Sarà che quel che la Bìblia la dise sora quel che l’è giusto o sbalià ancora ga valor?
Tante persone le pensa che le lege e i prinsipi dela Bìblia sora el sesso e el matrimònio no i ga pi valor. Anca persone che le se dise religiose le pensa cossita. Par quela le ciese anca le ga scominsià a pensar cossita e le ga cambià i so insegnamenti sora quel che l’è giusto o sbalià. Sarà che quel che la Bìblia la dise sora quel che l’è giusto o sbalià ancora ga valor? Si. Varda parché.
Le persone le ga bisogno che Dio el ghe diga quel che l’è giusto o sbalià
Le persone le ze state creade cola nessessità dele orientassion del so Creador. La Bìblia la dise: “No l’è mia el omo che el ga de dessider par ndove el ga de caminar.” (Geremia 10:23) Geovàa Dio el ne ga creà cola capacità de far dessision, ma lu no’l ne ga mia dato el dirito gnanca la abilità de dessider par noantri stessi quel che l’è giusto o sbalià. Lu el vol che se fidemo nele so dessision. — Proverbi 3:5.
Par guidarne Dio el ga assà scrito nela Bìblia quel che lu el cata giusto o sbalià. Parché gavemo tanto de bisogno dele orientassion de Dio? Varda due motivi:
Dio ne ga creà. (Salmo 100:3) Come Geovà Dio l’è el nostro Creador, lu el sa pròpio quel che ghemo de bisogno par esser felici e gaver una bona salute fìsica, mental e emossional. Lu anca el sa che gavaremo problemi se no femo de acordo cole so orientassion. (Gàlati 6:7) Geovà el vol el meio par noantri. La Bìblia la dise che Dio l’è “quel che el te insegna par el to benefìssio, quel che el te guida nela strada che te ghè de ndar”. — Isaia 48:17.
Gnanca sempre quel che volemo l’è el meio par noantri. Tante persone le pensa che le pol dessider lore stesse quel che l’è giusto o sbalià, drio seghir quel che ghe dise el so cuor, o sia, i so sentimenti e i so pensamenti. Ma la Bìblia la dise che “el cuor l’è pi traditor de che qualche altra roba e l’è pericoloso”. (Geremia 17:9) Se el nostro cuor no ghe va drio ala sabedoria de Dio, ndaremo far robe che pi tardi se ciamaremo grami. — Proverbi 28:26; Eclesiasti 10:2.
Sarà che i lìderi religiosi i pol assar de banda quel che la Bìblia la dise sora quel che l’è giusto o sbalià?
Nò. La Bìblia la insegna la verità sora Dio e sora quel che lu el vol de noantri. (1 Corinti 6:9-11; Gàlati 5:19-23) E Dio el vol che le persone le sàpia de questo. (1 Timòteo 2:3, 4) Par quela un servo de Dio el ga la obrigassion de insegnar quel che la Parola de Dio la dise. — Tito 1:7-9.
Tante persone no le vol viver de acordo cole lege dela Bìblia sora el sesso e el matrimònio e le va in serca dei lìderi religiosi “che i ghe dise quel che le vol scoltar”. (2 Timòteo 4:3, varda la nota in portoghese) Ma la Bìblia la dà un aviso: Guai de quei che i dise che el bon l’è mal e che el mal l’è bon. (Isaia 5:20) Alora resta ciaro che i lìderi religiosi che no i insegna la verità sora quel che Dio el dise che l’è giusto o sbalià i gavarà de render conto a Dio.
Sarà che i prinsipi de moral dela Bìblia i ne fà esser persone massa dure?
Nò. Quei che i vol assar Dio contento i ga de seghir el esémpio e i insegnamenti de Gesù Cristo. Gesù el ga insegnà i so seghidori a no giulgar i altri. Invesse lori i gavaria de amar e rispetar a tuti. — Mateo 5:43, 44; 7:1.
I seghidori de Gesù i vive de acordo coi prinsipi de moral de Dio. Ma lori i capisse che altre persone le pol dessider viver de acordo con quel che lore le crede. (Mateo 10:14) Gesù no’l ga mia dato la autorisassion ai so seghidori de doperar la polìtica o altre robe par obrigar le persone a far quel che Dio el dise. — Gioani 17:14, 16; 18:36.
Come podemo esser benefissiadi se vivemo de acordo coi prinsipi de moral dela Bìblia?
Le persone che le se sforsa par viver de acordo con quel che Dio el dise che l’è giusto o sbalià le ndarà esser benefissiade adesso e anca nel futuro. (Salmo 19:8, 11) Varda arquanti de questi benefissi:
a La Bìblia la mostra che Geovà l’è el nome de Dio. — Salmo 83:18.