7 Boni Valori

COSSA VOL DIR

Valori i ze le credense che le persone le ga sora quel che l’è giusto, quel che l’è sbalià. I ze quel che controla el nostro comportamento. Par esémpio, te te sforsi par esser sempre onesto, sicuro che te vol insegnar anca ai to fioi a esser onesti.

I valori anca i vol dir règole de comportamento o bona educassion. Par esémpio, una persona che obedisse a règole de comportamento la laora duro, la ze giusta e no la pensa sol in si stessa. L’è pi fàcile imparar queste qualità de picinin.

COSSA LA BÌBLIA LA DISE: “Insegna al toseto la strada che el ga de ndar. Anca quando el sarà vècio, lu no la abandonarà.” — Proverbi 22:6.

PARCHÉ L’È IMPORTANTE

Gaver boni valori l’è tanto importante in questo tempo de tanta tecnologia. “Una mama che la se ciama Karin la dise: “In tuti i selulari e in tuti i momenti, se pol catar brute robe. I nostri fioi i pol esser fin dela nostra banda e noantri gnanca se nicordemo che lori i ze drio vardar qualcossa che no la va ben.”

COSSA LA BÌBLIA LA DISE: “Le persone maure . . . [le] ga le so capacità de dissernimento trenade par meso dela pràtica par saver la difarensa tanto del giusto come del sbalià.” — Ebrei 5:14.

Anca gaver règole de comportamento l’è tanto importante. Questo vol dir gaver una bona educassion, come dir ‘par favor’ e ‘gràssie’. Anca vol dir mostrar che te te preocupi coi altri, una roba che la ze tanto fadiga de catar in questo mondo ndove che le persone le se interessa de pi nei apareli eletrónichi de che par le persone.

COSSA LA BÌBLIA LA DISE: “Anca, gavé de tratar i altri come volé esser tratadi.” — Luca 6:31.

COSSA TE POL FAR

Assa ciaro quel che par ti l’è giusto e quel che l’è sbalià. Par esémpio, arquanti studiosi i dise che, se i genitori i assa ciaro par i fioi che far sesso vanti del matrimònio l’è sbalià, l’è pi fàcile che i fioi i ndarà obedir a questa orientassion.

PROA FAR QUESTO: Quel che sucede nel mondo pol esser una bona oportunità par insegnar ai fioi quel che l’è giusto e quel che l’è sbalià. Par esémpio, se scolté una notìssia de una persona che par òdio la ga cometesto un crime, valtri podarissi dir: “Che bruto che tante persone le ga tanta ràbia par i altri! Cossa càtito, come che una persona la pol rivar a far una roba cossita?”

“Se un fiol no’l sà quel che l’è giusto e quel che l’è sbalià, sarà tanto fadiga par lu scòlier cossa far.” — Brandon.

Insegna al to fiol le bone règole de comportamento. Fin i picinini i pol imparar a dir ‘par favor’ e ‘gràssie’, e gaver preocupassion par i altri. Un libro che el parla sora slevar i fioia el dise: “L’è bon che i fioi i capissa che no i ze soli nel mondo, ma che lori i fà parte de una fameia, de una scola, de una comunità. De pi che i capisse questo, pi fàcile sarà par lori comportarse con bontà, e questo giutarà a tuti, no sol a lori.”

PROA FAR QUESTO: Faghe far al to fiol qualche mestier de casa, cossita lu el va imparar che l’è importante far le robe par giutar i altri.

“Se i nostri fioi i impara adesso a far qualche mestier de casa, quando lori i ndarà viver lori soli, i sarà belche acostumadi a far quel che ghe ocore da picinin.” — Tara.