Hulda la ze stata bona de far quel che la volea!
NELA Indonèsia, ghen’è una ìsola de nome Sangir Besar. Un per de ani indrio, tre dele nostre sorele le ga laorà nte una praia de questa ìsola. Tuti i sa che lore le insegna la Bìblia ai altri. Ma in quela època, queste tre sorele le era drio far un laoro difarente.
La ìsola de Sangir Besar, nel nort dela Indonèsia
Le sorele le catea fora sassi rento la àqua e li portea fin la praia. Dopo, lore le se sentea e le doperea un martel par spacarli tuti in pìcoli tocheti. Alora, lore le metea questi sasseti rento un balde e lo portea su par una scala fin rivar casa. Dopo, lore li metea rento sacole ben grande che le saria meteste rento un camignon. Questi sassi i era doperadi par far strade.
Hulda intanto che la ze drio catar su sassi nela praia
El nome de una de queste sorele l’è Hulda. Come la podea doperar de pi del so tempo par far quel laoro, la era fin bona de ciapar i soldi che ghe ocorea par tender dela so fameia. Ma, in quela època, la volea anca imuciarse soldi par comprarse un tablet. Cossita, ela la podaria doperar el aplicativo JW Library® par imparar ancora de pi dela Bìblia e par insegnar meio le persone nela predicassion.
Alora, Hulda la ga seità a far questo laoro due ore tuti i giorni par un mese e meso. Ela la ga spacà tanti sassi che la ze stata bona impienir un camignon. Cossita, ela la ga bio i soldi che ghe volea par comprarse el so tablet.
Hulda col so tablet in man
Ela la ga dito: “Sicuro che son restada cansa e straca de spacar fora tuti quei sassi. Ma dopo che go scominsià a doperar el me tablet, no me penso mia pi de quel che go tribolà. Adesso, son bona giutar ancora de pi le persone nela predicassion e l’è pi fàcile pareciarme par le riunion.” El so tablet anca la ga giutada nela pandemia quando le riunion e la predicassion i era fati par meso dela internet. Semo pròpio contenti che Hulda la ze stata bona intivar.