Seto Questo?

Che condussion el eunuco dela Etiòpia l’era drio doperar par viaiar quando Filipe lo ga catà?

NELA léngua greca, la parola che la ze tradusida nela Bìblia come “careta” la ze doperada par parlar de diversi tipi de condussion. (Ati 8:28, 29, 38) Ma, come ndaremo veder adesso, ghen’è arquante robe che le mostra che la careta ndove quel omo dela Etiòpia l’era drio viaiar la era pi granda de quele che se doperea par far carere o nele guere.

Lu l’era un omo importante dela Etiòpia e el gavea fato un viaio pròpio longo. Questo omo “el gavea granda autorità e el tendea de tuto quel che Candasse, la regina dela Etiòpia, la gavea”. (Ati 8:27) In quela època, la Etiòpia la ciapea rento i paesi che ancoi i ze el Sudon e anca una parte del Egito. Come quel omo el ndaria nte un posto pròpio distante, lu el se gavarà portà drio diverse robe che ghe ocoreria. Ma fursi lu no’l ga fato tuto el viaio cola stessa careta. Arquante condussion che le era doperade nel primo sècolo le era querte e le gavea quatro rode. Un libro el ga spiegà che se podea ndar pi distante con queste condussion parché le era bone par viaiar e ghe stea rento pi mestieri.

El omo dela Etiòpia l’era drio leder quando Filipe l’è rivà darente. La Bìblia la dise che ‘Filipe l’è ndato de carera fin la banda dela careta e el ga scoltà che el eunuco l’era drio leder le parole de Isaia’. (Ati 8:30) Le carete de viaio no le ndea svelte. Par quela che el omo l’era bon de leder intanto che el viaiea, e Filipe l’è stà bon de rivarghe darente, stesso che el fusse a pié.

Lu el ghe ga dito a “Filipe che el vegnesse su e se sentesse dela so banda”. (Ati 8:31) Nele carete che se doperea par corer, le persone le gavea de star in pié. Ma, nte una careta de viaio, ghen saria posto par Filipe sentarse do insieme el omo.

De acordo con quel che la stòria la mostra e con Ati capìtolo 8, podemo capir come che l’era la condussion che quel omo dela Etiòpia el ga doperà. Par quela, le ilustrassion nele nostre publicassion le mostra che lu l’era nte una careta pi granda de quele che se doperea par far carere o nele guere.