Publicassion par pareciarse par la Riunion Vivemo e Insegnemo
Idee par parlar sora la Bìblia
No se vende due pardai par una moneda de poco valor? Ma, gnanca un de questi el va cascar par tera sensa che el vostro Pare el sàpia. 30 Ma fin tuti i cavei dela vostra testa i ze contadi. 31 Alora no sté gaver paura; valtri valé de pi che tanti pardai.
“‘Parché mi sò ben quel che penso par valtri,’ el dise Geovà, ‘vui che gavé pace, nò desgràssia, e vui darve un futuro e una speransa.
3-9 DE GENARO
LESSION PRESSIOSE DELA BÌBLIA ǀ GIUISI 15-16
“Tradir l’è una bruta roba par Geovà!”
Sentinela 15/04/12 pàg. 8 paràg. 4
Tradir l’è un bruto segnal dei nostri giorni
4 Sanson el volea lotar contra i filistei par difender el pòpolo de Dio. Lu el amea tanto Dalila, ma ela no la ghe volea ben e la era una dona imbroiona. Fursi i filistei i savea de questo. Alora un giorno, sinque filistei i ga domandà a Dalila parché che Sanson el gavea tuta quela forsa. Lori i ga dito a Dalila che i ndea darghe tanti soldi par saver come i podaria coparlo, e ela la ga acetà. Ela la ga proà saver el segreto de Sanson tre volte. Ma lu no’l ghe ga mia contà. Ela la ga seità a domandarghe fin che lu el se ga stufà e el ga perso la passiensa. Alora, lu el ghe ga contà che i so cavei no i era mai stati taiadi e che se i fusse taiadi lu el perderia la so forsa. Quando Sanson el se ga indormensà, ela la ga mandà che i taiesse i so cavei. Ela la ga assà che i nemighi i fesse quel che i volesse con Sanson. (Giuisi 16:4, 5, 15-21) Che bruta roba che la fato parché la volea sempre de pi! Ela la ga tradio quel che la amea.
Sentinela 15/01/05 pàg. 27 paràg. 3
Punti interessanti del libro de Giuisi
Giuisi 14:16, 17; 16:16. Quando una persona la piande o la sbrontola par guadagnar quel che la vol, ela la pol rovinar la so relassion con altre persone. — Pro. 19:13; 21:19
Sentinela 15/04/12 pàg. 11 paràg. 15-16
Tradir l’è un bruto segnal dei nostri giorni
15 Come che i maridadi i pol seitar leai un al altro? La Parola de Dio la dise: “Resta contento cola sposa [o el sposo] che te sì maridà quando te eri gióveno.” (Pro. 5:18; Ecl. 9:9) Alora, el omo e la dona i ga de darghe atension un al altro, passar tempo insieme e gaver una bona amicìssia intrà de lori. Lori i ga de sforsarse par tender del so matrimònio e dela so amicìssia con Geovà. Ma come che i pol far questo? Lori i ga de far le robe insieme, come studiar la Bìblia, predicar e pregar a Dio par gaver le so benedission.
SEITA LEAL A GEOVÀ
16 Quando una persona la fà una roba sbaliada e no la se ciama grama, no la pol pi esser Testimònia de Geovà. La dissiplina la ze come un trenamento che el pol giutar la persona a esser amiga de Geovà nantra volta. (Ebr. 12:11) E se ghemo un parente o un amigo che l’è stà desassossià? Alora, podemo mostrar se semo leai a questa persona o a Geovà. Geovà l’è atento se noantri ndaremo obedir al so comandamento de no parlar pi con qualche persona che la ze stata desassossiada. — Ledi 1 Corinti 5:11-13.
Va in serca de lession pressiose dela Bìblia
Sentinela 15/03/05 pàg. 27 paràg. 6
Sanson el ga vinsesto par causa dela forsa de Geovà!
Sanson l’era dessidio de lotar contra i nemighi de Dio, i filistei. Lu el gavea bisogno de un posto par passar la note nela cità de Gaza. Alora, l’è restà nela casa de una prostituta, ma lu no’l volea far gnente de sbalià con ela. Quando l’era mesa note, lu l’è ndà via dela casa dela prostituta fin ai portoni dela cità de Gaza. Lu el ga cavà via i due portoni e i due palanchi che li tegnea. Li ga portadi su 60 chilómetri, fin un monte darente Ebron. Sanson l’è stà bon de farlo parché el gavea la aprovassion de Dio e la forsa che Lu el ghe gavea dato. — Giuisi 16:1-3
10-16 DE GENARO
LESSION PRESSIOSE DELA BÌBLIA ǀ GIUISI 17-19
“Gavaremo problemi se desobedimo a Dio”
Perspicaz vol. 2 pàg. 369 paràg. 7
Mica
1. Omo de Efrain. Mica el gavea una casa de dèi, el ga fato un èfode e terafini e el ga metesto un dei so fioi par laorar come sasserdote. El ogetivo de tuto questo l’era darghe onor a Geovà, ma ancora cossita l’è stà un bruto dispeto contra lu. Mica l’era drio desobedir al comandamento de Dio contra la idolatria. (Éso. 20:4-6) Anca, l’era drio ndar contra el tabernàcolo e i sasserdoti che Geovà el gavea scoliesto. (Giuisi 17:1-6; Deu. 12:1-14) Pi tardi, Mica el ga ciamà Gionatan par vegner de star nela so casa e lo ga convidà par laorar come sasserdote. Questo gióveno l’era un levita, dela fameia de Gerson, fiol de Moisè. Ma ancora che el fusse un levita, lu no l’era mia dela fameia de Aron. Par quela, lu no’l podea mia laorar come sasserdote. (Giuisi 18:4, 30) Cossita, Mica el ga fato nantro bruto pecato. — Nùm. 3:10
Perspicaz vol. 2 pàg. 369 paràg. 9
Mica
Mica e altri òmini i ze ndati drio i òmini dela tribo de Dan. Quando li ga catadi, i òmini dela tribo de Dan i ga domandà parché Mica e i so òmini i ze ndati drio de lori. Mica el ghe ga rispondesto che el ga fato questo parché i gavea ciavà i so dèi, i gavea portà via i so sasserdoti e i lo gavea assà sensa gnente. Alora, quei dela tribo de Dan i ga dito che, se Mica el seitesse ndarghe drio, lori i ndaria atacarli. Cossita, Mica el ga visto che lori i era un pòpolo pi grande e pi forte, par quela el ga dessidio tornar casa. — Giuisi 18:22-26
Va in serca de lession pressiose dela Bìblia
Sentinela 15/12/15 pàg. 10 paràg. 6
Una bona Tradussion dela Bìblia
6 La Tradussion del Novo Mondo la mostra el nome de Dio 7.216 volte, sei volte de pi che ghen’era prima. Questo l’è stà fato parché nei Roli del Mar Morto se ga catà altre sinque volte el nome de Dio, nei testi de 1 Samuel 2:25; 6:3; 10:26; 23:14, 16. Un stùdio nei roli antighi dele Scriture el ga mostrà che ghen’è el nome de Dio anca nel testo de Giuisi 19:18. Cossita, vedemo prove che el nome de Geovà el ga de esserghe nela Bìblia.
17-23 DE GENARO
LESSION PRESSIOSE DELA BÌBLIA ǀ GIUISI 20-21
“Seita a domandar el aiuto de Geovà”
Sentinela 15/09/11 pàg. 32 paràg. 2
Te pol far compagno Fineia quando te ghè qualche problema?
I òmini de Gibeà, dela tribo de Bengiamin, i ga violentà e i ga copà la concubina de un levita. Par causa de questa desgràssia, le altre tribo de Israel le se ga parecià par far una guera contra la tribo de Bengiamin. (Giuisi 20:1-11) Lori i ga domandà el aiuto de Geovà vanti de ndar lotar. Ma ancora cossita, lori i ga perso tanto in queste batàlie parché i òmini de Bengiamin li ga vinsesti due volte. (Giuisi 20:14-25) Sarà che no ga giovà gnente pregar par el aiuto de Geovà? Sarà che Geovà el volea pròpio che quele tribo le fusse contra la tribo de Bengiamin par causa del so sbàlio?
Sentinela 15/01/05 pàg. 27 paràg. 7
Punti interessanti del libro de Giuisi
Giuisi 20:17-48 — La tribo de Bengiamin la meritea esser punida. Ancora cossita, parché Geovà el ga assà che la vinsesse due volte le altre tribo de Israel? Le altre tribo de Israel le ga sofrio tanto. Geovà el ga assà questo suceder. Cossita, lori i podaria mostrar che i era pròpio dessididi a finir col mal in Israel.
Sentinela 15/09/11 pàg. 32 paràg. 4
Te pol far compagno Fineia quando te ghè qualche problema?
Cossa che imparemo de questo? Quando ghen’è un problema nela congregassion, i ansiani i proa risolverlo e i prega a Geovà par domandar el so aiuto. Ma ancora cossita, pol esser che el problema no’l se risolva. Alora, saria importante che i se ricordesse de quel che Gesù el ga dito. Lu el ga insegnà che, se seitemo domandar, riceveremo; se ndemo in serca, cataremo e se seitemo bater nela porta, ela la sarà verta. Anca se la risposta no la vien suito, sicuro che Geovà el ndarà risponder nel tempo giusto.
Va in serca de lession pressiose dela Bìblia
Sentinela 01/05/14 pàg. 11 paràg. 4-6
Seto questo?
Come che se doperea la fionda nele guere?
Pol esser che Davi el gàpia imparà a doperar la fionda quando l’era gióveno e tendea dele piégore. Lu el ga doperà la fionda par copar el gigante Golia. — 1 Sam. 17:40-50
Nel passà, i egìpsi e i assiri i fea desegni de fionde. La fionda la era fata con un toco de coro o de pano con due tirache, una de cada banda. Quel che doperea la fionda el ciapea un sasso tondo e liso, grando come una naransa e lo metea nel tocheto de coro o de pano. Alora, el alsea la so man par sora dela so testa, girea, molea una dele tirache e cossita tirea el sasso che ndea con forsa e drito ndove lu el volea.
Ghen’era guerieri con tanta abilità che i era boni de tirar sassi de 160 a 240 chilómetri par ora. Sicuro che questa la era una arma che la podea copar. — Giuisi 20:16
24-30 DE GENARO
LESSION PRESSIOSE DELA BÌBLIA ǀ RUTE 1-2
“Mostra amor leal”
Sentinela 02/16 pàg. 14 paràg. 5
Fà compagno i amighi de Geovà
5 Rute la podaria gaver pensà: ‘Moabe l’è el me paese. Là ghen’è la me fameia, lori i va tender de mi. Tuti là i ga i medèsimi costumi che mi e i parla la me léngua.’ Quando le rivesse in Belen, Noemi no la podaria dar tuto questo a ela e gnanca a Orpa. Ela la gavea paura che no la saria bona de darghe una fameia o catarghe un omo par maridarle. Par quela, Orpa la ze tornada ala so fameia e ala so adorassion, e Noemi la ghe ga dito a Rute de far compagno. — Rute 1:9-15
Sentinela 02/16 pàg. 14 paràg. 6
Fà compagno i amighi de Geovà
6 Fursi, Rute la gavea imparà sora Geovà col so omo o con Noemi. Rute la savea che Geovà l’era difarente dei dèi de Moabe, Lu el meritea el so amor e la so adorassion. Alora, la ga fato una sàbia dessision. Rute la ga dito a Noemi: “El to pòpolo el sarà el me pòpolo e el to Dio el me Dio.” (Rute 1:16) L’è tanto bel leder sora el amor de Rute par Noemi. Ma ancora pi bel l’era el amor de Rute par Geovà. Boaz el ga visto questo e el ga dito che Rute la era ndata in serca de protession soto le ale de Geovà, cossita come un oseleto el fà. (Ledi Rute 2:12; Sal. 36:7; 91:1-4) Geovà l’è deventà come un pare par Rute. Lu el ga ricompensà la so fede, e ela no la se ga mai ciamà grama dela so dessision de servirlo.
Va in serca de lession pressiose dela Bìblia
Sentinela 01/03/05 pàg. 27 paràg. 2
Punti interessanti del libro de Rute
Rute 1:13, 21 — Sarà che Geovà el ga fato la vita de Noemi deventar amara e ghe ga causà desgràssie? Nò e Noemi la ga mai dito questo. In quel tempo, l’era una benedission gaver fioi. Alora, se disea che una persona che no la gavea fioi la era stata maledida. I due fioi de Noemi i era morti, e ela no la gavea neti. Stesso cossita, Noemi no la ga mai acusà Geovà de farghe qualche mal. Ma la pensea che Geovà el gavea qualcossa contra ela. Par quela, la se sentia tanto disgustada e triste. Fursi la catea che Geovà l’era drio umiliarla.
31 DE GENARO–6 DE FEBRARO
LESSION PRESSIOSE DELA BÌBLIA ǀ RUTE 3-4
“Come che te pol far un bon nome?”
Sentinela 01/10/12 pàg. 22 paràg. 5
“Una brava dona”
Rute la ze restada pi calma quando Boaz el ga parlà con ela, parché lu l’era un omo pròpio bondoso. Boaz el ga visto che Rute la podaria esser ndata in serca de un omo pi gióveno, fusse sior o poareto, parché anca ela la era gióvena. Invesse, la se ga preocupà cola so sogra Noemi e col nome dela fameia del so sogro che l’era belche morto. Par quela che Boaz l’è restà maraveià de veder che quela dona gióvena la se preocupea de pi coi altri che con ela stessa.
Sentinela 01/10/12 pàg. 23 paràg. 1
“Una brava dona”
Rute la ze stata pròpio contenta quando Boaz el ga dito che la era cognossesta come una brava dona. Le persone la cognossea cossita parché ela la gavea voia de cognosser a Geovà e de servirlo. Rute anca la ga mostrà che la se importea con Noemi e la ze stata bondosa con ela e col so pòpolo. De volentiera, la ga càmbia par far de acordo coi costumi che vanti ela no la gavea. Se femo compagno ala fede de Rute, ndaremo rispetar le persone e i so costumi e cossita, faremo un bon nome par noantri.
Sentinela 01/10/12 pàg. 24 paràg. 3
“Una brava dona”
Boaz el se ga maridà con Rute e la Bìblia la dise che “Geovà el ga assà che la restesse gràvida e la gavesse un fiol”. Par quela, le done dela cità de Belen le ga lodà Rute e la ga benedia. Lore le ga dito che ela la era meio che sete fioi par Noemi. Dela fameia de Rute l’è vegnesto el grando rè Davi. (Rute 4:11-22) Pi tardi, Gesù Cristo l’è vegnesto dela fameia de Davi. — Mat. 1:1
Va in serca de lession pressiose dela Bìblia
Sentinela 01/03/05 pàg. 29 paràg. 3
Punti interessanti del libro de Rute
Rute 4:6 — Come che qualchedun el podaria rovinar la so eransa se el fesse el risgate? El primo motivo l’è che, de acordo cola Lege, se qualchedun deventesse poareto el podaria vender la so eransa de tera e, quel che la compresse, deventaria risgatador. El prèssio dela tera saria de acordo con quanti ani ancora ghen’era fin el Ano dela Libertà. (Levìtico 25:25-27) Par quela, el so capital el gavaria manco valor. Nantro motivo l’è che, se Rute la gavesse un fiol, lu el ndaria ereditar la tera invesse del parente pi pròssimo del resgatador.
7-13 DE FEBRARO
LESSION PRESSIOSE DELA BÌBLIA ǀ 1 SAMUEL 1-2
“Contaghe a Geovà tuto quel che te senti”
Imite pàg. 55 paràg. 12
Ana la ga contà a Geovà tuto quel che la sentia
12 Ana la ze stata un bel esémpio par noantri de come pregar a Geovà. Geovà el vol che i so adoradori i ghe conte a lu tuto quel che i sente e i so pensieri, compagno un fiol el fà con so pare che lo ama tanto. (Ledi Salmo 62:8; 1 Tessalonissensi 5:17.) Geovà el ga motivà el apòstolo Piero a scriver nela Bìblia: “Buté sora de lu tute le vostre preocupassion, parché lu el tende de valtri.” — 1 Pie. 5:7
Sentinela 15/03/07 pàg. 16 paràg. 4
Ana la ze restada in pace
Cossa che podemo imparar de questo? Quando parlemo con Geovà in orassion, noantri podemo parlarghe sora i nostri pensieri, come se sentimo e anca domandarghe quel che ne ocore. Se no ghen’è pi gnente che podemo far par risolver el problema, ghemo de assar che Geovà el tenda del assunto. Questa la ze la meio roba de far. — Pro. 3:5, 6
Va in serca de lession pressiose dela Bìblia
Sentinela 15/03/05 pàg. 21 paràg. 5
Punti interessanti del libro de 1 Samuel
Primo Samuel 2:10 — Parché che Ana la ga pregà a Geovà che el ghe desse poder al so rè se in quel tempo no ghen’era rè in Israel? Ana la era drio pregar sora un futuro rè che ghen saria in Israel. La Lege Mosaica la parlea che un omo el saria rè in Israel nel futuro. (Deu. 17:14-18) Vanti de morir, Giacò el ga fato una professia: “El setro no’l se slontanarà de Giudà”, o sia, ghen saria un rè in Giudà. (Gén. 49:10) E Geovà el ga dito che intrà i dissendenti de Sara, o sia i israeliti, ghen saria rè. — Gén. 17:16
14-20 DE FEBRARO
LESSION PRESSIOSE DELA BÌBLIA ǀ 1 SAMUEL 3-5
“Geovà el se preocupa coi nostri sentimenti”
Sentinela 09/18 pàg. 24 paràg. 3
El Tuto Poderoso el capisse i nostri sentimenti
3 Samuel l’era ben gióveno quando el ga scominsià a laorar nel tabernàcolo. (1 Sam. 3:1) Una note, lu l’era drio dormir e ga sucedesto una roba strània, una voce lo ciamea. (Ledi 1 Samuel 3:2-10.) Lu el ga pensà che l’era Eli. Alora, el ga coresto fin lu e el ghe ga domandà: “Son qua. Vu me gavé ciamà?” Eli el ghe ga dito de nò. Ma questo ga sucedesto ancora due volte fin che Eli el se ga nicorto che l’era Geovà che el ciamea Samuel. Alora, Eli ghe ga insegnà come risponder e Samuel lo ga obedio.
Sentinela 09/18 pàg. 24 paràg. 4
El Tuto Poderoso el capisse i nostri sentimenti
4 Ledi 1 Samuel 3:11-18. La Lege Mosaica la disea che se gavea de rispetar una persona pi vècia, ancora de pi se la gavesse responsabilità sora el pòpolo. (Éso. 22:28; Lev. 19:32) Alora, no’l saria stà fàcile par Samuel parlar a Eli quel messàgio. La Bìblia la dise che Samuel el gavea paura de contarghe a Eli sora la vision che el ga bio. Par quela, Geovà el ga fato Eli capir che Lu el gavea parlà con Samuel. Alora, Eli el ga dito a Samuel de contarghe tuto quel che gavea sucedesto e no sconderghe gnente. Cossita, Samuel el ghe ga contà tuto.
Va in serca de lession pressiose dela Bìblia
Sentinela 15/03/05 pàg. 21 paràg. 6
Punti interessanti del libro de 1 Samuel
Primo Samuel 3:3 — Sarà che Samuel el dormia nel Santìssimo? Nò, parché quando la Bìblia la dise “ndove ghen’era la arca de Dio” vol dir el posto intorno el tabernàcolo. Nantro motivo l’è che Samuel l’era levita dela fameia de Coate, alora, no l’era mia un sasserdote. (1 Cró. 6:33-38) Par quela, lu no’l podaria ndar rento el Santìssimo e gnanca “veder le robe sacre”. (Nùm. 4:17-20) La ùnica parte del tabernàcolo che Samuel el podea ndar l’era el cortivo. Fursi lu e anca Eli i dormia in qualche posto rento el cortivo.
21-27 DE FEBRARO
LESSION PRESSIOSE DELA BÌBLIA ǀ 1 SAMUEL 6-8
“Chi che l’è el to rè?”
Perspicaz vol. 2 pàg. 813 paràg. 1
Regno de Dio
I israeliti i ga domandà che un omo el fusse el so rè. I israeliti i ga fato un grando dispeto contra Dio quando i ga domandà che un omo el fusse el so rè invesse de Geovà. (1 Sam. 8:4-8) Intorno de 800 ani dopo che Geovà el gavea fato un acordo con Abraon e 400 ani dopo che i israeliti i era ndati via del Egito, lori i ga domandà che un rè li governesse, compagno le altre nassion. Ancora che i israeliti i savesse che Dio ndaria far un Regno in Israel, Geovà no’l ghe gavea gnancora contà el “sacro segreto” sora el so Regno. Lori no i savea come saria questo Regno, se saria nel cielo o nela tera, gnanca chi che ndaria far parte de questo Regno e quando el ndaria scominsiar. Par quela, l’è stato un grando dispeto contra Geovà.
Sentinela 01/01/11 pàg. 27 paràg. 2
Lu el ga perseverà anca con dificoltà
I israeliti i ga rigetà el Dio Tuto Poderoso come rè, e questo l’è stà un grando dispeto. Geovà el ga dito a Samuel che avisesse el pòpolo che lori i ndaria sofrir se un omo el fusse el so rè. Ancora cossita, el pòpolo el ga dito: “Volemo che un omo el ne governe.” Alora, Samuel l’è stato obediente e el ga untà el rè che Geovà el gavea scoliesto. — 1 Sam. 8:7-19
Sentinela 15/01/10 pàg. 30 paràg. 9
La maniera de Geovà governar la ze la meio che ghen’è!
9 Ga sucedesto pròpio come Geovà el gavea dito. Dopo che i ga domandà che un omo el fusse el so rè, i israeliti i ga sofrio tanto, ancora de pi quando questo rè l’era infedele a Geovà. Compagno ga sucedesto con Israel, fin ancoi tuti i governi dele persone che no le cognosse a Geovà no i ze mia boni de finir fora coi problemi. Arquanti governanti i domanda le benedission de Dio par portar pace e sicuressa al pòpolo. Ma Dio mai ndarà benedir quei che no i obedisse la so maniera de governar. — Sal. 2:10-12
Va in serca de lession pressiose dela Bìblia
Sentinela 01/04/02 pàg. 12 paràg. 13
Parché batesarse?
13 La persona la toca cambiar de vita vanti de esser batesada come una Testimònia de Geovà. Questo cambiamento el ga de esser de volentiera. La persona la ga de dessider nel so cuor seghir a Cristo e no voler pi far quel che l’è sbalià. Invesse, la va in serca de Dio e la vol far quel che lu el dise che l’è giusto. (1 Rè 8:33, 34) Quando la persona la càmbia de vita, la ga de far òpere che le mostra che la se ga ciamà grama, o sia, fermarse de praticar la adorassion falsa, ma adorar sol a Dio e obedir ai so comandamenti. (Ati 26:20; Deu. 30:2, 8-10; 1 Sam. 7:3) Quando la persona la càmbia la so vita, la càmbia anca la so maniera de pensar, quel che la vol far nela so vita e anca la so maniera de comportarse. (Eze. 18:31) La persona la se ferma de far quel che l’è bruto e la fà quel che l’è bon, e cossita, la ga una nova personalità. — Ati 3:19; Efe. 4:20-24; Col. 3:5-14
28 DE FEBRARO–6 DE MARSO
LESSION PRESSIOSE DELA BÌBLIA ǀ 1 SAMUEL 9-11
“Saul l’era ùmile e modesto”
Sentinela 08/20 pàg. 10 paràg. 11
Geovà el ama le persone ùmile
11 Proa pensar in quel che ga sucedesto col rè Saul. Nel scomìnsio, lu l’era un gióveno ùmile. Saul el savea quel che l’era bon de far e quel che no l’era mia e lu el pensea che no’l saria bon de tender de ancora de pi responsabilità. (1 Sam. 9:21; 10:20-22) Ma, dopo che Saul l’è deventà rè, lu el ga scominsià a esser orgolioso. Una volta, Saul no l’è stà passiente e no’l ga volesto spetar el profeta Samuel. Invesse de fidarse che Geovà el ndaria giutar el pòpolo, Saul el ga fato un sacrifìssio che no’l gavea el dirito de far. Cossa che ga sucedesto dopo? Saul el ga perso la aprovassion de Geovà e l’è stà rigetà come rè. (1 Sam. 13:8-14) Cossa che imparemo col so esémpio? Volemo far tanto sforso par mai esser orgoliosi come Saul.
Sentinela 15/03/14 pàg. 9 paràg. 8
Come far par mostrar che se importemo coi altri?
8 Se pensemo massa in noantri stessi, no ndaremo far sacrifissi par i altri. L’è questo che ga sucedesto con Saul. Vanti de esser rè, lu no’l pensea massa in si stesso. (1 Sam. 9:21) Una volta, arquanti israeliti i ze ndati contra lu e el so governo. Ma ancora che el gavesse autorità parché Geovà lo gavea scoliesto come rè, Saul no li ga castigadi. Cossita, el ga mostrà che l’era ùmile. (1 Sam. 10:27) In nantra ocasion, Saul el ga acetà la orientassion de Geovà de ndar contra i amoniti e li ga vinsesti. Lu el ga mostrà che l’era ùmile parché el ga dito che sol l’è stà bon de far questo par causa de Geovà. — 1 Sam. 11:6, 11-13
Sentinela 15/12/95 pàg. 10 paràg. 1
I amoniti i ze ndati contra el pòpolo de Dio
Geovà l’è stà bon coi amoniti, ma lori i seitea ndar contra el so pòpolo. Alora, Geovà li ga castigadi. De acordo cola orientassion de Dio, Saul el ga ciapà 330.000 òmini, l’è ndato contra i amoniniti e li ga finidi fora. — 1 Samuel 11:6, 11
Va in serca de lession pressiose dela Bìblia
Sentinela 15/03/05 pàg. 22 paràg. 8
Punti interessanti del libro de Primo Samuel
Primo Samuel 9:9 — Cossa che podemo imparar de questo testo? Parché che l’è interessante la parte del testo che parla che “el profeta de ancoi una volta l’era ciamà vidente”? La parola “vidente” la ze stata cambiada par “profeta” parché nei giorni de Samuel e nela època dei rè de Israel, i profeti i ga scominsià a esser cada volta pi importanti. Samuel l’è stà el primo a esser ciamà de profeta. — Ati 3:24