Ti heeni eri yootthuna ya Muluku wa hiyo?

Emaara ninsomaahu ejornaale, naawehaka sooweereya mutelevisauni, naari omwiiwelela raadio munnoona naari wiiwa itthu ntoko ikrime, ikhotto, ni iterrorismu. Naari-tho, ninnaxupeya vantxipale mwaha woovoreiwa naari okhweliwa ole nnimusivela ahu.

Mene hiyo ninniikoha neeraka:

• Neereke Muluku aatthuna weera miyo vamoha ni amusi aka nihaaweke hiiha?

• Woowini kineeraaka kaphwanye nikhavihero weera kimalihe mahooxo aaka?

• Vano, Keereke mulaponi onookhale murettele?

Mootteeliha murima, makoho ene yaala Biblya onnaakhula

BIBLYA ONNIXUTTIHA WEERA, MULUKU ONROWA OREHERERA ITTHU MULAPONI.

• Khaavo mutthu aneera avoreiweke, wuuluvala naari okhwa. — Apokalise 21:4

• “Mulipa òtuthunya anatuphe ntoko nahe.” — Yesaya 35:6

• “Vavale maitho àlipa èvasi eni yòne.” — Yesaya 35:5

• Alipa ookhwa enoovinyerera. — Yohani 5:28, 29

• Khaavo onrowa ovoreiwa. — Yesaya 33:24

• Atthu ootheene mulaponi mu, enrowa yaruwereke yootxa yintxipale. — Nsalmu 72:16

  

NIPHWANYE MUREERELO WA SOOTHESENE BIBLYA ONNIXUTTIHA AWE

Mene pooti hiyo wuupuwela weera ele nsomma ahu epaaxina yoopatxera ya ebuukhu ela khiyaavo etthu ennivara murima. Nto nroromeleke weera Muluku ohiithanlela oreherera mikhalelo sa mulaponi, aani, Biblya onnahimexexa moota sineera aya seereye itthu iyo.

Nave-tho Biblya, onnihima itthu ikina. Onninileela moota nneera ahu niphwanye ohakalala woolipa. Nrowe nuupuwele itthu sinnihasula. Ntoko othowiwa makhopiri naari mahooxo aveemusini, ovoreiwa, naari okhweliwa mutthu naamusivela ahu vantxipale. Naamwi itthu iya sitempeene, Biblya onoowera onikhavihera ovilela mahooxo awo, ni onimaaliha vaavo onaakhula awe makoho ntoko:

• Mwaha wa heeni ninhaawa ahu?

• Ninrowa ovilela hai mahooxo enniphwanya?

• Neereke etthoko ahu enooweraneya okhala yoohakalala?

• Eheeni eneereya ni hiyo nakhwa vale?

• Nnimoonana-tho veeli ni atthu naasivela ahu yaale ekhwiiye?

• Eheeni enniroromeliha weera soothesene Muluku olaihenra awe onoopaka?

Mwaha wooweera muntthuna osoma ebuukhu ela, eyo enoonihera weera munnitthuna osuwela ele Biblya onxuttiha awe. Nto muroromeleke weera ebuukhu ela enimookhaviherani. Mene moone weera iparagrafu sookhalano makoho eneera yookhavihereni omwiiwexexa Biblya. Mene imilyau sintxipale s’atthu onnaasivela osoma itthu siri mBiblyani ni Anamoona a Yehova. Ninniroromela weera nyuwo-tho onimoosivelani. Mene mweera haawo Muluku khanoohiyani matataru, nto owo onimooreelihani vaavo muniilipihera anyu oxutta ele onooxuttihaaweni Biblya.