LESSION 2

Come parlar de cuor

2 Corinti 2:17

COSSA CHE TE GHÈ DE FAR: Parla de una maniera natural e sinsiera. Cossita te mostrarè quel che te pensi sora quel che te sì drio parlar e che ti te importi cole persone.

COME CHE TE POL FARLO:

Prega e paréciate ben. Prega a Geovà che el te giute a pensar nel messàgio e no nele parole che te vè doperar. Ricòrdate dei punti prinsipai. Parla dela to maniera invesse de dir parola par parola come se te fussi drio leder.

Se ti te vè leder qualcossa nela Bìblia o nte nantra publicassion, vanti te ghè de cognosser ben el testo cossita te sarè bon de léderlo ben. Se te vè leder le parole de nantra persona, ledi con sentimento ma sensa esagerar.
Parla de cuor. Pensa nele persone e parché che lore le ga bisogno de scoltar el messàgio. La to maniera de comportarte, come che te movi e le spression dela to fàcia le mostrarà che ti te sì sinsiero e che te sì come un amigo.

Parlar de cuor no vol dir parlar tuto come che te vol sensa rispeto. Dopera spression giuste e fàcile de capir par darghe valor al messàgio.
Varda in fàcia le persone. Varda nei oci dele persone con chi te sì drio parlar. Quando te fè un discorso, varda una persona ala volta invesse che vardar tuti nel medèsimo tempo.