Le règole le te protege

COSSA CHE LE ZE LE RÈGOLE?

L’è quando la persona la sa quel che l’è giusto e quel che l’è sbalià. Par quela, sempre la fà quel che l’è giusto, no importa se ghen’è qualchedun drio veder o nò. La persona la scólie viver de questa maniera.

PARCHÉ CHE L’È IMPORTANTE LA FAMEIA GAVER RÈGOLE?

Ancoi, i tosatei i scolta tante opinion false sora quel che l’è giusto e sora quel che l’è sbalià dei so coleghi, dele mùsiche e dela television. Queste robe pol far con che i tosatei no i sàpia pi ndar drio ale règole giuste.

Par i gióveni l’è pi fadiga far quel che l’è giusto. El libro Uma Longa Conversa Não Bastaa el dise: “Tanti i proarà far con che el gióveno el vae drio a quel che i altri i vol sol par contentarli. I gióveni i ga de imparar quel che lori i cata giusto, invesse de far quel che i so amighi i ghe piase.” L’è par quela che el pupà e la mama i ga de pareciar i tosatei vanti che i vien grandi.

COME INSEGNAR I TO FIOI A NDAR DRIO ALE RÈGOLE

Insegna quel che l’è giusto e quel che l’è sbalià.

CONSÌLIO DELA BÌBLIA: “Le persone maure . . . le ga le so capassità de dissernimento trenade par meso dela pràtica par saver la difarensa tanto del giusto come del sbalià.” — Ebrei 5:14.

• Mostra quel che l’è giusto e quel che l’è sbalià. Quando te si insieme del to fiol, fà una comparassion: Intrà una persona che parla la verità e una che parla una busia; una persona che mostra bontà e una che no la ga bona creansa; una che la loda el so amigo e nantra che parla mal del so amigo. Col tempo, el to fiol ndarà imparar le robe bone che el ga de far e le robe sbaliade che no’l ga de far.

• Spiega parché che una roba la ze giusta o sbaliada. Par esémpio, domandaghe: “Parché che l’è meio sempre parlar la verità? Parché che una busia la finisse con una amicìssia? Parché che ciavar l’è sbalià?” Parla col to fiol par giutarlo a dessider lu sol quel che l’è giusto e quel che l’è sbalià.

• Spiega parché che le règole le ze importante. Te pol dir: “Se te parli la verità, te sarè una persona de fidarse.” O: “Se te ghè bona creansa, le persone le ghe piaserà de esser to amighe.”

Tuti dela fameia i ga de far la so parte.

CONSÌLIO DELA BÌBLIA: “Seité a meter soto prova quel che valtri sì pròpio.” — 2 Corinti 13:5.

• Se tuti dela to fameia i va drio ale règole, te podarè dir:

  • “Nissuni dela nostra fameia dise busie.”

  • “Noantri no barufemo cole persone.”

  • “No doperemo parole sporche e gnanca ghe disemo su a nissuni.”

El to fiol ndarà veder che obedir ale règole, giutarà tuta la fameia a esser cognossesta come quela che la fà quel che l’è giusto.

• Parla sempre col to fiol sora le règole dela fameia. Dopera quel che sucede ntel giorno par insegnarlo. Te pol far una comparassion dele règole dela fameia cole règole dela television, dela internet e dei coleghi de scola. Domanda al to fiol: “Cossa che te ndarissi far in questa situassion? Cossa che la nostra fameia la pensa de quel lì?”

Fà pi forte la to dessision de far quel che l’è giusto.

CONSÌLIO DELA BÌBLIA: “Gavé de mantegner una bona cossiensa.” — 1 Piero 3:16.

• Loda el bon comportamento. Tute le volte che el to fiol el fà la roba giusta, daghe lode e spiega parché che te lo ghè lodà. Par esémpio, te pol dir: “Te ghè parlà la verità. Son restà orgolioso de ti.” Se el to fiol el te parla che el ga fato una roba sbaliada, vanti de dar una coression, lòdalo parché el ga dito la verità.

• Daghe coression. Giuta el to fiol a gaver la responsabilità par quel che el fà. I tosatei i ga de saver quel che i ga fato de sbalià e parché che no l’è de acordo cole règole dela fameia. Arquanti pupà e mame no i dise ai so fioi che i ze sbaliadi, parché no i vol che lori i reste desanimadi. Ma parlar ai fioi quel che i ga fato de sbalià ndarà trenar la so cossiensa par far quel che l’è giusto.