LESSION 10
Come che le riunion dele Testimònie de Geovà le pol giutarte?
Te sì belche ndato a una riunion dele Testimònie de Geovà? Fursi te resti ansioso sol de pensar sora questo o te te domandi: ‘Come che le ze le riunion? Parché che le ze importante? Parché che saria importante che mi ndesse?’ In questa lession, te vè imparar sora come che le riunion le pol giutarte a viver meio e a esser pi amigo de Dio.
1. Parché che le Testimònie de Geovà le va ale riunion?
Un scritor dela Bìblia el ga dito che el ndaria lodar a Dio insieme con altre persone. (Salmo 26:12) Alora, ndemo ale riunion par adorar a Dio. Le Testimònie de Geovà de tuto el mondo le resta tanto contente de ndar ale riunion tute le stimane par lodar, cantar e pregar a Dio. E arquante volte nel ano, lore le fà questo in riunion pi grande.
2. Cossa che te ndarè imparar nele riunion?
Nele riunion, noantri ledemo e studiemo la Bìblia. (Ledi Neemia 8:8.) Te ndarè anca imparar de pi sora Geovà e so bele qualità. Par esémpio, te ndarè imparar tanto sora el amor de Geovà e questo te giutarà a esser pi amigo de lu. Te vè anca imparar come che Geovà el pol giutarte a gaver una vita pi felice. — Isaia 48:17, 18.
3. Nele riunion te ndarè cognosser tante persone. Parché che questo sarà bon par ti?
Geovà el ga dito che ghemo de preocuparse un colaltro par mostrar amor e a far bone robe par i altri, no assando mai de riunirse. (Ebrei 10:24, 25) Nele riunion, te ndarè cognosser persone che le se preocupa una col’altra e che le vol imparar de pi sora Dio come ti. Tuto quel che te ndarè scoltar ndarà giutarte a gaver una fede pi forte. (Ledi Romani 1:11, 12.) Te vè cognosser tante persone che le ze contente anca se le infronta dificoltà. Par quela che Geovà el vol che noantri se riunimo!
IMPARA DE PI!
Come che le ze le riunion dele Testimònie de Geovà? Parché che saria importante che ti te ndessi ale riunion?
4. Come che le ze le riunion dele Testimònie de Geovà?
Nel tempo dei apòstoli, quei che i ndea drio a Gesù sempre i se riunia par adorar a Geovà. (Romani 16:3-5) Ledé Colossensi 3:16, e dopo, parlé sora questo:
Quei che ndea drio a Gesù i adorea a Geovà. Come?
Ancoi, anca le Testimònie de Geovà le se riune par adorar a Dio. Par saver come che le ze le riunion, vardé el VÌDEO. Dopo, vardé la ilustrassion che mostra una riunion e parlé sora:
Pénsito che nele nostre riunion sucede quel che dise in Colossensi 3:16? Parché?
Che altre robe te ga piasesto nel vìdeo o nela ilustrassion?
Ledé 2 Corinti 9:7, e dopo, parlé sora questo:
Parché che no se tor su limòsina nele riunion dele Testimònie de Geovà?
Varda quel che sarà studià nela pròssima riunion insieme cola persona che stùdia la Bìblia con ti.
Cossa che te piaserà de pi o che fursi ndarà giutarte?
Seto questo?
Te pol catar el posto e la ora dele nostre riunion, che le ze fate in tuto el mondo, nel site jw.org.
Nele riunion, ghen’è discorsi, apresentassion de come parlar sora Geovà ai altri e vìdei. Nel scomìnsio e nel fin, noantri cantemo e preghemo a Dio
Le persone le pol alsar su la man e parlar qualcossa sora el assunto in arquante parte dele riunion
Tuti i ze ben ricevesti — òmini, done, i pi veci e anca i gióveni
No se tor su limòsina nele riunion dele Testimònie de Geovà
5. Sfòrsate par ndar ale riunion
Varda el esémpio dela fameia de Gesù. Tuti i ani, lori i viaiea de Nasarè fin Gerusalen par una riunion spessial. Lori i ghe metea tre giorni par far questo viaio, parché i gavea de caminar intorno de 100 chilòmetri e ghen’era tanti monti. Ledé Luca 2:39-42, e dopo, parlé sora questo:
Sarà che l’era fàcile ndar fin Gerusalen?
Parché che te ghè de sforsarte par ndar ale riunion?
Te cati che sarà bon par ti? Parché?
La Bìblia la mostra che l’è tanto importante star insieme coi altri par adorar a Dio. Ledé Ebrei 10:24, 25, e dopo, parlé sora questo:
Parché che ghemo de ndar sempre ale riunion?
FURSI TE GHÈ BELCHE SCOLTÀ: “No ghe toca ndar a qualche posto par pregar a Dio. Te pol leder la Bìblia anca casa.”
Che testo o esémpio dela Bìblia mostra cossa che Geovà el pensa sora questo?
COSSA CHE TE GHÈ IMPARÀ?
Nele riunion, te ndarè imparar de pi sora Geovà, la to amicìssia con lu la ndarà restar pi forte e te podarè adorarlo insieme coi altri.
Sito bon de ricordarte?
Parché che Geovà el vol che ndemo ale riunion?
Cossa che te ndarè imparar nele riunion?
De che nantra maniera le riunion le ndarà giutarte?
VUTO SAVER DE PI?
Fursi te resti un pochetin ansioso sol de pensar de ndar ale riunion. Varda cossa che ga sucedesto a un omo quando lu l’è ndato a una riunion.
Parché che ghe piasea a un gióveno ndar ale riunion? Cossa che lu el ga fato par seitar a ndar?
Varda cossa che altre persone le dise sora le riunion.
“Parché ndar ale riunion nel Salon del Regno?” (Varda nel jw.org)
Cognossi un omo che l’era cativo e el fea tante robe rugne. Come che una riunion lo ga giutà?
“Mi mai ndea fora sensa la me arma” (La Sentinela, 1 de lùlio de 2014)