Parché che l’è bon saver che Dio el te ama?

Dio el ne ga creà cola capassità de guarirse. Alora, quando se femo mal o se femo un taio, el nostro corpo el scomìnsia a laorar par fermar de vegner fora sangue e par guarirse.a

PENSAGHE SORA: Pol esser che sofrimo tanto e ghemo bruti sentimenti par causa dele robe che ne ga sucedesto nel passà o de quel che semo drio infrontar adesso. Ma Geovà el va come che guarirne, o sia, el ne giutarà a darghene fora con tuti questi sentimenti. La Bìblia la dise che Dio ‘el cura quei che i ga el cuor schissà e le so feride’. (Salmo 147:3) Pol esser che te sì drio sofrir tanto par causa de qualcossa che te ga sucedesto nel passà o dele dificoltà che te ghè. Alora, come che te pol esser sicuro che Geovà el ndarà giutarte adesso e nel futuro?

COSSA CHE LA BÌBLIA LA NE INSEGNA?

Dio el ne promete: “No stà gaver paura, parché mi son con ti. No stà mia preocuparte, parché mi son el to Dio. Vao darte forsa, si, vao giutarte.” (Isaia 41:10) Quando una persona la sa che Dio el se importa con ela, ela la se sente ben, in pace e la ga la forsa par lotar contra tute le dificoltà. El apòstolo Paolo el ga ciamà questa pace de “la pace de Dio, che la ze pi granda de quel che podemo capir”. Paolo anca el ga dito: “Par tute le robe go forsa gràssie a quel che el me dà poder.” — Filipensi 4:4-7, 9, 13.

La Bìblia la ne giuta a gaver fede nele promesse che Geovà el fà par el futuro. Par esémpio, Apocalisse 21:4, 5 parla cossa che Dio el ndarà far e parché che podemo fidarse in lu. Vedemo cossa che questo testo ne insegna.

• Geovà “el sugarà tute le làgrime” dele persone. Lu el finirà con tuto el nostro sofrimento e ansietà, e fin cole nostre preocupassion che no le ze tanto importante par i altri.

• El nostro Creador l’è ‘sentà nel so trono’ glorioso in cielo. Lu l’è el Rè Tuto Poderoso e el va doperar el so poder e la so autorità par finir fora col sofrimento e par giutarne.

• Geovà el dà la garansia che le so promesse le ze “fedele e vere”. Lu mai el faria una roba contra el so nome e la so reputassion come vero Dio. Par quela, podemo esser sicuri che lu el farà quel che el ga prometesto.

“‘Lu el sugarà tute le làgrime dei so oci, e no ghen sarà pi la morte, gnanca pi tristessa, gnanca piander, gnanca dolor. Le robe che ghen’era vanti no ghen’è pi.’ Quel che l’era sentà nel trono el ga dito: ‘Varda! Son drio far nove tute le robe.’ Lu anca el ga dito: ‘Scrivi, parché queste parole le ze fedele e vere.’” — Apocalisse 21:4, 5.

La creassion de Dio e la Bìblia ne giuta a cognosser meio el nostro Pare e le so qualità. Podemo dir che le robe che Dio el ga creà le mostra che lu el ga caro che lo cognossemo. Tute queste robe ne giuta a cognosserlo meio come a un caro amigo. La Bìblia la fà questo convite ben ciaro. Ela la dise: “Rivé darente de Dio e lu el rivarà darente de valtri.” (Tiago 4:8) E Ati 17:27 dise che Dio “no l’è distante de cada un de noantri”.

Se te te toghi el tempo par cognosser a Dio, te pol esser sicuro che ‘lu el tenderà de ti’. (1 Piero 5:7) Parché che l’è bon esser sicuro che Dio el te ama?

Scolta la stòria de Toru, del Giapon. La so mare la era cristiana, ma lu el se ga metesto in meso coi bandidi dela màfia giaponesa, la Yakuza. Lu el conta: “Mi pensea che Dio el me odiea. Ghen’era sempre qualchedun intorno de mi drio morir. Mi pensea che Dio l’era drio castigarme, ancora de pi se moria qualchedun che mi ghen volea ben.” Toru el ga dito che la so maniera de viver e de pensar lo ga fato deventar “un che no ghe importea de gnente e de nissuni” e conta anca una roba che el volea tanto: “Mi volea morir gióveno, ma sol dopo de copar una persona pi famosa de mi parché volea restar ben cognossesto.”

Dopo, lu e la so sposa i ga scominsià a studiar la Bìblia insieme. Col tempo, Toru el ga cambià del tuto la so maniera de viver e pensar. La so dona Laura la dise: “Go visto coi me oci tuti i cambiamenti che ga fato el me omo.” Toru el dise sicuro: “Ghen’è un Dio che el se importa con tuti noantri. Lu no’l vol che nissun mora. Invesse, el vol perdonar quei che i se ciama grami dei so sbali. Podemo anca contarghe dele robe che no podarissino dirghe a nissuni e che nissuni capiria. Ma Dio el ne scolta. Manca pròpio poco fin che Geovà el finissa con tuti i nostri problemi e sofrimento. E anca ancoi, lu el ne giuta de maniere che gnanca spetemo. Lu el ne vol ben e el ne giuta a darghene fora con bruti problemi.”— Salmo 136:23.

La stòria de Toru la ne insegna una roba importante. L’è tanto bel saver che Dio el pol finir con tuto el sofrimento e in poco tempo lo farà. Lu el sugarà tute le làgrime dei nostri oci. Alora, podemo esser sicuri che gavaremo un bel futuro e intanto podemo gaver una vita meio nei di de ancoi. Nte un mondo pien de sofrimento, saver che Dio el ne ama pol cambiarte la vita.

[Nota]