PARTE 2

Gavé de esser leai un al altro

“Quel che Dio el ga unio el omo no lo spartissa.” — Marco 10:9

Geovà el vol che semo leai. (Michea 6:8) Nel matrimònio questo l’è pròpio importante parché, se no ghen’è lealtà, no se fidemo un del altro. E sol se se fidemo un del altro, el amor intrà el sposo e la sposa el resta pi grando.

Ancoi la lealtà nel matrimònio la ze in perìcolo. Par proteger el vostro matrimònio, gavé de esser determinadi a far due robe.

1 EL MATRIMÒNIO EL GA DE ESSER LA ROBA PI IMPORTANTE

COSSA CHE LA BÌBLIA LA DISE: “Gavé de saver quale le ze le robe pi importante.” (Filipensi 1:10) El matrimònio l’è una dele robe pi importante dela vostra vita. Gavé de darghe el primo posto.

Geovà el vol che valtri ghe dé atension al vostro sposo o sposa e che godé la vita insieme. (Eclesiasti 9:9) Geovà el assa ciaro che no gavé mai de assar de banda el vostro sposo o sposa. Invesse, gavé de catar maniere par far felice un al altro. (1 Corinti 10:24) El vostro sposo o sposa el ga de veder che valtri ghe dé valor e che gavé bisogno un del altro.

Un sposo el porta ala so sposa qualcossa de bever caldo; un sposo el riva casa e el cata la so sposa che la cosina

COSSA CHE PODÉ FAR:

Passé sempre tempo col vostro sposo o sposa e deghe atension.
Pensé in “noantri” invesse che in “mi”.

Un sposo el ga la stampa dela so sposa sora la tola del so laoro

2 GAVÉ DE PROTEGER EL VOSTRO CUOR

COSSA CHE LA BÌBLIA LA DISE: “Quel che el seita vardar una dona fin gaver passion par ela, el ga belche fato adultèrio con ela nel so cuor.” (Mateo 5:28) Se qualchedun el seita pensar in robe imorai, l’è come se no’l fusse leal al so sposo o sposa.

Geovà el ga dito che gavé de proteger el vostro cuor. (Proverbi 4:23; Geremia 17:9) Par quela che gavé de star atenti a quel che vardé. (Mateo 5:29, 30) Gavé de far compagno de Giò che el ga fato un pato coi so oci de mai vardar con voia nantra dona. (Giò 31:1) Gavé de esser determinadi a mai vardar robe de pornografia e mai gaver sentimenti de passion par una persona che no la ze el vostro sposo o sposa.

COSSA CHE PODÉ FAR:

Assé ciaro par i altri quanto l’è importante par valtri el vostro sposo o sposa.
Rispeté i sentimenti del vostro sposo o sposa; gavé de finir qualche amicìssia che pol far sentir mal el vostro sposo o sposa.