Sarà che l’è meio che me fermo de guidar el auto?

FURSI te sì drio guidar el auto fà tanti ani. Sicuro che l’è tanto bon ndar ndove che te ocore e nela ora che te vol. Ma la to fameia e i to amighi i pensa che l’è meio che te te fermi de guidar. Sol che no te sì bon de capir parché che lori i pensa cossita.

Se te sì drio infrontar una roba cossita, cossa che pol giutarte a dessider se magari l’è meio che te te fermi de guidar el auto?

In arquanti paesi, quei che i ze pi veci i ga de ndar al dotor e far un per de esami par veder se i podarà ancora guidar el auto. I fradei e sorele che i vive in questi paesi i fà tuti questi esami e i rispeta la dessision dele autorità. (Rom. 13:1) Ma anca se no te sì de star nte un paese che el ga lege cossita, te ghè de veder se ancora te sì bon de guidar el auto con seguransa.

VEDI COME CHE TE SÌ DRIO GUIDAR EL AUTO

Una organisassion dei Stati Unidi che la giuta quei che i ze pi veci la ga dito che l’è importante domandarte:

Fao fadiga veder le plache de trànsito o vederghe ben de note?
Son ancora bon de suito veder quel che ghen’è intorno al auto quando son drio guidar?
Son ancora bon de suito pestar nel freno quando ocore?
Sarà che son drio guidar el auto massa pin pian che intrigo i altri?
Go quasi batesto el auto diverse volte, o sarà che el me auto l’è tuto smacà?
La polìssia la me ga fermà arquante volte par causa dela maniera che ero drio guidar?
Mi me go belche indormensà intanto che guido?
Son drio doperar un rimèdio che pol intrigarme de guidar con seguransa?
La me fameia e i me amighi i me ga belche dito che i ze preocupadi?

Se te ghè rispondesto si a una o due de queste domande, te pol far arquanti cambiamenti. Par esémpio, fà de manco guidar el auto de note e proa doperar manco el auto. Te ghè de sempre veder se te sì drio guidar con seguransa. Te pol domandar a qualchedun dela to fameia o a un amigo che el te parle se te sì drio far polito. Fursi saria bon che te fessi un corso de come guidar meio. Ma se te ghè rispondesto si a arquante de quele domande lì su, saria meio che te te fermessi de guidar el auto.a

CHE PRINSIPI DELA BÌBLIA I POL GIUTARTE A FAR QUESTA DESSISION?

Pol esser fadiga acetar che no te sì pi bon de guidar ben come una volta. Fursi te resti tanto disgustà de pensar che te toca fermarte de guidar el auto che no te vol gnanca parlarghene. Alora, come che la Bìblia la pol giutarte a far la meio dessision? Varda due robe che te ghè de pensarghe sora.

Sìpia ùmile. (Pro. 11:2) Dopo che se vien veci, no semo pi boni de vederghe e scoltar ben e de far svelto quel che ghe ocore. Par esémpio, arquanti i se ferma de far un sport dopo che i vien pi veci parché i sa che l’è fàcile farse mal. La medèsima roba sucede par quei che i guida el auto. Una persona che la ze ùmile la ndarà fermarse de guidar se la vede che no la ze pi bona de farlo con seguransa. (Pro. 22:3) E se altri i ghe parla qualcossa sora questo, la persona che la ze ùmile la ndarà acetar. — Varda anca 2 Samuel 21:15-17.

No stà farghe mal ai altri. (Deu. 22:8) Se una persona no la guida mia el auto con seguransa pol esser che la ndarà farse mal o fin coparse. Una persona cossita la podarà farghe mal ai altri o fin copar qualchedun, e se questo sucede, la colpa la ze soa.

Se te ghè visto che te ocore fermarte de guidar el auto, no stà pensar che no te ghè mia valor o che i altri no i ndarà pi rispetarte. Ricòrdate che Geovà el te vol ben par causa dele qualità che te ghè, come la umiltà e el amor par i altri. Lu no’l ndarà mai abandonarte e el ndarà sempre darte aiuto e consolo. (Isa. 46:4) Alora, se te ghè de dessider se te ndarè fermarte de guidar el auto, domanda che Geovà el te dae sabedoria e el te giute a doperar ben i prinsipi dela Bìblia.

Come che i altrii pol giutar?

Se un fradel no l’è pi bon de guidar el auto con seguransa, saria meio che quei dela so fameia i parlesse con lu. Ma anca i amighi i pol giutarlo. Fursi te sì un amigo e te scolti che altre persone le ze preocupade con lu. Alora, scolta quel che le te dise. Te pol fin domandar de ndar insieme con questo fradel pi vècio intanto che lu guida el auto. Se te vedi che qualcossa no va mia ben, te ghè de parlarghe, ma mostra bontà e proa capir come che lu el ndarà sentirse. Mostra che el problema no l’è la so età, ma la maniera che lu l’è drio guidar. Te pol parlar robe come: “Mi son preocupà cola to seguransa intanto che te guidi”, e nò parlar: “No te sì pi bon de guidar el auto.” Giuta questo fradel a ricordarse dei prinsipi dela Bìblia che ghemo visto in questo artìcolo e mostra che te sì sicuro che lu el ama questi prinsipi.

Proa capir i sentimenti dela persona che no la pol pi guidar el auto. Pol esser che la pense che adesso no la pol pi far quel che la vol e quando la vol. Cossa che te podarissi far? Sfòrsate par sempre tratarla con bontà e mostra che te sì pronto par giutarla. (Pro. 17:17) Fursi la persona pi vècia no la ndarà domandarte aiuto parché la pensa che la ndarà intrigarte. Alora, dighe che te pol menarla ale riunion, ala predicassion, al dotor e a qualche altro posto che ghe ocore. L’è importante anca dirghe che te ghè caro de star insieme con ela e de giutarla. — Rom. 1:11, 12.

a Par saver de pi, ledi el artìcolo “Acidente de automóvel: ‘Só acontece com os outros’?”, nela Sté atenti! de 22 de agosto de 2002.