STÙDIO 20
Cossa che el libro de Apocalisse el dise che sucederà coi nemighi de Dio?
‘Lori i ga riunio i rè nel posto che in ebraico se ciama Armagedon.’ — APO. 16:16.
CÀNTICO 150 Ndé in serca de Geovà par esser salvi
COSSA CHE NDAREMO IMPARAR?a
1. Cossa che Apocalisse el dise che ndaria suceder col pòpolo de Dio?
EL LIBRO de Apocalisse el parla che el Regno de Dio l’è drio governar nel cielo e che Sàtana l’è stà parà via qua ala Tera. (Apo. 12:1-9) Par quela che quei che i ze nel cielo i ze drio viver in pace, ma el pòpolo de Dio qua nela Tera l’è drio infrontar tanti problemi. Parché? Parché Sàtana l’è inrabià e el seita a vegner contra el pòpolo de Dio. — Apo. 12:12, 15, 17.
2. Cossa che ndarà giutarne a seitar leai a Geovà?
2 Come che podemo seitar leai a Geovà anca con quel che Sàtana l’è drio far? (Apo. 13:10) Una dele robe che pol giutarne l’è saver cossa ndarà suceder nel futuro. Nel libro de Apocalisse, el apòstolo Gioani el parla de arquante robe bone che le ndarà suceder. Par esémpio, i nemighi de Dio i sarà finidi fora. Ndemo veder cossa Apocalisse el dise sora questi nemighi e cossa ndarà suceder con lori.
LE BÈSTIE LE RAPRESENTA I NEMIGHI DE DIO
3. Quale che le ze arquante bèstie cative che Apocalisse el parla?
3 El primo versìcolo de Apocalisse el mostra che el apòstolo Gioani el ga parlà de maniera simbòlica arquante volte. (Apo. 1:1) Lu el ga doperà bèstie cative par parlar dei nemighi de Dio. Par esémpio, una dele bèstie cative che el ga parlà la ‘vien su del mar’ e la ga ‘diese corni e sete teste’. (Apo. 13:1) Dopo, una bèstia cativa la ‘vien su dela tera’, e ‘la parla come un dragon’ e la fà vegner do fogo del cielo. (Apo. 13:11-13) Alora, vien una bèstia cativa de ‘color scarlate’ e ghen’è una prostituta sentada sora questa bèstia. Queste tre bèstie le rapresenta i nemighi de Dio che i ze drio vegner contra lu e el so Regno fà tanto tempo. Sicuro che l’è tanto importante saver chi che le rapresenta queste bèstie. — Apo. 17:1, 3.
QUATRO BÈSTIE TANTO GRANDE
Lore le vien fora del mar. (Dan. 7:1-8, 15-17) Lore le ze i governi poderosi del tempo de Daniel avanti. Questi governi i ga perseghio el pòpolo de Dio o el pòpolo de Dio el ga vivesto soto la so autorità (Vedi i paràgrafi 4 e 7.)
4-5. Come che Daniel 7:15-17 ne giuta a capir chi che rapresenta le bèstie cative de Apocalisse?
4 Ghemo de capir chi che rapresenta le bèstie cative e la prostituta par saver chi che i ze i nemighi de Dio. E la meio maniera de saver chi che le rapresenta l’è assar che la Bìblia la ne giute a capirlo. Come che podemo farlo? Podemo studiar altri libri dela Bìblia che i parla de queste bèstie. Par esémpio, el profeta Daniel el se ga insognà con quatro bèstie che le era tanto grande e che le vegnea fora del mar. (Dan. 7:1-3) Daniel el parla che queste quatro bèstie le rapresenta quatro rè o governi. (Ledi Daniel 7:15-17.b) Cossita capimo che anca le bèstie cative de Apocalisse le rapresenta governi.
5 Adesso, ndaremo imparar sora arquante bèstie che ghen’è in Apocalisse e come che la Bìblia la ne giuta a capir de pi sora lore. Prima, ndaremo capir chi che lore le rapresenta, e dopo, cossa che ndarà suceder con lore. Ndaremo anca veder parché che l’è importante imparar de pi sora questo.
CHI CHE I ZE I NEMIGHI DE DIO?
LA BÈSTIA CATIVA CON SETE TESTE
La ‘vien su del mar’ e la ga sete teste, diese corni e diese corone. (Apo. 13:1-4) La ze tuti i governi fin ancoi. Le sete teste le ze i sete governi poderosi. Questi governi i ga perseghio el pòpolo de Dio o el pòpolo de Dio el ga vivesto soto la so autorità (Vedi i paràgrafi 6 a 8.)
6. Cossa che rapresenta la bèstia che la ga sete teste de Apocalisse 13:1-4?
6 Chi che la ze la bèstia cativa de sete teste? (Ledi Apocalisse 13:1-4.c) Questa bèstia la ze come un leopardo, ma la ga pié come che de un orso, boca de leon e diese corni. Nel capìtolo 7 del libro de Daniel, ghen’è quatro bèstie cative e cada bèstia la ga una de queste robe. Ma nel libro de Apocalisse, queste quatro robe le ze nte una bèstia sol. El libro de Apocalisse anca el dise che questa bèstia cativa la ga la autorità sora ‘tute le tribo, pòpoli, léngue e nassion’. (Apo. 13:7) Par quela che la ga de pi poder che un governo sol. Alora, la bèstia che la ga sete teste la rapresenta tuti governi fin ancoi. — Ecl. 8:9.d
7. Chi che le rapresenta le sete teste?
7 Cossa che cada una dele sete teste dela bèstia cativa le rapresenta? El capìtolo 17 de Apocalisse el ne giuta a saver chi che ze questa bèstia parché el parla dela bèstia del capìtolo 13. Apocalisse 17:10 dise: “E ghen’è sete rè: sinque i ze cascadi, un l’è, e el altro ancora no’l è rivà, ma, quando el rivará, el durarà par poco tempo.” Alora, le sete teste le rapresenta sete governi che i ga bio tanto poder. Tanti servi de Geovà i ga vivesto soto questi governi o i ze stati perseghidi par lori. Nela època del apòstolo Gioani, el Egito, Assìria, Babilònia, Medo-Persa e Grècia i gavea belche governà, e Roma l’era ancora drio governar. Ma chi che saria el sètimo e ùltimo governo, o testa?
8. Chi che la ze la sètima testa dela bèstia cativa?
8 Le professie del libro de Daniel le ne giuta a capir chi che la ze la sètima testa dela bèstia. Questa testa la ze drio governar nel tempo del fin, o sia, nel “giorno del Signor”. (Apo. 1:10) Ma chi che la ze? El Regno Unido e i Stati Unidi, che i ze due governi poderosi che i laora insieme. Lori i ze la Potensa Mondial Anglo-Americana. Alora, capimo che questa la ze la sètima testa dela bèstia de Apocalisse 13:1-4.
LA BÈSTIA CATIVA CHE LA GA DUE CORNI DE UN PIEGORETO
La ‘vien su dela tera’ e la parla “come un dragon”. La fà grandi segnai, vegner do fogo del cielo e la ze anca el “falso profeta”. (Apo. 13:11-15; 16:13; 19:20) Questa bèstia de due corni, o sia, la Potensa Mondial Anglo-Americana, la ze el falso profeta parché la imbroia le persone e la ghe dise de far una imàgine dela bèstia cativa de sete teste e diese corni (Vedi el paràgrafo 9.)
9. Chi che rapresenta la bèstia con due corni de piegoreto?
9 El capìtolo 13 de Apocalisse el parla che la sètima testa, o sia, la Potensa Mondial Anglo-Americana la ze rapresentada anca par una bèstia con due corni de piegoreto. Questa bèstia la ‘parla come un dragon, la fà grandi segnai e la fà vegner do fogo del cielo’. (Apo. 13:11-15) I capìtoli 16 e 19 de Apocalisse i dise che questa bèstia la ze anca el ‘falso profeta’. (Apo. 16:13; 19:20) Daniel anca el dise che la Potensa Mondial Anglo-Americana la ndaria far una bruta destrussion. (Dan. 8:19, 23, 24) E questo ga pròpio sucedesto nela Seconda Guera Mondial. Sientisti dei Stati Unidi e Regno Unido i ga laorà insieme e i ga molà due bombe nel Giapon. Cossita, la Potensa Mondial Anglo-Americana la ga fato ‘vegner do fogo del cielo’.
LA BÈSTIA CATIVA DE COLOR SCARLATE
La ze anca el otavo rè. Ghen’è una prostituta, che la ga nome Babilònia, la Granda, sentada sora questa bèstia. (Apo. 17:3-6, 8, 11) La prostituta la comanda la bèstia cativa. Ma dopo, la bèstia la copa la prostituta. La prostituta la ze tute le religion false. La bèstia la ze le Nassion Unide che le giuta tuti i governi del mondo (Vedi i paràgrafi 10, 14 a 17.)
10. Chi che rapresenta la bèstia color de scarlate? (Apocalisse 13:14, 15; 17:3, 8, 11)
10 Adesso, ndemo veder nantra bèstia. Ela la ze come la bèstia de sete teste, ma la ze de color scarlate, o sia, un rosso forte. El libro de Apocalisse el dise che la ze ‘la imàgine dela bèstia cativa’ e el ‘otavo rè’. Gioani el ga dito che questo rè el ndaria vegner, che el saria finio fora, ma che el tornaria. Ma chi l’è questo rè o questa bèstia? La Organisassion dele Nassion Unide che la laora par giutar i governi del mondo. Nel scomìnsio, ela la gavea nome de Liga dele Nassion. Alora, nela Seconda Guera Mondial, la ze stata finida fora. E dopo, la ze vegnesta nantra volta col nome de Nassion Unide.e (Ledi Apocalisse 13:14, 15;f 17:3,g 8,h 11.i)
11. (a) Cossa che le bèstie cative le ndaria far? (b) Parché che no ne ocore gaver paura?
11 Queste bèstie cative, o governi, le ndaria far che le persone le fusse contra Geovà e contra i so servi. Gioani el ga dito che queste bèstie le ndaria meter insieme i rè de tuta la Tera par la guera del Armagedon, che l’è el grando giorno de Dio. (Apo. 16:13, 14, 16) Ma no ne ocore gaver paura de quel che ndarà suceder in questa guera. Geovà, el Dio Tuto Poderoso, el ndarà far presto qualcossa par salvar tuti quei che i ze leai al so Regno. — Eze. 38:21-23.
12. Cossa che ndarà suceder con tute le bèstie cative?
12 Cossa che ndarà suceder con tute le bèstie cative? Apocalisse 19:20 el risponde: “La bèstia cativa la ze stata ciapada, e el falso profeta insieme. El falso profeta el fea segnai davanti dela bèstia cativa; con questi segnai el imbroiea quei che i gavea ricevesto la marca dela bèstia cativa e quei che i adorea la so imàgine. Tuti i due i ze stati butadi ancora vivi nel lago de fogo ndove che el sùlfaro el brusa.” Alora, questi governi i sarà finidi fora par sempre intanto che i sarà ancora drio governar.
13. Parché che pol esser fadiga seitar leai a Geovà e al so Regno?
13 Cossa che ghemo de far? Come servi de Geovà, ghemo de seitar a esser leai a lu e al so Regno. (Gioani 18:36) Par quela, ghemo de seitar neutri e no far gnente che sìpia dela polìtica de questo mondo. Ma dele volte, l’è tanto fadiga farlo. Parché? Parché i governi de questo mondo i vol che mostremo par meso de quel che femo e parlemo che semo leai a lori del tuto. Ma quei che i ze leai a questi governi i riceve la marca dela bèstia cativa. (Apo. 13:16, 17) Cossa sucede con quei che i riceve questa marca? Lori no i ga pi la aprovassion de Geovà e no i ga pi la speransa de viver par sempre. (Apo. 14:9, 10; 20:4) Alora, volemo sempre mostrar che semo leai del tuto a Dio e al so Regno.
LA GRANDA PROSTITUTA LA SARÀ FINIDA FORA
14. De acordo con Apocalisse 17:3-5, cossa che Gioani el ga visto?
14 El apòstolo Gioani l’è restà tanto spaurà con quel che el ga visto dopo. Lu el ga visto una dona sentada nte una dele bèstie. (Apo. 17:1, 2, 6) Questa dona la ze la granda prostituta, che la ga nome “Babilònia, la Granda”. Ela la fà imoralità sessual coi “rè dela tera”. — Ledi Apocalisse 17:3-5.j
15-16. Chi che rapresenta “Babilònia, la Granda,” e come che lo savemo?
15 Chi che la ze “Babilònia, la Granda”? Ela no la pol esser un governo parché Apocalisse dise che la fà imoralità coi governanti de questo mondo. (Apo. 18:9) Noantri anca capimo che no la ze un governo parché la ze sentada nela bèstia, o sia, la proa comandar questi governanti. No podemo gnanca dir che la ze el comèrsio del mondo de Sàtana parché el libro de Apocalisse el parla che lu l’è i “comersianti dela tera”. — Apo. 18:11, 15, 16.
16 La Bìblia la dopera le parole puri e vèrgine par parlar dele persone che le serve a Geovà. Ma la dopera la parola prostituta par parlar de quei che i dise che i serve a Dio, ma che i adora altri dèi o par parlar de quei che i deventa amighi del mondo. (2 Cor. 11:2; Apo. 14:4; 1 Cró. 5:25; Tiago 4:4) E parché che Apocalisse dise che questa dona la ga nome Babilònia, la Granda? Babilònia la era la cità che le persone le adorea a tanti dèi falsi. Alora, Babilònia, la Granda, la rapresenta tute le religion false. — Apo. 17:5, 18; Vedi el artìcolo “O que é Babilônia, a Grande?” nel site jw.org.
17. Cossa che ndarà suceder con Babilònia, la Granda?
17 Cossa che ndarà suceder con Babilònia, la Granda? Apocalisse 17:16, 17 risponde a questa domanda: “E i diese corni che te ghè visto e la bèstia cativa i odiarà la prostituta; i la assarà rovinada e nuda, i magnarà la so carne e i la brusarà del tuto nel fogo. Parché Dio el ga metesto nei cuori de lori la voia de realisar el so pensamento.” Alora, Geovà el ndarà far che le nassion le dopere la bèstia de color scarlate, o sia, le Nassion Unide, par finir fora cole religion false. — Apo. 18:21-24.
18. Come che podemo mostrar che adoremo a Geovà dela maniera giusta?
18 Cossa che ghemo de far? Ghemo de adorar a Dio dela maniera giusta e pura. (Tiago 1:27) Alora no volemo mai ndarghe drio a quel che le religion false le insegna, le so selebrassion, quel che le fà che vien dei demoni o qualche altre robe sbaliade. Ghemo anca de dir che le persone le vegna fora de Babilònia, la Granda, par no esser finide fora insieme con ela. — Apo. 18:4.
EL PEDO NEMIGO DE DIO EL SARÀ GIULGÀ
EL DRAGON COLOR DE FOGO
Sàtana el ga dato autorità ala bèstia cativa. (Apo. 12:3, 9, 13; 13:4; 20:2, 10) Sàtana, che l’è el pi grando nemigo de Geovà, el sarà butà nel abismo par 1.000 ani. Dopo, Sàtana el sarà butà nel “lago de fogo e sùlfaro” (Vedi i paràgrafi 19 e 20.)
19. Chi che l’è el dragon color de fogo?
19 El libro de Apocalisse anca el parla de un grando dragon color de fogo. (Apo. 12:3) Questo dragon el ga lotà contra Gesù e i so àngeli, el vien contra el pòpolo de Dio e el dà poder ale bèstie, o sia, i governi. (Apo. 12:7-9, 17; 13:4) Chi che l’è el dragon? L’è la ‘serpente original, che l’è el Diaol, o Sàtana’. (Apo. 12:9; 20:2) L’è lu che el comanda tuti i nemighi de Geovà.
20. Cossa che ndarà suceder col dragon?
20 Cossa che ndarà suceder col dragon? Apocalisse 20:1-3 dise che un àngelo el butarà Sàtana nel abismo, che l’è come una preson. Nel abismo, Sàtana ‘no’l imbroiarà pi le nassion fin el fin dei mila ani’. Alora, Sàtana e i so demoni i sarà butadi nel lago de fogo e sùlfaro, o sia, lori i sarà finidi fora par sempre. (Apo. 20:10) Che bel sarà viver sensa Sàtana e i so demoni!
21. Parché che restemo contenti de capir quel che dise el libro de Apocalisse?
21 L’è tanto bel capir quel che dise el libro de Apocalisse. Apocalisse 1:3 dise: “Felice l’è quel che el lede cola voce alta le parole de questa professia e felici i ze quei che i scolta.” In questo stùdio, ghemo imparà chi che i ze i nemighi de Dio e cossa che ndarà suceder con lori. Ma dopo che i nemighi de Dio i sarà finidi fora, che benedission i servi fedeli de Dio i ndarà ricever? Vederemo la risposta a questa domanda nel pròssimo stùdio.
CÀNTICO 22 Che vegna el Regno de Dio!
a El libro de Apocalisse el parla de arquante bèstie par rapresentar i nemighi de Dio. E el libro de Daniel el ne giuta a capir chi che le ze queste bèstie. In questo stùdio, ndaremo imparar de pi sora queste bèstie nele professie del libro de Daniel e de Apocalisse. E questo ndarà giutarne a saver chi che i ze i nemighi de Dio e cossa ndarà suceder con lori.
b (Daniel 7:15-17) “Ma mi, Daniel, son restà tanto ansioso parché le robe che go visto le me ga spaurà. 16 Son ndà darente de un dei àngeli che i era lì in pié, e ghe go domandà cossa quele robe le volea dir del bon. Alora, lu el me ga rispondesto e el me ga spiegà cossa che ghe volea dir. Lu el ga dito: 17 “‘Le quatro bèstie tanto grande che te ghè visto le ze quatro rè che i governarà la tera.
c (Apocalisse 13:1-4) E el dragon l’è restà nela areia del mar. Alora go visto una bèstia cativa vegner su del mar, con diese corni e sete teste, e nei so corni ghen’era diese corone, ma nela so testa ghen’era nomi che i insultea a Dio. 2 La bèstia cativa che go visto la era compagna a un leopardo, ma i so pié i era come quei de un orso, e la so boca la era come la boca de un leon. La bèstia cativa la ga ricevesto del dragon el so poder, el so trono e la granda autorità. 3 Go visto che i ghe ga fato mal a una dele so teste e parea che no la ndaria ricuperarse, ma dopo la ze stata guarida. Tute le persone dela tera le ndea drio ala bèstia cativa e le era maraveiade. 4 Lore le adorea el dragon parché el gavea dato autorità ala bèstia cativa. Le persone le adorea ala bèstia cativa cossita: “No ghen’è nissuni compagno ala bèstia cativa! No ghen’è nissuni che pol lotar contra ela!”
d Podemo anca capir che la bèstia che la ga sete teste le rapresenta tuti i governi parché la ga diese corni. La Bìblia la dopera el nùmero diese par mostrar che la roba la ze completa.
e La imàgine dela bèstia no la ga le corone nei so corni come la prima bèstia. (Apo. 13:1) Parché che no la ga queste corone? Parché la ga bisogno del aiuto dei altri sete rè par gaver autorità e par far el so laoro. — Vedi el artìcolo “O que é a Fera cor de Escarlate de Apocalipse capítolo 17?” nel site jw.org.
f (Apocalisse 13:14, 15) Ela la ga ricevesto permission de far segnai davanti la bèstia cativa e cossita ela la imbroia le persone sora la tera. Ela la dise ale persone de far una imàgine dela bèstia cativa che la ga ciapà un colpo cola spada, ma la era ancora viva. 15 E i ghe ga permitio de dar vita ala imàgine dela bèstia cativa, parché la imàgine dela bèstia cativa la parlesse e la fesse copar tuti quei che i se ricusea de adorar la imàgine dela bèstia cativa.
g (Apocalisse 17:3) Alora el me ga menà par meso del spìrito nte un deserto. E go visto una dona sentada sora una bèstia cativa de color scarlate, che la era piena de nomi che i insultea a Dio e la gavea sete teste e diese corni.
h (Apocalisse 17:8) La bèstia cativa che te ghè visto la era ma no la ze, ma la ze drio vegner su del abismo e la sarà finida fora. E quei che i ze de star nela tera (quei che fin del scomìnsio del mondo no i ga i so nomi scriti nel rolo dela vita) i restarà spauradi quando che i vederà che la bèstia cativa la era ma no la ze, ma la tornarà a esser presente.
i (Apocalisse 17:11) E la bèstia cativa che la era ma no la ze, la ze anca el otavo rè, ma la vien dei sete, e la sarà finida fora.
j (Apocalisse 17:3-5) Alora el me ga menà par meso del spìrito nte un deserto. E go visto una dona sentada sora una bèstia cativa de color scarlate, che la era piena de nomi che i insultea a Dio e la gavea sete teste e diese corni. 4 La dona la era vestida de color viola e scarlate e la doperea oro, sassi pressiosi e pèrole; nela man la gavea un càlisse de oro pien de robe sporche e de robe impure dela so imoralità sessual. 5 E nel so viso ghen’era scrito un nome, un mistero: “Babilónia, la Granda, la mare dele prostitute e dele robe sporche dela tera.”