Come seitar a gaver alegria dopo veci?

1-2. De acordo col Salmo 92:12-14, cossa che Geovà el pensa dei so servi che i ze belche veci? (Varda anca el ritrato.)

ARQUANTI i pensa che l’è bel vegner veci, ma tanti i se sforsa par seitar gióveni. Par esémpio, te te ricordi quando te ghè visto i to primi cavei bianchi? Fursi te ghè pensà de presto cavarli via prima che qualchedun li vedesse. Ma dopo, te sì nicorto che anca se te cavessi via quei cavei bianchi, vegnaria altri. Questo esémpio el mostra che no importa cossa femo, tuti semo drio vegner veci.

² Ma cossa che Geovà el pensa dei so servi che i ze belche veci? (Pro. 16:31) Lu el dise che lori i ze compagno a bele piante. (Ledi Salmo 92:12-14.a) Parché? Parché arquante piante le ga tanti ani, ma ancora le ga tante foie e bei fiori. Par esémpio, nel Giapon, ghen’è una dele piante pi bele e la pol gaver de pi de mila ani. I fradei e le sorele pi veci i ze bei come queste piante e Geovà ghe vol tanto ben. Lori i ga tante bele qualità e i seita fedeli a Geovà, anca con dificoltà.

3. Come che Geovà el ga doperà arquanti dei so servi del passà che i era belche veci? Parla de un esémpio.

³ Geovà el ghe vol tanto ben ai so servi che i ze pi veci.b E nel passà, lu el ga doperà arquanti de lori par far bele robe. Par esémpio, Sara la era belche vècia quando Geovà ghe ga dito che la gavaria un fiol e che lu el deventaria una nassion de ndove vegnaria el Messia. (Gén. 17:15-19) Moisè l’era belche vècio quando Geovà lo ga scoliesto par menar via i israeliti del Egito. (Éso. 7:6, 7) E el apòstolo Gioani el gavea belche una bela età quando Geovà lo ga scoliesto par scriver sinque libri dela Bìblia.

4. De acordo con Proverbi 15:15, cossa che pol giutar quei che i ze pi veci a darghene fora cole so dificoltà? (Varda anca el ritrato.)

⁴ Quei che i ze pi veci i ga tante dificoltà. Par quela che una sorela la ga dito: “No l’è mia fàcile vegner veci.” Ma cossa che pol giutarte se te ghè belche una bela età? Gaver alegria ndarà giutarte a darghene fora cole dificoltà che le vien col tempo.c (Ledi Proverbi 15:15.d) In questo stùdio, ndaremo veder parché che pol esser fadiga par quei che i ze pi veci seitar a gaver alegria e cossa che pol giutarli. Anca ndaremo veder come che tuti i fradei e sorele i pol giutarli.

PARCHÉ CHE POL ESSER FADIGA SEITAR A GAVER ALEGRIA?

5. Cossa che pol far arquanti restar desanimadi?

⁵ Cossa che pol farte restar desanimà? Una dele robe fursi la ze che no te sì pi bon de far quel che te fei una volta. Pol esser che te piaseria esser ancora gióveno e gaver una bela salute. (Ecl. 7:10) Par esémpio, varda quel che una sorela de nome Ruby la ga dito: “Me fà fadiga meter su le robe parché me fà mal da par tuto. No son gnanca bona de meter su le calsete. Par causa dei reumatismi, le me man le ze sempre indormensade e no l’è mia fàcile far arquante robe sémplisse.” Un fradel de nome Harold, che el ga laorà in Betel, el ga dito: “Dele volte, mi resto cativo parché no son bon de far tuto quel che fea vanti. De gióveno, mi gavea tanta forsa e me piasea giugar beisebol. Par quela, i altri i disea: ‘Tré la bola al Harold e lu ne giutarà a vinser.’ Adesso, penso che no son gnanca bon de trar la bola.”

6. (a) Che altre robe pol far quei che i ze pi veci restar desanimadi? (b) Cossa che pol giutar quei che i ze pi veci a dessider se i seitarà a guidar o nò? (Varda anca el artìcolo “Sarà che l’è meio che me fermo de guidar el auto?”.)

⁶ Pol esser che te te senti desanimà parché no te sì mia bon de far le robe ti ti sol. Fursi te ocore de qualchedun par esser sempre insieme de ti o te sì ndato de star insieme de un dei to fioi. O fursi no te sì mia bon de guidar el to auto o la to moto parché la to salute no la ze bona o parché no te sì pi bon de vederghe ben. Queste robe no le ze mia fàcile. Ma proa ricordarte che, anca se no te sì pi bon de star ti ti sol o de guidar, Geovà e i altri i te vol tanto ben. Lu el capisse i to sentimenti e quel che te sì drio infrontar e lu el sa che te ami a lu e ai to fradei e sorele. Par Geovà, questa la ze la roba pi importante. — 1 Sam. 16:7.

7. Cossa che pol giutar quei che i ze desanimadi parché i pensa che no i farà ora de veder el fin de questo mondo?

⁷ Pol esser che te te senti desanimà parché te pensi che no te farè ora veder el fin de questo mondo. Alora, cossa che pol giutarte? Proa ricordarte che Geovà l’è drio portar passiensa par finir col bruto mondo de ancoi. (Isa. 30:18) Parché? Parché el vol che le persone le possa imparar sora lu e scòlier servirlo. (2 Pie. 3:9) Alora, se te te senti desanimà, proa ricordarte che tante persone ancora le pol cognosser a Geovà e gaver la vita eterna. Pol esser che arquante fin le sìpie persone dela to fameia.

8. Cossa che quei che i ze pi veci fursi i fà quando no i stà mia ben?

⁸ No importa se semo gióveni o veci, quando no stemo ben, l’è pi fàcile parlar qualcossa che dopo ndaremo ciamarse grami. (Ecl. 7:7; Tia. 3:2) Par esémpio, Giò l’era un servo fedele de Geovà, ma el ga “parlà sensa pensar” quando l’era drio sofrir. (Giò 6:1-3) Ancoi, i fradei pi veci fursi i parla o i fà robe che disgusta i altri par causa dela malatia che i ga o dei remedi che i ze drio doperar. Ma lori no i pol pensar che questa la ze una scusa par dirghe su ai altri o par pensar che i altri i ga de far quel che i vol. E se i se nicorde che i ga parlà robe brute a qualchedun, lori i ga de far presto domandarghe scusa. — Mat. 5:23, 24.

COSSA POL GIUTARTE A SEITAR A GAVER ALEGRIA?

9. Parché che l’è bon che te aceti el aiuto dei altri? (Varda anca la ilustrassion.)

⁹ Aceta el aiuto dei altri. (Gàl. 6:2) Far questo pol esser tanto fadiga. Una sorela de nome Gretl la ga dito: “Dele volte, me fà fadiga acetar el aiuto dei altri parché me par che ghe darò massa laoro. Ga metesto un tempo fin cambiar quel che mi pensea e acetar che me ocore del so aiuto.” Te pol anca ricordar che i fradei i restarà felici de giutarte. (Ati 20:35) E anca ti te restarè tanto contento de veder come lori i te ama e i vol tenderte.

10. Parché che l’è importante ringrassiar ai altri? (Varda anca la ilustrassion.)

¹⁰ Ringràssia i altri. (Col. 3:15; 1 Tes. 5:18) Sicuro che te piase quando i altri i te giuta, ma pol esser che te te desmenteghi de ringrassiarli. Sorider e ringrassiar pol giutar i to amighi a sentir che te dè tanto valor a quel che i fà. Leah, una sorela che giuta a tender de fradei pi veci in Betel, la ga dito: “Una dele sorele che mi giuto a tender la scrivi bei messagi par ringrassiarme. Quel che la scrive l’è poco, ma me piase tanto. Resto tanto contenta de veder che la ghe dà valor a quel che mi fao.”

11. Come che te pol giutar i altri? (Varda anca la ilustrassion.)

¹¹ Sfòrsate par giutar i altri. Te ndarè pensar manco nei to problemi se te pensi nei altri e se te proi giutarli. Tante persone nela Àfrica le dise che quei che i ze pi veci i ze come una biblioteca piena de libri e con tanto saver. Ma se i libri de una biblioteca i resta saradi, nissuni ndarà imparar de quel che l’è scrito. Dela stessa maniera, i pi gióveni no i sarà boni de imparar de ti se no te ghe insegni. Alora, cossa che te pol far? Proa cognosser i gióveni, faghe domande e scóltali. Te pol anca dirghe quel che te sè, come che Geovà el te ga giutà e parché che i sarà tanto felici se i seita leai. Sicuro che te restarè tanto contento de incoraiar e consolar i to amighi pi gióveni. — Sal. 71:18.

12. De acordo con Isaia 46:4, cossa che Geovà el ga prometesto ai so servi che i ze belche veci? (Varda anca la ilustrassion.)

¹² Prega a Geovà e domandaghe forsa. Dele volte, podemo sentirse desanimadi e sensa forsa par ndar avanti. Invesse, Geovà el ga tanto poder e “no’l resta mai canso”. (Isa. 40:28) Una roba che Geovà el fà col so grando poder la ze dar forsa ai so servi che i ze belche veci. (Isa. 40:29-31) Lu el ga prometesto che el va tender de quei che i ga belche una bela età. (Ledi Isaia 46:4.e) E Geovà sempre el fà quel che el ga prometesto. (Gios. 23:14; Isa. 55:10, 11) Alora, quando te domandi el aiuto de Geovà, lu el ndarà darte la forsa che te ocore. Cossita, te sarè sicuro che lu el te ama e te restarè tanto contento.

13. De acordo con 2 Corinti 4:16-18, cossa che ghemo de ricordarse? (Varda anca la ilustrassion.)

¹³ Ricòrdate che nel futuro te sarè gióveno e te gavarè salute nantra volta. L’è pi fàcile darghene fora con una dificoltà ancoi quando se ricordemo che no la durarà par sempre. E la Bìblia la dise che nel futuro nissun pi restarà vècio o malà. (Giò 33:25; Isa. 33:24) Alora, te pol restar tanto contento de pensar che nel futuro de gavarè forsa e salute come mai prima. (Ledi 2 Corinti 4:16-18.f) Ma cossa che i altri i pol far par giutarte?

COSSA CHE PODEMO FAR PAR GIUTAR QUEI CHE I ZE PI VECI?

14. Parché che l’è importante ciamar par telèfono o visitar i nostri fradei pi veci?

¹⁴ Sfòrsate de visitarli e ciamarli par telèfono. (Ebr. 13:16) I fradei pi veci i pol sentirse desanimadi parché i resta tanto tempo lori soli. Un fradel de nome Camille el ga dito: “Dele volte, mi son stufo parché resto rento casa tuto el giorno e no go gnente de far.” Quando visitemo questi cari fradei e sorele, mostremo che lori i ze importanti e che ghe volemo tanto ben. Ma tuti noantri ghemo tante robe de far. Par quela, pol esser che te ghè belche pensà de visitar un de questi fradei, e dopo no te sì stà bon de farlo. Alora, cossa che pol giutarte a esser sicuro dele “robe pi importante”, come par esémpio, visitar i nostri cari fradei e sorele pi veci? (Fil. 1:10) Te pol pensar in tuti i fradei pi veci dela to congregassion, scriver do i so nomi e scòlier el giorno che te ndarè mandarghe un messàgio, ciamarli par telèfono o visitarli.

15. Cossa che i gióveni e i pi veci i pol far insieme?

¹⁵ Se te sì gióveno, fursi no te sè come giutar quei che i ze pi veci. Ma no stà restar massa preocupà. Proa sol esser un bon amigo par lori. (Pro. 17:17) Par esémpio, te pol ciacolar con questi fradei prima e dopo dele riunion. Proa domandar che i te conte che testi ghe piase de pi o qualche bei ricordi de sti ani che ghe fà rider. Te pol anca convidarli par assister el JW Broadcasting^® del mese insieme de ti e sbassar le ùltime publicassion e vìdei nel so aplicativo. Una sorela pi vècia de nome Carol la ga dito: “Proa far quel che te piase insieme de quei che i ze pi veci. Mi son vècia, ma me piase tanto goder la vita. Me piase ndar in volta par comprar mestieri, magnar qualcossa e vardar la creassion de Geovà.” Una sorela de nome Maira la ga dito: “Una dele me meio amighe la ga 90 ani. Anca se la ga 57 ani de pi de mi, noantri ridemo tanto e assistimo filmi insieme. E quando ghemo una dificoltà, domandemo aiuto una al’altra.”

16. Parché che l’è bon che ndemo insieme dei fradei pi veci al dotor?

¹⁶ Proa ndar al dotor insieme de lori. Te pol menar i fradei pi veci al ospedal e restar insieme par esser sicuro che i dotori i ndarà tratarli ben e che i darà quel che ghe ocore. Te pol anca scriver do quel che i dotori i dise. (Isa. 1:17) Una sorela de nome Ruth la ga dito: “Dele volte, quando vao mi sola parlar coi dotori, lori no i me bada mia. Lori i dise robe come: “No te sì mia pròpio malada, sol te ghè massa pensieri in testa.” Invesse, quando ghen’è qualchedun insieme, lori i me trata tanto ben. Par quela, mi ringràssio ai fradei e sorele che i dopera del so tempo par vegner insieme de mi.”

17. Cossa che te pol far par predicar insieme ai fradei che i ze pi veci?

¹⁷ Proa predicar insieme de lori. Arquanti fradei che i ze pi veci no i ze boni de ndar predicar de casa in casa. Alora, sarà che te podarissi convidar un de lori par predicar insieme de ti nel careto? Te pol fin portar una carega par lu sentarse do. Te pol anca convidar un de lori par ndar insieme a un stùdio o far el stùdio nela so casa. I ansiani anca i pol far la riunion par la predicassion nela casa de un fradel pi vècio. Semo sicuri che Geovà l’è contento con tuto quel che femo par mostrar amor e rispeto a questi fradei. — Pro. 3:27; Rom. 12:10.

18. Cossa che ndaremo imparar nel pròssimo stùdio?

¹⁸ Questo stùdio ne ga giutà a ricordarse che Geovà el ama e el ghe dà tanto valor ai so servi che i ze belche veci. E anca tuti noantri pensemo cossita. Savemo che no l’è mia fàcile vegner veci, ma col aiuto de Geovà, te pol seitar a gaver alegria. (Sal. 37:25) L’è tanto bel saver che, nel futuro, te sarè contento come mai! Nel pròssimo stùdio, ndaremo veder come quei che i ze drio tender de una persona dela fameia che la ze belche vècia, o de un tosatel o de un amigo che l’è malà i pol seitar a gaver alegria.