Come che te pol tornar a esser amigo de Geovà?

TUTI i ani, tanti che i ga abandonà a Geovà i torna ala so organisassion. Sicuro che Geovà, Gesù e i àngeli i resta tanto contenti quando cada un el torna! (Luc. 15:7, 10) Alora, se te sì tornà a esser una Testimònia de Geovà, lori i resta tanto contenti de vederte far questo. Ma te ndarè infrontar arquante dificoltà par tornar a esser amigo de Geovà. Che dificoltà le ze queste? Cossa pol giutarte a dàrghene fora con queste dificoltà?

CHE DIFICOLTÀ TE POL INFRONTAR?

Dopo che i torna a esser Testimònie de Geovà, arquanti i seita a sentir tanta colpa e vergogna. Fursi lori i se sente come el rè Davi che, anca dopo de esser perdonà, el sentia tanta colpa. (Sal. 40:12; 65:3) Par esémpio, varda cossa che Isabelle,a che la ga assà de esser Testimònia de Geovà par de pi de 20 ani, la ga dito: “L’era fadiga par mi creder che Geovà el me gavea perdonà.” Se te resti desanimà, te podarè perder nantra volta la to amicìssia con Geovà. (Pro. 24:10) Alora, no stà assar che questo suceda con ti.

Arquanti i pensa che no i sarà boni de far tuto quel che ghe ocore par tornar a esser amighi de Geovà. Par quela, lori no i fà tuto quel che i podaria par Geovà. Dopo che Antoine l’è tornà a esser Testimònia de Geovà, el ga dito: “Me parea che no savea pi come l’era esser una Testimònia de Geovà.”

Proa imaginar che una desgràssia la ga rovinà una casa. Quando el paron dela casa el vede quel che ga sucedesto, el resta desanimà sol de pensar nel tempo e nel laoro che el gavarà par farla su nantra volta. La medèsima roba la sucede cola persona che la ga fato un bruto pecato. Fursi la reste tanto preocupada par causa de tuto quel che la ga de far par tornar a esser amiga de Geovà. Se anca ti te sì preocupà, ricòrdate che te ghè aiuto par far questo.

Geovà el ne fà el convite: “Vegné e ndemo meter tuto a posto intrà de noantri.” (Isa. 1:18) Te ghè belche fato quel che dise el testo. Te te ghè sforsà tanto par far quel che te ocorea par gaver el perdon de Geovà. Par quela, lu el te ama tanto e el pol anca doperar el to esémpio par provar che Sàtana l’è un busier. — Pro. 27:11.

Adesso che te sì tornà ala congregassion, te sì drio sforsarte par esser cada volta pi amigo de Geovà e lu el promete far el medèsimo. (Tiago 4:8) Ma no stà restar contento sol de saver che i altri i ze drio veder che te sì tornà ala congregassion. Sfòrsate par far pi forte el to amor par Geovà, el to Pare e Amigo. Come che te pol farlo?

SFÒRSATE PAR FAR QUEL CHE TE SÌ BON

Sfòrsate par far quel che te sì bon. Ancora te te ricordi dele robe pi importante che la Bìblia la insegna e dele promesse de Geovà par el futuro. Ma adesso, te ghè de far tuto quel che te ocore par esser un servo de Geovà, come par esémpio, seitar a predicar, a ndar ale riunion e a star insieme coi fradei e sorele.

Prega sempre a Geovà. Pol esser che te fà fadiga pregar a Geovà parché te senti massa colpa. Ricòrdate che Geovà, el to Pare, el te capisse. (Rom. 8:26) Alora, seita a pregar a Geovà e parlaghe che te vol tanto esser so amigo. (Rom. 12:12) Andrej el se ricorda: “Mi sentia tanta colpa e gavea tanta vergogna, ma quando preghea a Geovà, me sentia tanto meio. Mi sentia pace.” Se no te sè cossa parlar a Geovà, proa studiar i Salmi 51 e 65, che i ga le orassion de Davi quando el se ga ciamà gramo.

Stùdia sempre la Bìblia. Cossita la to fede e el to amor par Geovà i restarà pi forti. (Sal. 19:7-11) Felipe el ga dito: “Mi go assà de esser amigo de Geovà e lo go disgustà parché me go fermà de leder e studiar sempre la Bìblia. Ma no volea far questo sbàlio nantra volta. Alora, go dessidio far sempre el me stùdio dela Bìblia.” Anca ti te pol far cossita. Se no te sè sora cossa studiar, domanda aiuto a un amigo che el ga una forte amicìssia con Geovà.

Torna a esser amigo dei fradei. Arquanti che i ze tornadi ala congregassion i ga paura che i fradei i sìpia cativi con lori. Larissa la ga dito: “Mi gavea tanta vergogna e pensea che gavea tradio i fradei dela congregassion. Mi me go sentio cossita par tanto tempo.” Te pol esser sicuro che i ansiani e i altri fradei i ze premosi de giutarte a tornar a gaver una amicìssia con Geovà. (Varda el quadro “Cossa i ansiani i pol far?”) Lori i resta tanto contenti de saver che te sì tornà a servir a Geovà e i vol che te sìpia felice! — Pro. 17:17.

Come che te pol tornar a esser amigo dei fradei? Va sempre ale riunion e ala predicassion. Come questo ndarà giutarte? Felix el ga dito: “I fradei i me amea e tuti i era premosi che mi tornesse. Tuti lori i me ga giutà a sentirme parte dela congregassion, a capir che Geovà el me gavea perdonà e che mi podea ndar avanti. — Varda el quadro “Cossa che te pol far?”.

NO STÀ MIA DESISTER!

Se te sì drio sforsarte par tornar a esser amigo de Geovà, sìpia sicuro che Sàtana el ndarà seitar a doperar le dificoltà par proar intrigarte de farlo. (Luc. 4:13) Te sarè bon de infrontar queste dificoltà se te fè pi forte la to fede adesso.

Geovà el ga prometesto: “Mi vao in serca de quela che la ze persa. Vao giutar a ritornar quela che la se ga ciapà indrio. Vao meter fasse in quela che la se ga fato mal. Vao giutar la fiaca a vegner pi forte.” (Eze. 34:16) Geovà el ga belche giutà tanti dei so servi a tornar a esser so amighi. Alora, te pol esser sicuro che el ndarà giutarte a gaver una amicìssia con lu nantra volta e a farla pi forte.

Cossa i ansiani i pol far?

I ansiani i pol giutar tanto quei che i ze tornadi ala congregassion a esser amighi de Geovà nantra volta. Varda cossa che i pol far.

Giùtali a esser sicuri che Geovà e i fradei li ama. El apòstolo Paolo el ga dito che una persona che la ga fato un bruto pecato fursi no la sìpia bona de dàrghene fora col desànimo. (2 Cor. 2:7) Tanti i se sente desanimadi e i ga vergogna. Par quela, Paolo el ga dito che i fradei i gavea de perdonarli con amor e darghe consolo. I fradei i ga de assarli sicuri che lori e Geovà li ama. I ansiani i ga de lodarli e giutarli in quel che lori i ga de bisogno.

Prega con lori. Quando una persona giusta la prega, questo el ga tanto poder. (Tiago 5:16) Larissa, che ghemo parlà vanti, la ga dito: “Mi go parlà ai ansiani sora i me dubi e le me paure. Lori i ga prega insieme con mi e par mi. Cossita mi go capio che lori no i era disgustadi con mi. Invesse, lori i volea giutarme a esser amiga de Geovà nantra volta.” Varda anca el esémpio de Theo. Lu el ga dito: “Quando i ansiani i ga pregà insieme con mi, son restà sicuro che Geovà el me ama e el vede quel che mi fao de bon, nò sol i me sbali.”

Sìpia amigo de lori. Quei che i ze tornadi a esser Testimònie de Geovà i ga bisogno de amighi nela congregassion. Un ansiano, che el ga nome Justin, el ga dito: “Proa sempre convidarli par ndar predicar insieme e faghe sempre vìsite. Esser amigo de lori l’è tanto importante!” Nantro ansiano, che el ga nome Henry, el ga dito: “Quando i altri fradei i vede che i ansiani i vol esser amighi de quel che l’è tornà, anca lori i volerà farlo.”

Giùtali a studiar. Un bravo amigo el pol giutar quel che l’è tornà a esser Testimònia de Geovà a far sempre el so stùdio dela Bìblia. Un ansiano, che el ga nome Darko, el ga dito: “Me piase tanto parlar dele bele robe che go imparà nel me stùdio. Me piase mostrar come resto contento de studiar la Bìblia. Mi proo anca studiar insieme de lu.” Nantro ansiano, che el ga nome Clayton, el ga dito: “Mi lo incoraio a studiar sora persone nela Bìblia che le ga infrontà le medèsime dificoltà che lu e a veder quel che el pol imparar.”

Sìpia un bon pastor. Quei che i ze tornadi a esser una Testimònia de Geovà i ga belche visto i ansiani laorar come giuisi. Adesso, lori i ga de capir che i ansiani i ze anca pastori. (Ger. 23:4) Se te sì un ansiano, cossa che te pol far? Fà el meio che te pol par scoltarli e lodarli. Parla sempre con lori. Varda cossa che un ansiano che el ga nome Marcus, el fà quando el visita questi fradei: “Noantri parlemo de un testo dela Bìblia e ghe lodemo. Anca li assemo sicuri che Geovà e noantri semo tanto contenti de veder el sforso che el ga fato par tornar a esser una Testimònia de Geovà. Vanti de ndar via, parlemo del pròssimo giorno che ndaremo visitarli.”

a I nomi i ze stati cambiadi.