Tera Prometesta. (Deu. 32:50-52) Sicuro che no l’è stà mia fàcile par Moisè, ma lu l’è stà ùmile e el ga acetà la dessision de Geovà. Pol esser che la stòria de Giò la ga giutà anca i israeliti che i ga vivesto dopo de Moisè. Fursi lori i ga imparà a parlar a Geovà sora i so sentimenti, a no seitar a catar fora scuse par le robe sbaliade che i fea e a acetar con umiltà quando Geovà li dissiplinesse. Sicuro che quel che ga sucedesto con Giò fursi ga giutà tanto i israeliti.

13. Come che la stòria de Giò pol giutarne a perseverar? (Ebrei 10:36)

¹³ Come quel che ga sucedesto con Giò pol giutarne? Ancoi noantri ghemo dificoltà e ne ocore sforsarse par seitar fedeli a Geovà. (Ledi Ebrei 10:36.f) Par esémpio, fursi ghemo una bruta malatia, depression, ansietà, problemi nela fameia o qualchedun che amemo l’è morto. Pol esser anca che qualchedun ne dise qualcossa che ne assa ancora pi desanimadi. (Pro. 12:18) Ma el libro de Giò ne insegna che podemo parlar a Geovà tuto quel che sentimo e che podemo esser sicuri che lu el ndarà scoltarne. (1 Gio. 5:14) Anca se parlemo robe “sensa pensar”, Geovà mai ndarà castigarne par quel che disemo a lu, cossita come no’l ga fato con Giò. Invesse, lu el ndarà darne la forsa e la sabedoria che ne ocore par perseverar. (2 Cró. 16:9; Tia. 1:5) Nantra roba che Geovà ndarà far l’è darne consili se ne ocore, cossita come el ga fato con Giò. Lu el pol darne orientassion par meso dela Bìblia, dele publicassion, dei ansiani o de un amigo. (Ebr. 12:5-7) Nel passà, Geovà el ga benedio Giò parché lu l’è stà ùmile e el ga acetà i consili de Geovà. Dela medèsima maniera, anca noantri gavaremo tante benedission se semo ùmili e acetemo la orientassion e la dissiplina de Geovà. (2 Cor. 13:11) Queste le ze arquante bele robe che podemo imparar nel libro de Giò! Ma come che podemo doperar questo libro par giutar i altri?

DOPERA EL LIBRO DE GIÒ PAR GIUTAR I ALTRI

14. Come che podemo spiegar parché che ghen’è sofrimento ancoi?

¹⁴ Qualchedun te ga belche domandà parché che le persone bone le sofre? Cossa che te ghè dito? Fursi te ghè spiegà che nel giardin del Èden, Sàtana el ga imbroià Adon e Eva e lori tre i ze ndati contra Geovà. (Gén. 3:1-6) Pol esser che te ghè anca dito che noantri sofrimo e morimo par via del pecato de Adon e Eva. Dopo, te ghè dito che Geovà l’è drio portar passiensa par mostrar a tuti che Sàtana l’è un busier e par insegnar le bone notìssie ale persone. (Rom. 5:12; Apo. 21:3, 4) Questa la ze una bela maniera de spiegar parché ghen’è el sofrimento ancoi e la ga belche giutà a tanti.

15. Come che podemo doperar el libro de Giò par spiegar parché ghen’è tanto sofrimento ancoi? (Varda anca la ilustrassion.)

¹⁵ Nantra maniera de spiegar parché che ghen’è tanto sofrimento ancoi l’è doperar el libro de Giò. Come che te pol farlo? Prima, te pol lodar la persona parché la vol saver sora una roba che la ze tanto importante. Dopo, te pol dirghe che nel passà ghen’era un omo bon, de nome Giò, che el volea saver parché lu l’era drio sofrir tanto. Lu el ga fin pensà che Dio l’era drio farlo sofrir. (Giò 7:17-21) Pol esser che la persona la restarà maraveiada de saver che fà tanti ani che le persone le vol capir parché ghen’è tanto sofrimento. Alora, te pol dirghe che el libro de Giò ne insegna che l’è Sàtana che ne fà sofrir e nò Dio. Sàtana el ga dito che le persone sol le ndaria adorar a Geovà parché le volaria ricever quel che lu el ghe daria indrio e che nissun seitaria a adorarlo se infrontesse dificoltà. Te pol anca spiegar che Geovà el se fida che noantri seitaremo fedeli e che se femo cossita ndaremo mostrar che Sàtana l’è un busier. Parla anca che dopo tuto quel che ga sucedesto con Giò, Dio lo ga benedio tanto parché el ga seità leal. Sicuro che podemo consolar tuti quei che i ze drio tribolar quando ghe insegnemo che no l’è Dio che ne fà sofrir.

16. Parla de un esémpio che mostra come el libro de Giò pol giutar quei che i ze drio sofrir.

¹⁶ Varda come el libro de Giò ga giutà un omo. Nel ano de 2021, una sorela la era drio predicar par telèfono e la prima persona che la ga parlà nte un giorno l’è stà un omo de nome Mario. Ela la ghe ga ledesto Geremia 29:11, 12 e la ghe ga dito che Dio el scolta le nostre orassion e ne dà una speransa par el futuro. Ela la ga domandà cossa che Mario el pensea de quel testo e lu el ghe ga dito che in quela ora lu l’era drio scriver una carta par dir ala so fameia che el ndaria coparse. Lu anca el ga dito: “Mi credo in Dio, ma pròpio questa matina go pensà se lu el me gavea abandonà.” La seconda volta che i ga discoresto, la sorela la ghe ga spiegà sora Giò e quel che lu el ga sofrio. Mario el ga dessidio leder tuto el libro de Giò e la sorela ghe ga mandà un link dela Bìblia nel jw.org. Cossa ga sucedesto? Mario el ga acetà un stùdio dela Bìblia e el ga volesto imparar de pi sora el Dio che lo ama tanto e che no lo ga abandonà.

17. Parché che te dè tanto valor al libro de Giò? (Giò 34:12)

¹⁷ La Bìblia la pol cambiar la nostra vita e anca consolar quei che i ze drio sofrir. (Ebr. 4:12) Semo contenti che Geovà el ga scrito la stòria de Giò nela Bìblia! (Giò 19:23, 24) Questo libro ne assa sicuri che Geovà “no’l fà gnente de rugno”. (Ledi Giò 34:12.g) Questo libro anca el ne insegna parché che ghen’è sofrimento ancoi, come che podemo dàrghene fora cole dificoltà e come che podemo consolar quei che i ze drio sofrir. Nel pròssimo stùdio, ndaremo veder come che el libro de Giò pol giutarne quando ghemo de dar un consìlio.