Elo de chi la colpa?

Se Dio no’l ga la colpa del sofrimento, parché che ghen’è tante guere, malatie, desgràssie dela naturesa e fame? La Parola de Dio la spiega parché che ghen’è tanto sofrimento. Ndemo veder cossa che la dise.

1. Tanti i sofre par causa dei altri. La Bìblia la dise che “le persone le sofre par causa del governo de altre persone”. (Eclesiasti 8:9) Ancoi, tanti i sofre parché semo imperfeti, parché le persone le pensa sol in lore stesse e parché le fà robe rugne ai altri.

2. Pol suceder robe che no spetemo. La Bíblia la dise che “a tuti pol suceder qualcossa rugna o che no i speta mia”. (Eclesiasti 9:11) Alora, pol esser che una persona la sofre par causa de un assidente o del sbàlio de qualchedun.

3. Sàtana, el Diaol, l’è el governante de questo mondo. La Bìblia la mostra che ghen’è tanto sofrimento ancoi parché “tuto el mondo l’è soto el poder del Perverso”. (1 Gioani 5:19) Questo “Perverso” l’è Sàtana, el Diaol. Lu l’era un àngelo de Dio, ma no’l ga volesto pi obedirghe. (Gioani 8:44) Tanti àngeli i ga dessidio far come Sàtana par ndar drio ale so voie, e i ze deventadi demoni. (Génesi 6:1-5) De lì avanti, Sàtana e i so demoni i ze drio far tante robe rugne suceder nel mondo. El Diaol el ga tanta ràbia, e “l’è drio imbroiar tute le persone dela tera”. Par quela, la Bìblia la dise: “Guai dela tera.” (Apocalisse 12:9, 12) Sicuro che Sàtana l’è un governante rugno e el resta contento de veder tanto sofrimento. Alora, l’è Sàtana che fà le persone sofrir, e nò Dio.

PENSAGHE SORA: Sol una persona tanto trista e che no la ama a nissun faria i altri sofrir. Ma la Bìblia la dise che “Dio l’è amor”. (1 Gioani 4:8) El amor l’è la qualità pi importante che Dio el ga. Par quela, podemo esser sicuri che “el vero Dio mai el fà robe rugne, el Tuto Poderoso mai el fà robe sbaliade!” — Giò 34:10.

Ma fursi te te domandi: ‘Fin quando Dio el assarà che Sàtana el governe questo mondo?’ Come ghemo visto, Dio el resta tanto disgustà de vederne sofrir. E la Bìblia la ne incoraia a ‘butar sora lu tute le nostre preocupassion, parché lu el tende de noantri’. (1 Piero 5:7) Dio el ne ama tanto e el ga el poder de finir fora con tute le robe rugne che ghen’è. Nel pròssimo artìcolo, ndaremo imparar de pi sora questa speransa che Dio el ne dà.a