El libro de Giò ne insegna a dar boni consili

1-2. Che dificoltà i tre amighi de Giò e Eliù i ga infrontà?

QUANDO Giò el ga perso tute le so robe, le persone le ga savesto quel che el ga sucedesto con lu. Par quela, tre amighi soi de nome Elifaz, Bildade e Zofar i ze ndati fin Uz par consolarlo. Ma quando i ze rivadi là, i ze restadi spaventadi con quel che i ga visto.

² Proa imaginar come che la era la situassion. Giò el ga perso tuto quel che el gavea. Lu el ga perso le so piégore, le so vache e i so cameli. La casa ndove i era i so fioi e le so fiole la ze stata rovinada e lori e i so servi i ze stati morti. Giò anca el gavea una bruta malatia che ghe fea tanto mal. Quando i tre òmini i ze rivadi i ga visto che Giò l’era sentà sora le sendre. Cossa che lori i ga fato? Elifaz, Bildade e Zofar i ga visto che Giò l’era drio sofrir. Alora, i se ga sentadi do dela so banda par sete giorni e no i ghe ga dito gnente. (Giò 2:12, 13) Dopo un tempo, l’è rivà un omo gióveno de nome Eliù e el se ga sentà do insieme. Alora, Giò el ga tacà a maledir el giorno che lu l’è nassesto e el ga dito che ‘el volea morir’. (Giò 3:1-3, 11) Sicuro che Giò el ghe ocorea de tanto aiuto. Questi òmini i gavea la oportunità de incoraiarlo e mostrar che i era veri amighi. Vedemo cossa che lori i ga fato.

3. Cossa che ndaremo imparar in questo stùdio?

³ Geovà el ga dito par Moisè scriver do quel che quei tre òmini e Eliù i ga dito e i ga fato. Ghemo de ricordarse che fursi tante parole che Elifaz el ga doperà l’è stà un demònio che el ghe ga dito. Ma, Eliù el ga parla robe che Geovà el volea. (Giò 4:12-16; 33:24, 25) Par quela, nel libro de Giò, imparemo come dar boni consili e cossa no far quando ndemo dar un consìlio. Alora, questo libro pol giutarne tanto quando ghemo de dir qualcossa par giutar un amigo. Cossa che ndaremo imparar in questo stùdio? Prima, el bruto esémpio dei tre amighi de Giò. Dopo, ndaremo veder come che la stòria de Giò fursi la ga giutà i israeliti e cossa che noantri podemo imparar ancoi.

COME CHE ZE STATI I CONSILI DEI TRE AMIGHI DE GIÒ?

4. Parché che i tre amighi de Giò no i ze stati boni de consolarlo? (Varda anca la ilustrassion.)

⁴ La Bìblia la dise che i tre amighi de Giò i ze ndati fin Uz par capir quel che l’era drio suceder con lu e consolarlo. (Giò 2:11) Ma, lori no i ze stati boni de farlo. Parché? Prima, lori no i lo ga scoltà. Invesse, suito i ga pensà che Giò l’era drio sofrir parché el gavea fato qualcossa de sbalià e che Geovà l’era drio castigarlo.a (Giò 4:7; 11:14) Secondo, lori i ga dito robe che no ga giutà a Giò. (Giò 13:12) Lori i ga parlà robe che ga assà Giò tanto disgustà. Par esémpio, Bildade el ga dito due volte che Giò el parlea massa. (Giò 8:2; 18:2) E tante volte, lori i ga parlà robe che ga fato Giò sentirse tanto mal. Par esémpio, Zofar el ga dito che Giò el parlea come un stupidoto. (Giò 11:12) Terso, anca se Elifaz, Bildade e Zofar no i ga mia osà con Giò, lori i ghe ga mancà de rispeto e i lo ga fato sentirse in colpa, invesse de incoraiarlo e consolarlo. — Giò 15:7-11.

5. Cossa che ga sucedesto dopo che i tre amighi de Giò i ga parlà?

⁵ Quando Elifaz, Bildade e Zofar i ga finio de parlar, Giò l’era pedo che vanti. (Giò 19:2) Alora, par Giò l’era tanto importante provar che lu l’era giusto, che no’l gavea fato gnente de sbalià. Par quela, el ga parlà sensa pensar. (Giò 6:3, 26). Quel che questi amighi i ga dito a Giò no l’era de acordo cola maniera de pensar de Geovà e lori no i lo ga tratà con compassion. Sàtana li ga doperadi par assar Giò tanto desanimà. (Giò 2:4, 6) Come che quel che ga sucedesto fursi ga giutà i israeliti e come che pol giutar anca noantri ancoi?

6. Cossa che i ansiani de Israel fursi i ga imparà dela stòria de Giò?

⁶ Come che la stòria de Giò fursi la ga giutà i israeliti? Quando Geovà el ga dato la so lege ai israeliti, el ga scoliesto i ansiani par giulgarli e giutarli a obedir le so lege. (Deu. 1:15-18; 27:1) Ma i ansiani i gavea de scoltarli con atension e farghe domande, par dopo darghe consili e giulgarli. (2 Cró. 19:6; Deu. 19:18) E lori sempre i gavaria de parlarghe cole bone. Parché? Parché se no i fesse mia cossita, saria fadiga che le persone le parlesse pròpio quel che le era drio sentir. (Éso. 22:22-24) Queste le ze arquante bele robe che fursi i ansiani de Israel i ga imparà cola stòria de Giò.

7. (a) Ancora chi podaria dar consili ai altri? (Proverbi 27:9) (b) Come el bruto esémpio dei amighi de Giò fursi gàpia giutà i israeliti?

⁷ Ma, no i era sol i ansiani che i gavea de dar consili ai altri. In verità, un gióveno, un vècio, un omo e una dona i podaria giutar un amigo a seitar fedele a Geovà o giutarlo a cambiar se el fusse drio far una roba sbaliada. (Sal. 141:5) Un vero amigo sempre el ga caro de giutar quei che i ze i so amighi. (Ledi Proverbi 27:9.b) Alora, el bruto esémpio dei amighi de Giò fursi gàpia giutà i israeliti a capir cossa che no i gavea de dir e cossa che no i gavea de far quando i fusse dar un consìlio.

8. Cossa che no ghemo de far quando ndemo dar un consìlio? (Varda anca la ilustrassion.)

⁸ Come che la stòria de Giò pol giutarne? Quando i nostri fradei i ze drio patir volemo giutarli, ma mai volemo far compagno ai tre amighi de Giò. Alora, cossa ghemo de far? Prima, vanti de dar un consìlio, volemo esser sicuri che capimo ben quel che ga sucedesto. Secondo, volemo dar un consìlio de acordo cola Parola de Dio invesse de parlar quel che pensemo, come Elifaz el ga fato. (Giò 4:8; 5:3, 27) Terso, mai volemo parlar cole brute o sol de quel che el nostro amigo el ga fato de sbalià. Ricòrdate che Elifaz e i altri i ga dito robe che le era vere. Dopo, el apòstolo Paolo el ga fin doperà arquante parole che Elifaz el gavea dito. (Varda Giò 5:13 e 1 Corinti 3:19.) Ma, tante robe che Elifaz, Bildade e Zofar i ga dito ga assà Giò disgustà e quel che i ga parlà sora Dio no l’era mia giusto. Par quela che Geovà el ga dito che lori no i gavea parlà la verità. (Giò 42:7, 8) Alora, quando ndemo dar un consìlio a qualchedun, mai volemo dar de capir che Geovà l’è rugno o che no’l ama i so servi. Adesso, ndaremo veder cossa che podemo imparar col esémpio de Eliù.

COME CHE ZE STATI I CONSILI DE ELIÙ?

9. (a) Parché che Giò ancora el ghe ocorea de aiuto dopo de scoltar i so tre amighi? (b) Come che Geovà el ga giutà Giò?

⁹ Giò e i so tre amighi i ga discoresto tanto che quel che i ga parlà l’è scrito in 28 capìtoli dela Bìblia. Alora, i la ga tirada longa, i era cativi e i ga parlà con Giò cole brute. Cossita capimo parché che Giò ancora el ghe ocorea de consolo e de consili. Par quela, Geovà el ga doperà Eliù par giutarlo. Ma parché che Eliù no’l ga parlà vanti? Lu el ga dito: “Mi son gióveno e valtri sì veci. Par quela che, par rispeto, son restà sito.” (Giò 32:6, 7) Cossita come tanti ancoi, Eliù el savea che i pi veci i sa tante robe che i gióveni no i sa. Ma dopo de scoltar con atension quel che Giò e i so amighi i gavea dito, lu no l’era pi bon de restar sito. Lu el ga dito: ‘No ocore che vivemo tanti ani par gaver sabedoria e no i ze sol i veci che sa quel che l’è giusto.’ (Giò 32:9) E cossa che Eliù el ga fato dopo?

10. Cossa che Eliù el ga fato vanti de dar el consìlio a Giò? (Giò 33:6, 7)

¹⁰ Vanti de Eliù dar el consìlio a Giò, lu el volea esser sicuro che Giò l’era tranquilo e pronto par scoltarlo. Cossa che lu el ga fato? Come la Bìblia la dise, Eliù l’è restà tanto cativo con quel che el ga scoltà. Alora, prima de dar el consìlio, lu el volea restar calmo. (Giò 32:2-5) Eliù mai el ga parlà cole brute con Giò, pitosto, lu l’è stà ùmile e ghe ga parlà come un vero amigo. Par esémpio, lu ghe ga dito: “Varda, davanti del vero Dio mi son pròpio come ti.” (Ledi Giò 33:6, 7.c) Eliù el ga anca parlà arquante robe che Giò el gavea dito. Cossita, el ga assà Giò sicuro che el ghe gavea scoltà. (Giò 32:11; 33:8-11) Eliù anca el ga fato cossita nele altre volte che el ga dato consìlio a Giò. — Giò 34:5, 6, 9; 35:1-4.

11. Come che Eliù el ga dato consìlio a Giò? (Giò 33:1)

¹¹ Quando Eliù el ga dato el consìlio a Giò, lo ga fato sentir che el gavea valor. Par esémpio, Eliù lo ga ciamà par el so nome, difarente de quel che i altri amighi i ga fato. (Ledi Giò 33:1.d) E intanto che lu el ghe dea el consìlio, el assea che Giò el parlesse. Fursi el ga fato cossita, parché el se ga ricordà che intanto che Giò e i altri amighi i parlea, lori no i ghe assea dir gnente. (Giò 32:4; 33:32) Eliù anca el ga dito a Giò parché che arquante robe che el gavea dito e che el gavea fato no l’è stà mia bel. Lu anca el ghe ga ricordà dela sabedoria, poder, giustìssia e del amor leal de Geovà. (Giò 36:18, 21-26; 37:23, 24) Sicuro che la bela maniera de Eliù dar el consìlio ga parecià a Giò par ricever altri consili de Geovà. (Giò 38:1-3) Come che el esémpio de Eliù fursi gàpia giutà i israeliti e pol giutar anca a noantri?

12. (a) Come che Geovà el ga doperà i profeti par giutar i israeliti? (b) Come che el esémpio de Eliù fursi el gàpia giutà i israeliti?

¹² Come che el esémpio de Eliù fursi el gàpia giutà i israeliti? Geovà el ga doperà tanti profeti par insegnar so pòpolo. Par esémpio, nela època dei giuisi, lu el ga doperà Dèbora e Samuel par insegnar i israeliti. (Giui. 4:4-7; 5:7; 1 Sam. 3:19, 20) E dopo, nela època dei rè, Geovà el ga seità mandarghe profeti par insegnar, dar consili e par giutarli a tornar a far quel che l’è giusto. (2 Sam. 12:1-4; Ati 3:24) Alora, el esémpio de Eliù fursi li ga giutadi tanto a saver cossa dir quando i ndea dar un consìlio.

13. Come che noantri podemo incoraiar i nostri fradei e sorele?

¹³ Come che el esémpio de Eliù pol giutarne? Noantri, servi de Dio, parlemo quel che Dio el vol quando doperemo la Bìblia e quando consolemo i altri. (1 Cor. 14:3) I ansiani i ga de esser ancora pi atenti de parlar sempre con amor e bontà, anca quando i fradei e sorele ghe parla robe “sensa pensar”. — 1 Tes. 5:14; Giò 6:3.

14-15. Come i ansiani i pol far come Eliù quando i ga de giutar qualchedun?

¹⁴ Metemo dir che un ansiano el sa che una sorela la ze tanto desanimada. Lu e nantro fradel i ghe fà una vìsita par darghe incoraiamento e la sorela la dise che la seita ndar nele riunion e nela predicassion, ma che no la ze mia contenta. Cossa che el ansiano el ga de far?

¹⁵ Prima, lu el ndarà scoltar la sorela par capir cossa che l’è drio suceder con ela. Lu el pol domandarse: ‘Sarà che la sente che no la mèrita el amor de Dio o che lu no la ama? Ela la ze massa preocupada par far i mistieri de tuti i di? Ela la ghe ocore de aiuto?’ (Luca 21:34) El ansiano anca el ghe darà lode par le robe bele che la ze drio far. Par esémpio, lu el pol lodarla parché la va ntele riunion e nela predicassion anca che la ze desanimada. E dopo che el ansiano el ga capio parché che la ze drio sentirse cossita, lu el ndarà doperar la Bìblia par giutarla a esser sicura che Dio la ama. — Gàl. 2:20.

SEITA A IMPARAR DEL LIBRO DE GIÒ

16. Come che podemo seitar a imparar del libro de Giò?

¹⁶ Noantri ghemo imparà tante bele robe del libro de Giò. Nel ùltimo stùdio, ghemo visto parché che Dio el assa le persone sofrir e come che podemo seitar fedeli a Geovà intanto che patimo. E in questo stùdio, ghemo imparà sora come dar consili. Alora, fà compagno a Eliù e no stà ndarghe drio al esémpio dei tre amighi de Giò. E se te ghè de dar un consìlio a qualchedun, cossa che te cati de ricordarte dele lession de questo libro? E se fà tanto tempo che no te ledi mia el libro de Giò, proa torte un tempo par léderlo nantra volta. Sicuro che te vè imparar ancora tante altre bele robe.