Yeremiya aalaleera moolipa murima

Yehova aamuthanla Yeremiya weera akhale profeta oYuda. Yeremiya annatthuneya olaaleera ni waaleela atthu weera yaatthuneya ohiya opaka itthu soonanara. Mene Yeremiya aaheera: ‘Yehova miyo ka mmiravo paahi. Miyo nkinwera wuuluma variyari va atthu antxipale.’ Yehova aamuleela: ‘Ohoove Yeremiya, miyo kinoorowa wooleela etthu onrowaawe wuuluma. Miyo kinoorowa wookhavihera.’

Nihiku nimoha, Yehova aamuruma Yeremiya weera aathukumanye alopwana ootheene oYuda ni apwexe mwaapu ohoolo waya. Avinyaka, Yeremiya aahaaleela etthu yaarowa weereya ni Yerusalemu hiihaale ntoko aapwenxaawe mwaapu ole. Owo aapaka eyo, ni asilopwana oYuda yaanyoonyiwa vantxipale. Namakeya mmoha iitthaniwa Paxehuri ammana Yeremiya ni aamutthuka matata awe ni inaani sawe vamwirini. Yeremiya aakhala ohiyu wootheene ahiweraka wiitannya. Nihiku naattharelana aataphuliwa. Owo aariipiwa murima mpaka ohima weera khaarowa olaleera veeli. Mene neereke Yeremiya aakhulumuwa? Hooye. Owo aahuupuwela nnene ni aaheera: ‘Mitthenka sa Yehova saari ntoko mooro mweerutthuni mwaka. Nkinwera ohiya olaleera.’

Sivinreene iyaakha mwene munyowani aapatxera olamulela oYuda. Anamakeya ni maprofeta oowootha yanniitta etthu Yeremiya aahimaawe. Nto, awo yaahaaleela asitokweene oYuda weera emwiive Yeremiya. Mene Yeremiya aaheera: ‘Nyuwo mwakiivaru, munoomwiiva mutthu ohitthenke. Itthu miyo kinuulumaaka khaiyene sinkhuma wa miyo, mene sinkhuma wa Yehova.’ Asitokweene oYuda yaahiiwa eyo ni yaaheera: ‘Mulopwana ola khamphwanela wiiviwa.’

Yeremiya aavirelela olaleera. Mene noovira etempu, mwaha wa yeeyo asitokweene ale saapatxera waaphwanya isara. Avinyaka, yanvekela mwene weera amwiive Yeremiya. Mwene aahaaleela asitokwene ale weera epakeke etthu yaatthunaaya. Nto, asitokweene ale yaalakela omwiiva Yeremiya. Awo yanvara ni yanvonyera mulittini moowiixa ni moosareya matope. Avinyaka, Yeremiya aapatxera oneela.

Mulopwana mmoha iitthaniwa Ebedi Melki, asuwelakaru eyo aarowa wuuluma ni mwene: ‘Asitokeene anvonyera Yeremiya mulittini. Owo aahikhumemo mmwe, onimookhwa!’ Mwene aahimuruma Ebedi Melki orowa ni asilopwana 30 weera yanvuluxe Yeremiya. Nnaamweera aahanwe itthu sootheene iyo, Yeremiya aari oolipa murima ni khaahiyerenre olaleera. Nankha nyuwo munntthuna okhala ntoko Yeremiya?