Suito Dio el ndarà finir col sofrimento

Abacuche, che l’era un omo bon del passà, el ga domandà a Dio: “Fin quando, ò Geovà, gavarò de osar par aiuto, ma no te scoltarè? Fin quando gavarò de domandar par salvarme dela violensa, ma no te ndarè far gnente?” (Abacuche 1:2, 3) Sarà che Abacuche l’era drio mostrar che el gavea poca fede? Nò! Lu l’era un amigo de Dio. E Dio el ghe gavea prometesto finir col sofrimento nela ora giusta. — Abacuche 2:2, 3.

Quando ti o qualchedun che te ami l’è drio sofrir, pol esser che te pensi che Dio l’è drio meterghe massa par far qualcossa. Ma la Bìblia la dise: “Geovà no’l tardiga par realisar la so promessa, come arquanti i pensa. Ma lu el mostra passiensa con valtri, parché no’l vol che gnanca un el sìpia destruto, ma el vol che tuti i se ciame grami.” — 2 Piero 3:9.

QUANDO CHE DIO EL FINIRÀ COL SOFRIMENTO?

Suito Dio el finirà con tuto el sofrimento che ghen’è. Come che lo savemo? Gesù el ga dito che un grupo de persone vederia quel che sucederia nei ùltimi giorni. (Mateo 24:3-42) E queste robe le ze drio suceder ancoi. Alora, manca poco tempo par Dio finir fora con tuti i problemi de questo mondo.a

Ma come che Dio el ndarà finir col sofrimento? Quel che Gesù el ga fato qua nela Tera ne giuta a saver come che Dio lo farà. Vedemo arquanti esempi.

Desgràssie dela naturesa: Una volta, Gesù l’era insieme dei so apòstoli nte un barco nela Galilea e ga scominsià un bruto temporal. Lori i ga pensà che el barco el ndaria sfondarse. Ma Gesù el ga mostrà che lu e so Pare i ga el poder sora la naturesa. (Colossensi 1:15, 16) Lu el ga dito: “Basta! Tasi!” Cossita, “el vento el se ga fermà e el mar l’è restà tranquilo”. — Marco 4:35-39.

Malatie: Quando l’era qua nela Tera, Gesù el ga curà quei che i era orbi, desgrassiadi, quei che i gavea lepra e tante altre malatie. Le persone le vegnea fin Gesù e lu el curea “tuti quei che i era maladi”. — Mateo 4:23, 24; 8:16; 11:2-5.

Fame: Par meso del poder de Dio, Gesù l’è stà bon de far un miràcolo quando el ga ciapà sol un poco de pan e de pessi e el ga dato de magnar a tanta gente. La Bìblia la parla de due volte che Gesù el ga dato de magnar a miliari de persone. — Mateo 14:14-21; 15:32-38.

Morte: La Bìblia la parla de al manco tre persone che Gesù el ga ressussità col poder de Dio. E una de queste persone la era morta fea quatro giorni. Queste ressuression le mostra che Dio el ga el poder de finir cola morte. — Marco 5:35-42; Luca 7:11-16; Gioani 11:3-44.