Come ti te pol deventar amigo de Dio?

1, 2. A chi Geovà el ga scoliesto come amighi?

A CHI te piaseria gaver come amigo? Una persona che ti te vol ben, che ti te senti ben star insieme e che la ga una bona personalità e bele qualità.

² Geovà Dio el ga scoliesto arquanti umani come so amighi. Par esémpio, Geovà el ga dito che Abraamo l’era so amigo. (Isaías 41:8; Tiago 2:23) Geovà el ghe volea ben a Dàvide parché l’era ‘un omo che el fea restar contento el so cuor.’ (Atos 13:22) El profeta Daniel anca l’era “tanto pressioso” ai oci de Geovà. —Daniel 9:23

3. Parché Abraamo, Dàvide e Daniel i era amighi de Geovà?

³ Come Abraamo, Dàvide e Daniel i ze deventadi amighi de Geovà? Geovà el ga dito a Abraamo: “Ti te ghè scoltà la me vose.” (Gênesis 22:18) Geovà el deventa amigo de quei che lo obedisse con umiltà. Anca una nassion de persone la pol deventarse so amiga. Geovà el ga spiegà ala nassion de Israel: “Obedí ala me vose, e Mi me deventarò el vostro Dio, e valtri deventaré el me pòpolo.” (Jeremias 7:23) Alora, se ti te vol deventar amigo de Geovà, te ghè de obedirlo.

GEOVÀ EL PROTEGE I SO AMIGHI

4, 5. Come Geovà el protege i so amighi?

⁴ La Bìblia la dise che Geovà el seita ndar in serca “par mostrar la so forsa a favor de quei che i ga el cuor del tuto dedicà a Lu.” (2 Crônicas 16:9) Ntel Salmo 32:8, Geovà el promete ai so amighi: “Mi te darò perspicàssia e te istruirò ntela strada che te ghè de ndar. Mi te darò consili coi me oci atenti in ti.”

⁵ Un poderoso nemigo el vol che assemo de ­esser amighi de Dio. Ma Geovà el vol proteger noantri. (Lesi Salmo 55:22.) Come amighi de Dio, noantri Lo servimo con tuto el nostro cuor e semo leai. Anca nei momenti pi difìcili, gavemo la medèsima fidùcia che Davide: “Mi no sarò mai sgorlà, parché Lu l’è ala me drita.” (Salmo 16:8; 63:8) Ndemo veder cossa Sàtana el fà par rovinar la nostra amicìssia con Geovà.

LA ACUSASSION DE SÀTANA

6. Che acusassion Sàtana el ga fato contra i umani?

⁶ Ntel capìtolo 11, gavemo imparà che Sàtana el ga acusà Geovà de esser un busier. Anca el ga acusà Dio de esser ingiusto parché Dio no’l ga assà Adamo e Eva dessider lori soli quel che l’era giusto e quel che l’era sbalià. El libro bìblico de Giobe el ne insegna che Sàtana el acusa anca tuti i umani che i vol esser amighi de Dio. Sàtana el dise che lori no i serve a Dio par amor, ma sol par guadagnar le cose che Dio el pol darghe. Sàtana anca el dise che lu el pol far tuti rebelarse contra Dio. Ndemo veder cossa podemo imparar del esémpio de Giobe e come Geovà lo ga protegesto.

7, 8. (a) Come Geovà el considerea Giobe? (b) Cossa Sàtana el ga dito de Giobe?

⁷ Chi l’era Giobe? Lu l’era un omo bon che l’è vivesto 3.600 ani indrio. Geovà el ga dito che in quel tempo no gavea omo compagno a Giobe ntela Tera. Giobe el gavea profondo rispeto par Dio e el odiea quel che l’era mal. (Jó 1:8) Giobe l’era pròpio amigo de Geovà.

⁸ Sàtana el ga dito che Giobe el servia a Dio par motivi egoisti. Sàtana el ga dito a Geovà: “Ti no te ghè messo un muro de protession intorno de lu e intorno dela so casa e intorno de tute le robe che lu el ga? Te ghè benedio el laoro dele so man, e le so pròpie bèstie le ze aumentade ntela tera. Ma adesso, mete la to man sora tuto quel che el ga, e sicuro che el te maledirà ntela to fàcia.” —Jó 1:10, 11.

9. Cossa Geovà el ga permesso a Sàtana de far?

⁹ Sàtana el ga acusà Giobe de servir a Geovà sol parché lu el volea qualcossa de Dio. Sàtana el ga dito che lu anca el podea far Giobe assar de servir a Geovà. Geovà el savea che l’era una busia, ma el ga dato a Sàtana la permission de proar se Giobe l’era amigo de Geovà parché lo amea.

SÀTANA EL ATACA GIOBE

10. (a) Come Sàtana el ga atacà Giobe? (b) Cossa Giobe el ga fato?

¹⁰ Prima Sàtana el ga finio fora con tute le bèstie de Giobe. Dopo Sàtana el ga copà quasi tuti i servi de Giobe. Giobe el ga perso tuto. Par fin, Sàtana el ga copà i diese fioi de Giobe in una tempesta. Ma Giobe l’è restà fedele a Geovà. “In tuto questo, Giobe no’l ga pecà e gnanca el ga acusà Dio de far qualcossa de sbalià.” —Jó 1:12-19, 22.

11. (a) Ancora par sora, cossa Sàtana el ga fato a Giobe? (b) Come Giobe el ga reagio?

¹¹ Sàtana no’l ga assà star. Lu el ga dito a Dio: “Ataca el so osso e la so carne e sicuro che el te maledirà ntela to fàcia.” Alora Sàtana el ga atacà Giobe con una bruta malatia. (Jó 2:5, 7) Ancora cossita, Giobe l’è restà fedele a Geovà. El ga dito: “Fin la me morte, mi mai ndarò renunsiar ala me integrità!” —Jó 27:5.

12. Come Giobe el ga mostrà che Sàtana l’era un busier?

¹² Giobe no’l savea gnente sora la acusassion de Sàtana o sora parché lu l’era drio sofrir tanto. Lu el ga pensà che Geovà l’era drio causar i so problemi. (Jó 6:4; 16:11-14) Ancora cossita, Giobe l’è restà fedele a Geovà. No ghen’era gnanca un dùbio che Giobe l’era amigo de Dio parché lu Lo amea, nò parché l’era egoista. La acusassion de Sàtana la era una busia!

13. Qual l’è stà el resultà dela lealtà de Giobe?

¹³ Giobe no’l savea mia quel che l’era drio suceder ntel cielo, ma ancora cossita lu l’è restà fedele a Dio e el ga mostrà che Sàtana l’era perverso. Geovà el ga ricompensà Giobe parché lu l’è stà un amigo leal. —Jó 42:12-17.

SÀTANA L’È DRIO ACUSARTE

14, 15. Che acusassion Sàtana el ga fato contra tuti i umani?

¹⁴ Ti te pol imparar arquante lession importanti de quel che l’è sucedesto a Giobe. Ancoi, Sàtana el ne acusa de servir Geovà sol par guadagnar qualcossa da Lu. In Jó 2:4, Sàtana el ga dito: “El omo el darà tuto quel che el ga in càmbio dela so vita.” Cossita Sàtana el acusa tuti i òmini e le done de esser egoisti, come el ga fato con Giobe. Sentene de ani dopo dela morte de Giobe, Sàtana ancora l’è drio mancar de rispeto a Geovà e ai so servi. Par esémpio, lesemo in Provérbios 27:11: “Sii sapiente, fiol mio, e alegra el me cuor, cossita mi posso dar una risposta a quel che me insulta.”

¹⁵ Ti te pol scòlier obedir a Geovà e esser so amigo leal, mostrando che Sàtana l’è un busier. Questa la è la meio dessision che ti te pol far, anca se te ghè de far grandi cambiamenti ntela to vita. Sàtana el ga dito che ti no te sarè fedele a Geovà al infrontar problemi. Lu el fà del tuto par farte assar de esser fedele a Geovà. Come lu el fà questo?

16. (a) Cossa Sàtana el fà par far le persone assar de servir a Geovà? (b) Come el Diaol el pol doperar ste robe contra ti?

¹⁶ Sàtana el dopera diverse maniere par farne assar de esser amighi de Dio. Lu el ataca ‘come un leon che el ruge, drio ndar in serca de qualchedun par magnarlo.’ (1 Pedro 5:8) No stà mia spaventarte se quei dela to fameia, amighi o altri i proa farte assar de studiar la Bìblia e de far quel che l’è giusto.a (João 15:19, 20) Sàtana el fà finta de esser “un àngelo de luce”. Cossita el proa farne desobedir a Geovà. (2 Coríntios 11:14) Anca el ne fà creder che no semo boni de servir a Dio. —Provérbios 24:10.

OBEDÌ AI COMANDAMENTI DE GEOVÀ

17. Parché gavemo de obedir a Geovà?

¹⁷ Quando obedimo a Geovà, mostremo che Sàtana l’è un busier. Cossa ne giutarà a obedir a Geovà? La Bìblia la dise: “Te ghè de amar a Geovà el to Dio con tuto el to cuor e con tuta la to ànima e con tuta la to forsa.” (Deuteronômio 6:5) Obedimo a Geovà parché lo amemo. Quanto de pi amemo a Geovà, tanto de pi volemo far tuto quel che Lu el ne domanda. El apòstolo Gioani el ga scrito: “Questo l’è quel che el amor de Dio vol dir: che obedimo ai so comandamenti; e i so comandamenti no i ze mia un peso.” —1 João 5:3.

18, 19. (a) Che cose le ze sbaliade par Geovà? (b) Come savemo che Geovà mai el ne domanda de far una cosa che no podemo far?

¹⁸ Ma che cose le ze sbaliade par Geovà? Ghen’è arquanti esempi ntel quadro “Òdia quel che Geovà el òdia.” Ala prima ociada, ti te podaria pensar che arquante de ste robe no le ze mia tanto sbaliade. Ma quando te lesi i verseti dela Bìblia e te ghe pensi sora con atension, ti te ndarè capir che obedir ale legi de Geovà la è la meio roba. Par obedir, fursi te ocore far cambiamenti ntela to vita. Pol esser difìcile farli, ma se ti te fè sti cambiamenti, te gavarè pace e felicità che vien de esser un amigo leal de Dio. (Isaías 48:17, 18) Sarà che l’è possìbile far sti cambiamenti?

¹⁹ Geovà mai el ne domanda de far una cosa che no podemo far. (Deuteronômio 30:11-14) Come un amigo, Lu el ne cognosse meio che noantri stessi. Lu el cognosse le nostre qualità e le nostre fiachesse. (Salmo 103:14) El apòstolo Paolo el dise: “Dio l’è fedele, e no’l ve assarà esser tentadi de pi de quel che valtri podé soportar, ma insieme cola tentassion lu anca el ve darà la maniera par vegner fora, cossita valtri saré boni soportarla.” (1 Coríntios 10:13) Podemo esser sicuri che Geovà el ne darà sempre la forsa par far quel che l’è giusto. Lu el ne darà “el poder che l’è de pi del normal” par giutarne a soportar le situassion difìcili. (2 Coríntios 4:7) Dopo de gaver visto el aiuto de Geovà par tanto tempo, Paolo el podea dir: “Par tute le robe go forsa gràssie a quel che el me dà poder.” —Filipenses 4:13.

IMPARA A AMAR QUEL CHE DIO EL AMA

20. Che qualità gavemo de imitar, e parché?

²⁰ Se volemo esser amighi de Geovà, no’l basta sol assar de far quel che Geovà el dise che l’è sbalià. (Romanos 12:9) I amighi de Dio i ama quel che Lu el ama. Lori i ze descriti ntel Salmo 15:1-5. (Lesi.) I amighi de Geovà i imita le so qualità e i mostra “amor, alegria, pace, passiensa, benignità, bontà, fede, benevolensa, autocontrolo.” —Gálatas 5:22, 23.

21. Cossa pol giutarte a imitar le qualità de Dio?

²¹ Cossa pol giutarte a imitar le qualità de Dio? Te ghè de imparar quel che Geovà el ama lesendo e studiando la Bìblia tuti i giorni. (Isaías 30:20, 21) Se te fè cossita, el to amor par Geovà el restarà sempre pi forte e te volerè obedirlo ancora de pi.

22. Qual l’è el resultà de obedir a Geovà?

²² I cambiamenti che te ghè de far ntela to vita i ze come tirar via robe vècie e meter su robe nove. La Bìblia la dise che te ghè de “tirar via la vècia personalità” e “vestirse dela nova personalità”. (Colossenses 3:9, 10) No l’è mia fàcile far cambiamenti e obedir a Geovà, ma se femo cossita Lu el promete darne “una granda ricompensa”. (Salmo 19:11) Scoli obedir a Geovà par amor. Alora si, ti te ndarè mostrar che Sàtana l’è un busier e te ndarè deventar amigo de Dio!