Cossa che le persone le dise sora pregar?
“Quando mi prego, me par che Dio l’è qua dela me banda, drio tegnerme par la man e drio giutarme quando no sò cossa far.” — MARÍA.
“La me dona la ze morta dopo de lotar contra el càncaro par 13 ani. Me ricordo che mi preghea a Dio tuti i giorni. Mi ero bon de sentir che lu l’era pròpio drio scoltarme e el capia el me dolor. Mi me sentia in pace.” — RAÚL.
“La orassion la ze un bel presente de Dio par noantri.” — ARNE.
Par María, Raúl, Arne e tanti altri, la orassion la ze un presente pressioso. Lori i sente che quando i fà orassion i pol parlar con Dio, i pol ringrassiarlo e domandar el so aiuto. I crede de tuto el cuor in quel che la Bìblia la dise sora la orassion: “Noantri semo sicuri che, no importa cossa che ghe domandemo de acordo cola so volontà, Dio el ne scolta.” — 1 Gioani 5:14.
Ma tante persone le cata fadiga creder in quel che questo versìcolo el dise. Steve el ga dito sora quel che el pensea sora pregar: “Quando mi gavea 17 ani, tre dei me amighi i ze morti in due assidenti. Un l’è morto nte un assidente de auto e due amighe le se ga negà nel mar.” Cossa che Steve el ga fato? Lu el ga dito: “Mi go pregà a Dio par domandarghe parché che tute queste robe brute le era drio suceder, ma no go bio gnanca una risposta. Alora me go domandà: ‘Parché pregar?’” Tante persone, dopo de pregar e de no catar una risposta, le se ga domandà se val la pena seitar a pregar.
Ma no l’è sol par quela che tante persone le cata che no ghe ocore mia pregar. Arquante le dise che, se Dio el sa pròpio tuto, no ocore mia parlar con lu sora quel che ghemo de bisogno o sora i problemi che infrontemo.
Altri i cata che Dio no’l vol mia scoltar le so orassion par causa dei sbali che i ga fato nel passà. Jenny la spiega: “Par mi, el pedo l’è che mi me sento sensa valor. Me ciamo grama de tante robe che go fato nel passà, alora, mi penso che no mèrito che Dio el scolte le me orassion.”
E ti? Cossa che te cati sora la orassion? Se te ghè belche pensà come queste persone, te restarè contento de saver cossa che la Bìblia la dise sora questo assunto. Le risposte che la Bìblia la dà ale domande sora orassion le ze de fidarse.a Ela la pol giutarte a catar le risposte a queste domande:
Sarà che Dio el scolta pròpio le nostre orassion?
Parché che Dio no’l risponde a tute le orassion?
Cossa ghemo de far par Dio scoltar le nostre orassion?
Come che pregar pol giutarte?
a Nela Bìblia ghen’è tante orassion de servi fedeli de Dio, anca de Gesù Cristo. Le Scriture Ebraiche, che tanti i ciama de Vècio Testamento, le ga de pi de 150 orassion.