Sìpia ùmile come Geovà

1. Cossa che te assa maraveià de saver come che Geovà l’è ùmile?

PROA pensar nei governanti e nele autorità che ghen’è ancoi nel mondo. Te diserissi che la umiltà la ze una dele so qualità? Fursi nò. Ma Geovà l’è la persona che ga de pi autorità e poder che ghen’è e, anca cossita, lu l’è ùmile. (Sal. 113:5-8) Nissun l’è pi ùmile che Geovà e lu no’l ga gnanca un poco de orgòlio. In questo stùdio, ndaremo veder quatro maniere che Geovà el mostra che l’è ùmile. Cossita, gavaremo ancora pi voia de esser so amighi e volaremo sforsarse de mostrar umiltà compagno a lu.

GEOVÀ EL GA CARO DE SCOLTARNE

2. Cossa che el Salmo 62:8 ne insegna sora Geovà? (Varda anca el ritrato.)

² No l’è mia fàcile parlar con una persona che la ze orgoliosa. Parché? Parché quei che i ze orgoliosi i pensa che i ze meio che tuti e i trata mal i altri. Ma Geovà no l’è mia cossita. Come lu l’è ùmile, lu el ne convida a pregar a lu e el vol che ghe parlemo tuto quel che pensemo e sentimo. (Ledi Salmo 62:8.a) Lu l’è compagno a un pare che el ga caro de scoltar el so fiol parlar dele so preocupassion. Geovà el ga volesto che tante orassion dei so servi del passà le fusse scrite nela Bìblia par mostrar che el ga caro de scoltarne. (Gios. 10:12-14; 1 Sam. 1:10-18) Ma pol esser che pensemo che no meritemo pregar a Geovà par causa dei nostri sbali. Se semo drio sentirse cossita, cossa ghemo de far?

3. Cossa che ne giuta a esser sicuri che Geovà el ga caro che sempre preghemo a lu?

³ Cossa che ne giuta a esser sicuri che Geovà el ga caro de scoltarne anca quando se sentimo in colpa? Gesù el ga contà una stòria sora un fiol che l’è ndato via de casa e el ga fato bruti pecati. Quando questo fiol el se ga ciamà gramo, lu el volea tornar casa ma el gavea paura che el so pare no’l fusse pi acetarlo. Ma quando lu l’è tornà casa, Gesù el ga dito che so pare “l’è ndato de carera e el ghe ga dato un strucon e lo ga basà con tanto amor”. (Luc. 15:17-20) Geovà l’è compagno a questo pare. Alora, quando preghemo a lu par parlar de un sbàlio che ghemo fato e che se ghemo ciamà grami, podemo esser sicuri che lu el ne scolta. (Lam. 3:19, 20) Geovà el ne capisse e el sa tuto quel che semo drio sentir. E cossita come quel pare dela ilustrassion de Gesù, Geovà el vien come “de carera” par giutarne. (Isa. 57:15) Ma come che lu el ne giuta? Lu el dopera i ansiani, persone dela fameia e altri fradei e sorele par giutarne in quel che ne ocore. (Tia. 5:14, 15) Geovà el ne giuta cossita parché el vol che seitemo a esser so amighi.

4. Parché che le persone le ghe piasea parlar con Gesù?

⁴ Gesù el fà compagno al so Pare. Gesù l’è ùmile cossita come Geovà. Par quela che, quando l’era nela Tera, le persone le gavea voia de ndar fin lu. Par esémpio, nissuni gavea paura de farghe domande e, quando lu ghe fea domande ai altri, lori i parlea pròpio quel che i pensea. (Mat. 16:13-16; Mar. 4:10, 11) Quando le persone le fea sbali, lore no le gavea paura che Gesù ghe disesse su. Invesse, lore le savea che Gesù el ghe mostraria bontà, misericòrdia e passiensa. (Mat. 17:24-27) Alora, Gesù el ga mostrà umiltà pròpio compagno al so Pare. E, par meso de lu, le persone le podea cognosser meio anca a Geovà. (Gio. 14:9) Cossita, lore le ga capio che Geovà l’era ùmile, el volea esser so amigo e che no l’era rugno e cativo come i lìderi religiosi de quela època.

5. Parché che ghemo de esser ùmili se volemo che le persone le gàpia voia de parlar con noantri?

⁵ Come che podemo far compagno a Geovà? Se se sforsemo de esser ùmili, sarà pi fàcile che i altri i gàpia voia de vegner parlar con noantri. Se semo ùmili, no gavaremo orgòlio, invìdia dei altri e ndaremo perdonarli quando i ne disgusta. Noantri anca ndaremo sempre mostrarghe bontà e passiensa. (Col. 3:12-14) L’è tanto importante che i ansiani i sìpia cossita e i passe tempo insieme coi fradei. Par quela, un ansiano el ndarà far el so meio par ndar sempre ale riunion nel Salon del Regno, anca se ghe piase de pi vardar la riunion par vìdeo. Lu anca el ndarà sforsarse par ndar ala predicassion coi fradei. Cossita, tuti i ndarà cognosser meio i ansiani e sarà pi fàcile che i ghe domande aiuto se ghe ocore.

GEOVÀ EL CÀMBIA LE SO DESSISION QUANDO GHE VOL

6-7. Parla de arquanti esempi che mostra che Geovà el ga cambià le so dessision par causa dele orassion dei so servi.

⁶ Quei che i ze orgoliosi i pensa che i sa de tuto e no i vol mai cambiar quel che i ga dessidio. Ma, anca se Geovà el sa de tuto, lu no l’è cossita. Lu el ga caro de scoltar quel che i so servi i pensa e fin el càmbia una dessision par causa de questo. Varda quel che ga sucedesto con Mirian. Ela e Aron i ga sbrontolà de Moisè, quel che Geovà el gavea scoliesto par tender dela nassion de Israel. Geovà l’è restà cativo e el ga castigà Mirian con lepra parché l’era come se ela la fusse drio sbrontolar de lu. Ma Moisè el ga suplicà che Geovà la curesse. Cossa che Geovà el ga fato? Difarente de una persona orgoliosa che no la càmbia mai quel che la ga dessidio, lu el ga scoltà Moisè e el ga curà Mirian. Sicuro che el nostro Pare l’è un bel esémpio de umiltà. — Nùm. 12:1-15.

⁷ Geovà anca el ga mostrà che l’era ùmile quando el ga scoltà el Rè Ezechia. Lu el gavea mandà un profeta par dirghe al rè che el ndaria morir. Ma Ezechia el ga piandesto tanto e el ga suplicà che Geovà lo curesse. Geovà el ga scoltà el rè con tanta bontà e el ghe ga dito che el ndaria viver ancora 15 ani. (2 Rè 20:1, 5, 6) Alora, podemo esser sicuri che Geovà el capisse tuto quel che pensemo e sentimo e che el ga caro de scoltarne.

8. Che esempi i mostra che Gesù el fà compagno al so Pare? (Marco 3:1-6)

⁸ Gesù el fà compagno al so Pare. Quando l’era qua nela Tera, Gesù el ga sempre fato robe bone ai altri. Par esémpio, lu el ga curà arquante persone nel sabo, anca se tanti lìderi religiosi i pensea che l’era una roba sbaliada. (Ledi Marco 3:1-6.b) Gesù l’è cossita anca nela maniera che el tende dele congregassion. Par esémpio, quando un fradel o una sorela fà un bruto pecato, Gesù el mostra passiensa e el proa giutar la persona a fermarse de far quel che l’è sbalià. — Apo. 2:2-5.

9. Come che podemo mostrar bontà a tuti e no spetar massa dei altri? (Varda anca la ilustrassion.)

⁹ Come che podemo far compagno a Geovà? Se semo ùmili, ndaremo tratar a tuti con bontà e no spetar massa de lori. (Tia. 3:17) Par esémpio, i genitori che i fà compagno a Geovà no i assa che i fioi i fae tuto quel che i vol, ma gnanca no i speta che i fae robe che no i ze boni. Giacò el ga dato un bel esémpio de questo, come mostra Génesi 33:12-14. I genitori gnanca no i ga de far comparassion intrà un fiol e nantro. E come che i ansiani i pol far compagno a Geovà? Un ansiano no’l ndarà mia obrigar i altri ansiani a pensar compagno a lu e el ndarà rispetar quel che i desside se l’è de acordo cola Bìblia. (1 Tim. 3:2, 3) E come che tuti noantri nela congregassion podemo far compagno a Geovà? Ghemo de sforsarse de capir la maniera che i altri i pensa e quel che i sente, anca se l’è difarente de noantri. (Rom. 14:1) Sicuro che tuti noantri volemo esser persone che le ‘pensa de maniera echilibrada’. — Fil. 4:5.

GEOVÀ EL MOSTRA PASSIENSA

10. Come che Geovà el ga mostrà passiensa?

¹⁰ Fursi te ghè belche visto che quei che i ze orgoliosi no i ga mia passiensa de spetar i altri, ma Geovà l’è tanto difarente. Lu l’è la persona con de pi passiensa che ghen’è. Varda due esempi. Vanti del Dilùvio, Geovà el gavea dessidio che el ndaria spetar 120 ani par finir fora coi rugni. (Gén. 6:3) Cossita, Noè el ga bio tempo de slevar i so fioi e far la arca. Dopo de un tempo, quando Geovà el ga dito che el ndaria finir fora con Sodoma e Gomora, Abraon el ghe ga fato tante domande. E Geovà lo ga scoltà con passiensa. Una persona orgoliosa fursi la ndaria dir: “Sito chi ti par farme queste domande?” Ma come Geovà l’è ùmile, lu el ga scoltà Abraon con passiensa. — Gén. 18:20-33.

11. De acordo con 2 Piero 3:9, parché che Geovà l’è drio mostrar passiensa ancoi?

¹¹ Come Geovà l’è ùmile, lu l’è drio mostrar passiensa anca ancoi. Lu l’è drio spetar par finir fora con questo mondo bruto. La Bìblia la dise che lu “no’l vol che gnanca un el sìpia destruto, ma el vol che tuti i se ciame grami”. (Ledi 2 Piero 3:9.c) Sarà che l’è bon che Geovà el mostre passiensa cossita? Si, parché milioni de persone ga belche imparà sora Geovà e ga dessidio servirlo. E noantri volemo che ancora tanti i fae questa dessision. Ma Geovà no’l mostrarà mia passiensa cossita par sempre. Lu el ama a tuti, ma no’l assarà che le persone le seite a far tuto quel che le vol. Par quela, el ndarà finir fora coi rugni. — Aba. 2:3.

12. Come che Gesù l’è drio mostrar passiensa compagno a Geovà?

¹² Gesù el fà compagno al so Pare. Gesù l’è drio mostrar passiensa fà belche miliari de ani. Par esémpio, lu l’è drio veder tute le busie che Sàtana l’è drio contar sora Geovà e sora i umani fedeli. (Gén. 3:4, 5; Giò 1:11; Apo. 12:10) Gesù anca l’è drio veder come le persone le ze drio sofrir tanto. Sicuro che lu el volaria finir fora con tuto “quel che el Diaol el ga fato”! (1 Gio. 3:8) Ma cossa che giuta Gesù a spetar con passiensa la ora che Geovà el ndarà dirghe de finir fora con tuto quel che l’è rugno? La so umiltà. Lu el sa che sol Geovà el pol dessider quando el finirà fora con Sàtana e con questo mondo bruto. — Ati 1:7.

13. Quando e parché che Gesù el ga bio passiensa coi so apòstoli?

¹³ Quando Gesù l’era qua nela Tera, lu el ga mostrà tanta passiensa coi so apòstoli. Par esémpio, quando lori i seitea a barufar una volta drio man par veder chi che l’era el pi importante, Gesù no l’è restà inrabià gnanca el ga desistio de lori. Invesse, lu el ga mostrà tanta passiensa parché l’era sicuro che lori i impararia a esser pi ùmili e i cambiaria quel che ghe ocorea. (Luc. 9:46; 22:24-27) Se anca ti te fè i medèsimi sbali una volta drio man, l’è sicuro che te resti contento de gaver un Rè pròpio ùmile e che el ga tanta passiensa cossita.

14. Cossa pol giutarne a gaver de pi passiensa?

¹⁴ Come che podemo far compagno a Geovà? Se volemo pensar e far le robe compagno a Geovà, ghemo de imparar dela maniera che Gesù el pensa. (1 Cor. 2:16) Ma cossa che pol giutarne a far questo? Leder, studiar e pensarghe sora i Vangeli. Noantri podemo anca pregar a Geovà e domandar che lu el ne giute a esser pi ùmili e a gaver de pi passiensa compagno a Gesù. Se se sforsemo de pensar compagno a Gesù, saremo boni de gaver de pi passiensa con noantri stessi e coi altri. — Mat. 18:26-30, 35.

GEOVÀ EL GHE DÀ VALOR A TUTI

15. Parla de arquanti esempi che i mostra che Geovà el ghe dà valor a tuti. (Salmo 138:6)

¹⁵ Ledi Salmo 138:6.d Geovà l’è la persona che la ga de pi autorità nel Universo. Anca cossita, nela Bìblia, ghen’è tanti esempi de persone che i altri no le vedea come importante, ma che Geovà el ghe ga dato tanto valor. Pol esser che gnanca se ricordemo de arquante de lore. Par esémpio, Geovà el ga volesto che Moisè el scrivesse nela so Parola sora Dèbora, che la era una serva che ga laorà nela casa de Isache e Giacò par 125 ani. Anca se la Bìblia no la parla tanto sora Dèbora, Geovà el ga volesto che Moisè el mostresse che ela la gavea valor. (Gén. 24:59; 35:8) Tanti ani dopo, Geovà el ga scoliesto Davi, che l’era pastor de piégore e tanto gióveno, par esser rè dela nassion de Israel. (2 Sam. 22:1, 36) Dopo che Gesù l’è nassesto, Geovà el ga mandà àngeli dir a pastori de piégore che quel che el deventaria el Messia l’era nassesto in Belen. (Luc. 2:8-11) E quando Giusepe e Maria i ga portà Gesù al témpio, Geovà el ga volesto che Simeon e Ana i cognossesse el so fiol. (Luc. 2:25-30, 36-38) Semo sicuri che, ‘anca se Geovà l’è grandioso, lu el varda par el ùmile’!

16. Come Gesù el ga fato compagno a so Pare?

¹⁶ Gesù el fà compagno al so Pare. Compagno a Geovà, anca Gesù el ga mostrà che el ghe dea valor a persone che le era sémplisse. La Bìblia la dise che lu el ga insegnà verità tanto importante sora el Regno de Dio a persone ‘sémplisse e sensa stùdio’. (Ati 4:13; Mat. 11:25) Lu anca el ga curà i maladi e li ga tratadi con tanta bontà par giutarli a capir che i gavea valor. (Luc. 5:13) E nela ùltima note qua nela Tera, Gesù el ga lavà i pié dei so apòstoli, un laoro che un schiavo el fea. (Gio. 13:5) Prima de ndar al cielo, lu anca el ga mostrà che el ghe dea valor ai so dissìpoli, parché el ghe ga dato el laoro pi importante che una persona la pol far, che l’è predicar le bone notìssie a tute le persone. — Mat. 28:19, 20.

17. Come che podemo mostrar che ghe demo valor ai altri? (Varda anca el ritrato.)

¹⁷ Come che podemo far compagno a Geovà? Mostremo che ghe demo valor ai altri quando ghe predichemo le bone notìssie no importa de ndove i vien, el color dela so pel o quanto stùdio o soldi i ga. E mostremo che ghe demo valor ai nostri fradei quando li vedemo come pi importanti che noantri, anca se ghemo arquanti laori nela congregassion o savemo far tante robe. (Fil. 2:3) Sicuro che Geovà el resta tanto contento quando el vede che semo ùmili e che ‘semo premosi de dar onor un al altro’. — Rom. 12:10; Sof. 3:12.

18. Parché che ti te vol esser ùmile compagno a Geovà?

¹⁸ Se noantri se sforsemo de esser ùmili compagno a Geovà, le persone le gavarà voia de vegner parlar con noantri. Noantri anca ndaremo tratar a tuti con passiensa, darghe valor ale persone e no ndaremo spetar massa dei altri. Sicuro che el nostro Pare el resta tanto contento de veder che semo drio sforsarse par esser pi ùmili! — Isa. 43:4.