I GIÓVENI I DOMANDA
Parché pregar l’è bon par mi?
De acordo con un stùdio, de pi de 90% dei gióveni brasiliani i prega, ma sol 16% i prega quasi tuti i di. Ma sicuro che arquanti de questi gióveni i vol saver: ‘Sarà che pregar l’è sol una roba che fà noantri sentirse meio o l’è de pi che questo?’
Cossa vol dir pregar?
Pregar l’è parlar col Creador de tute le robe. Pensa un pochetin cossa che questo vol dir! Geovà l’è meio che le persone in tute le robe, ma ancora cossita, lu “no l’è distante de cada un de noantri.” (Ati 17:27) In verità, la Bìblia la ne fà un convite maraveioso: “Rivé darente de Dio e lu el rivarà darente de valtri.” — Tiago 4:8.
Come ti te pol rivar darente de Dio?
Par pregar — l’è cossita che ti te parli con Dio.
Par studiar la Bìblia — l’è cossita che Dio el “parla” con ti.
Parlar con Dio — par meso dela orassion e del stùdio dela Bìblia — te giutarà a gaver una amicìssia cada volta pi forte con lu.
“Parlar con Geovà — la persona pi importante del Universo — l’è un dei pi grandi privilegi che una persona la pol gaver.” — Jeremy.
“Parlar i me sentimenti pi profondi con Geovà me fà sentir pi darente de lu.” — Miranda.
Sarà che Dio el scolta pròpio?
Anca se ti te credi in Dio e te preghi a lu, fursi te pol catar un pochetin fadiga creder che lu l’è pròpio drio scoltarte. Ma la Bìblia la dise che Geovà l’è Quel ‘che scolta le orassion.’ (Salmo 65:2) Anca, ela la te convida a ‘butar sora de lu tute le to preocupassion’. Parché? ‘Parché lu el tende de ti.’ — 1 Piero 5:7.
Pensa un pochetin: Tólito tempo par parlar coi to amighi? Ti te pol far el medèsimo con Dio. Parla sempre con lu e dopera el so nome, Geovà. (Salmo 86:5-7; 88:9) La Bìblia la te convida a ‘pregar sempre.’ — 1 Tessalonissensi 5:17.
“La orassion la ze una ciàcola intrà mi e el me Pare selestial. Mi posso verder el me cuor del tuto.” — Moisè.
“Mi parlo con Geovà sora cose tanto profonde, dela medèsima maniera che mi parlo cola me mare o cola me meio amiga.” — Karen.
Sora cossa mi posso pregar?
La Bìblia la dise: “Domandé el aiuto de Dio in tute le cose par meso de orassion e sùpliche, insieme a ringrassiamento.” — Filipensi 4:6.
Alora, sarà che te pol pregar sora i to problemi? Sicuro che si! In verità, la Bìblia la dise: “Buta la to carga sora Geovà, e lu pròpio el te sostegnerà.” — Salmo 55:22.
Ma sicuro che quando ti te preghi, no te pol parlar sol sora i to problemi. Una gióvena che la ga nome Chantelle la dise: “No saria una amicìssia tanto bona se mi sol domandesse aiuto a Geovà. Mi cato che prima l’è bon ringrassiar, e mi go tante robe par ringrassiarlo.”
Pensa un pochetin: Che robe che te fà voia de ringrassiar? Sito bon de pensar in tre robe che te pol ringrassiar a Geovà ancoi?
“Fin robe sémplisse, come veder un bel fior, pol farne gaver la voia de ringrassiar a Geovà.” — Anita.
“Pensa sora una roba dela creassion che te cati maraveiosa o nte un versìcolo dela Bìblia che toca el to cuor, e dopo prega a Geovà par ringrassiarlo par questo.” — Brian.