Come seitar a gaver alegria se te tendi de qualchedun?

1-2. Cossa che Geovà el pensa de quei che i tende de qualchedun? (Proverbi 19:17) (Varda anca la ilustrassion.)

UN FRADEL dela Corea de nome Jin-yeol che l’è maridà a de pi de 32 ani el ga dito: “La me dona la ga la malatia de nome Parkinson e no la ze gnanca bona de móverse. Nei ùltimi sinque ani, son mi che son drio tenderla. Mi la amo tanto e me piase de tenderla. Ela la dorme casa nte un leto compagno a quei del ospedal. Mi me buto do dela so banda e tegno la so man intanto che dormimo.”

² Fursi anca ti te sì drio tender del to pare, del to omo, dela to dona, del to fiol o de un amigo. L’è sicuro che te sì contento de giutar una persona che te ami tanto. E, se te fè cossita, te mostri che te ami anca a Geovà. (1 Tim. 5:4, 8; Tia. 1:27) Pol esser che te infronti tante dificoltà che i altri no i ze boni de veder gnanca de capir. Fursi, quando te sì insieme dei altri, te sì bon de rider, ma quando te sì ti ti sol, te vien de piander. (Sal. 6:6) Ma anca se le persone no le sa tuto quel che te infronti, te pol esser sicuro che Geovà el te capisse del bon. (Varda Ésodo 3:7.) Lu el vede che te sì drio sofrir e el dà tanto valor al laoro che te fè par tender de qualchedun. (Sal. 56:8; 126:5) Geovà el dise che quando te tendi de qualchedun che l’è pi vècio o malà, l’è come se el gavesse un dèbito con ti e el ndarà ricompensarte. — Ledi Proverbi 19:17.a

3. Parché che no l’è stà mia fàcile par Abraon e Sara tender de Tera?

³ Nela Bìblia, catemo arquanti esempi de persone che le ga tendesto de qualchedun. Varda, par esémpio, Abraon e Sara. Quando lori i ze ndati via de Ur, lori i ga portà insieme el pare de Abraon, Tera, che el gavea intorno de 200 ani. Lori i ga viaià 960 chilòmetri fin rivar a Aran. (Gén. 11:31, 32) L’è sicuro che Abraon e Sara i amea tanto a Tera, ma no l’è stà mia fàcile far un viaio longo cossita con una persona pi vècia. Parché? Parché, in quela època, ghe tochea viaiar nte un camelo o un mul. Fursi tante volte Abraon e Sara i era strachi, ma sicuro che Geovà el ghe ga dato la forsa che ghe ocorea par seitar a tender de Tera. Alora, se Geovà el ga giutà Abraon e Sara, l’è sicuro che el va giutar anca a ti a tender de qualchedun che l’è pi vècio o malà. — Sal. 55:22.

4. Cossa che ndaremo imparar in questo stùdio?

⁴ Te pol gaver alegria anca se te infronti dificoltà. (Pro. 15:13) E se te ghè alegria, te sarè bon de seitar a tender de qualchedun. (Tia. 1:2, 3) Ma cossa che te pol far par gaver alegria? Te pol pregar a Geovà e domandarghe che el te giute a veder le bele robe che te ghè. In questo stùdio, ndaremo veder parché che quei che i tende de qualchedun i pol seitar contenti e che dificoltà lori i infronta. Noantri anca ndaremo veder cossa che lori i pol far par seitar contenti e come che i altri i pol giutarli.

PARCHÉ CHE DELE VOLTE L’È FADIGA TENDER DE QUALCHEDUN?

5. Parché che l’è importante gaver alegria par tender de qualchedun?

⁵ Se noantri pensemo sol nele dificoltà che ghemo par tender de qualchedun, podemo restar desanimadi e strachi. (Pro. 24:10) E quando semo strachi, pol esser pi fadiga parlar cole bone e mostrar bontà. Ma che robe pol farne perder la alegria?

6. Parché che arquanti che i tende dei altri i resta tanto strachi?

⁶ Podemo sentirse tanto strachi. Una sorela de nome Leah la ga dito: “Anca quando tuto va ben, tante volte nel fin del giorno mi son pròpio straca. Dele volte, no son gnanca bona de pensar par poder risponder i messagi che i me manda.” Altri che i tende de persone malade i dise che no i ze boni de riposar e gnanca gaver tempo par far quel che ghe ocore. Una sorela de nome Inés la ga dito: “Mi no son bona de dormir el tanto che me ocore. In meso la note, go de levar su a cada due ore par tender dela me sogra. Fà ani che mi e me omo no semo mia boni de far un viaio.” Tanti de quei che i tende dei maladi no i ga mia tempo par star insieme coi amighi o de far un laoro nela organisassion che ghe piaseria. Par quela, lori i pol sentirse lori soli e desanimadi parché no i ze boni de far tute le robe che ghe piaseria.

7. Parché che arquanti i se sente desanimadi o i pensa che no i ze drio far che basta?

⁷ Podemo restar desanimadi o pensar che no semo drio far che basta. Una sorela de nome Jessica, che la tende del so pare malà, la ga dito: “Tante volte, mi penso che me tocaria far de pi par giutar me pare, e quando me togo un tempo par far le me robe, me sento tanto mal.” Tanti che i tende de qualchedun i pensa che no i ze drio far che basta o i ga paura de no esser boni de seitar a tender de questa persona. Altri i se sente desanimadi parché i ga parlà qualcossa de bruto ala persona malada. (Tia. 3:2) A altri ghe despiase de veder che la persona che la ze malada no la ga pi la forsa che la gavea vanti. Una sorela de nome Barbara la ga dito: “Me despiase tanto veder che la persona che mi amo la ze drio restar cada volta pi malada.”

8. Come tanti i se sente quando i altri ghe ringràssia?

⁸ Podemo pensar che nissuni i bada quel che femo. L’è vera che quando qualchedun el dise che l’è contento col nostro laoro, ghemo voia de seitar a farlo. Ma, tanti ancoi no i ringràssia mia quando qualchedun ghe giuta. (1 Tes. 5:18) Una sorela de nome Melissa la ga dito: “Tante volte, mi piando parché son straca e desanimada. Ma quando quei che mi tendo i me ringràssia, suito resto pi contenta. Queste parole le me giuta a levar su e a esser premosa de seitar a tenderli.” El fradel Ahmadu e la so dona i tende dela so sobrigna che la ze tanto malada. Lu el ga dito: “Ela no la ze bona de capir tuto quel che femo par tenderla, ma restemo tanto contenti quando ela la ne ringràssia o la dise che ne ama.”

COME SEITAR CONTENTI?

9. Come che podemo mostrar che semo ùmili?

⁹ Capissi quel che te sì bon de far. (Pro. 11:2) Nissun l’è bon gnanca ga el tempo de far tuto quel che ghe piaseria. Par quela, ghemo de dessider quel che ndaremo far e no restar disgustadi con quel che no semo boni. Tante volte, ne toca dir nò a qualchedun. Cossita, mostremo che semo ùmili. E ghemo de acetar quando i altri i vol giutarne. Un fradel de nome Jay el ga dito: “Ghemo forsa e tempo par far sol un per de robe al giorno. E quando no proemo far de pi de quel che semo boni, seitaremo contenti.”

10. Parché che l’è importante capir come la persona che te tendi la se sente? (Proverbi 19:11)

¹⁰ Proa capir come la persona che te tendi la se sente. (Ledi Proverbi 19:11.b) Se femo cossita, l’è pi fàcile restar tranquili quando la persona la ne dise su. Noantri savemo che una persona malada la pol far o dir robe che no la faria se la fusse ben. (Ecl. 7:7) Par esémpio, una persona che te ami la pol scominsiar a barufar, dir su ai altri, sbrontolar e mai esser contenta con gnente. Alora, cossa che te pol far? Proa capir meio la malatia che la ga. Cossita, sarà pi fàcile de capir che quel che la persona la ze drio far l’è par causa dela so malatia. — Pro. 14:29.

11. Cossa quei che i tende de qualchedun i ga de far? (Salmo 132:4, 5)

¹¹ Sfòrsate de torte el tempo par far pi forte la to amicìssia con Geovà. Dele volte, ghemo de assar de banda arquante robe par far ‘quel che l’è pi importante’. (Fil. 1:10) Par esémpio, te ghè de far pi forte la to amicìssia con Geovà. Nel passà, el Rè Davi el gavea tante robe de far, ma adorar a Dio l’era la roba pi importante dela so vita. (Ledi Salmo 132:4, 5.c) Dela stessa maniera, anca se te ghè tanto de far, te ghè de sforsarte par leder la Bìblia e pregar a Geovà tuti i giorni. Una sorela de nome Elisha la ga dito: “Quando mi prego a Geovà, ledo i salmi e ghe penso sora quel che go ledo, me sento contenta e calma. Mi prego a Geovà parché lu sempre el me giuta.”

12. Parché quei che i tende de qualchedun i ga de tender anca dela so salute?

¹² Tendi dela to salute. Quei che i tende de qualchedun i ga tanto de far, e fursi l’è fadiga tenderse e gaver una bona salute. Par esémpio, lori no i ga tanto tempo par comprar robe bone de magnar o par pareciarlo. Ma, par gaver una bona salute e restar contenti, ghemo de magnar ben e far esersissi. (Efe. 5:15, 16) Anca ghemo de dormir el tempo che ne ocore. (Ecl. 4:6) Studiosi i dise che quando dormimo ben, el nostro sarvel laora meio, restemo manco ansiosi e savemo meio cossa far quando sucede un problema. Nantra roba che te ghè de far la ze torte el tempo par divertirte. (Ecl. 8:15) Una sorela la ga dito cossa che la ghe giuta a seitar contenta:“Quando el tempo l’è bon e ghen’è sol, me piase tanto ndar fora de casa. E mi proo scòlier al manco un giorno al mese par esser insieme ai me amighi e divertirme.”

13. Parché l’è bon rider? (Proverbi 17:22)

¹³ Proa rider dele robe. (Ledi Proverbi 17:22;d Ecl. 3:1, 4) Rider fà ben par la salute e ne assa contenti. Gnanca sempre le robe le sucede come volemo quando semo drio tender de una persona. Ma se te proi rider de quel che sucede, te sarè pi bon de soportar le dificoltà. E rider cola persona che te sì drio tender ve giutarà a restar pi amighi.

14. Come che parlar con un amigo pol giutarte?

¹⁴ Parla par un bon amigo come te te senti. Stesso che te fè tuto giusto, te pol sentirte stufo e ansioso. Alora, proa parlar quel che te senti par un amigo che no’l ndarà pensar mal de ti. (Pro. 17:17) Lu el ndarà scoltarte e incoraiarte, e fursi l’è pròpio quel che te ghè de bisogno par gaver alegria. — Pro. 12:25.

15. Come pensar nela speransa che te ghè par el futuro pol darte alegria?

¹⁵ Imagina come sarà la vostra vita insieme nel Paradiso. Geovà mai el ga volesto che le persone le vegnesse vècie, le restesse malade e ghe ocoresse esser tendeste. No te gavarè de far questo laoro par sempre. (2 Cor. 4:16-18) Nel futuro, noantri ndaremo viver la “vera vita” che Geovà el ga prometesto. (1 Tim. 6:19) Alora, proa discorer insieme dela persona che te tendi sora la vita nel Paradiso. Sicuro che ve sentiré tanto felici. (Isa. 33:24; 65:21) Una sorela de nome Heather la ga dito: “Parlo sempre ale persone che mi tendo che, nel futuro, ndaremo caminar, corer e ndar de bissicleta insieme. Ndaremo far pan e cosinar par quei che i ndarà ressussitar. Dopo de discorer sora questo, ringrassiemo a Geovà par la speransa che ghemo.”

COME TUTI NOANTRI PODEMO GIUTAR?

16. Come giutar una persona dela nostra congregassion che tende de qualchedun? (Varda anca la ilustrassion.)

¹⁶ Giuta quei che i tende de qualchedun a gaver pi tempo de far le so robe. Tuti noantri podemo giutar quei che i tende de una persona. Cossita, lori i gavarà tempo par far le so robe e fermarse un pochetin. (Gàl. 6:2) Tanti fradei e sorele i fà una programassion par giutar tute le stimane. Una sorela de nome Natalya, che la tende del so omo che no l’è bon caminar, la ga dito: “Un fradel dela congregassion el vien una o due volte ala stimana par star insieme col me omo. Lori i discore, i predica insieme, fin i vede filmi. El me omo ghe piase tanto, e cossita, son bona de far quel che me ocore e fin ndar a spasso.” Podemo anca ndar tender dela persona malada de note e dormir là. Cossita, el fradel o sorela che la tende sarà bon de riposar meio.

17. Come che podemo giutar quei che i tende de una persona quando i ze nele riunion?

¹⁷ Giuta quei che i tende de qualchedun quando i va ale riunion. Quando un fradel o sorela tende de qualchedun, no l’è fàcile de star atenti ale riunion, assemblee e congressi. Alora come che ti te pol giutar? Te pol sentarte dela banda dela persona malada e giutar a tenderla nela ora dela riunion. Se la persona malada no la ze bona de ndar via de casa, te pol vardar la riunion insieme a ela nela so casa. Cossita, el fradel o sorela che la tende pol ndar al Salon del Regno.

18. Cossa che ancora podemo far par un fradel o sorela che tende de qualchedun?

¹⁸ Prega par un fradel o sorela che tende de qualchedun e daghe lodi. I ansiani i pol sempre visitarli e incoraiarli. (Pro. 27:23) E tuti noantri ghemo de lodar quei che i tende dei altri. Anca podemo domandar che Geovà li giute a seitar a esser forti e contenti. — 2 Cor. 1:11.

19. Cossa che noantri spetemo?

¹⁹ Suito, no ghen sarà pi malatie, gnanca la morte e Geovà el sugarà tute le làgrime de dolor. (Apo. 21:3, 4) La Bìblia la dise che “el sòto el ndarà saltar come un cavreto”. (Isa. 35:5, 6) No l’è mia fàcile tender de una persona malada che amemo, ma nel futuro, queste robe “no le sarà ricordade gnanca le tornarà al cuor”. (Isa. 65:17) Semo ancora drio spetar questo giorno rivar, ma no semo soli parché Geovà l’è con noantri. Se se fidemo in lu par darne forsa, lu el ne giutarà a “perseverar in tuto con passiensa e alegria”. — Col. 1:11.