Onyaanyiwa wa Yerusalemu

Atthu oYuda, ikwaha sintxipale yannamurakamela Yehova yaakokhorelaka amiluku eethiru. Mwa iyaakha sintxipale, Yehova aahaarumiha maprofeta awe weera yaakhavihere atthu oYuda. Menento atthu, khayaatthuna owiiwelela maprofeta ale. Awo yannatheya itthu awo yaahimaaya. Eheeni Yehova aarowaawe opaka weera amalihe okokhorela iwe weethiru?

Mwa etempu ene yeele, mwene a oBabilonia Nabukodonosori, eera atuphelaka miloko sikina ni sikhalaka sawawe. Owo aamutuphela Yerusalemu ni aamukuxa mwene Yoyakimi, asitokweene, anakhotto ni alopwana akina antxipale oYuda, yaaroihaka oBabilonia. Nave-tho Nabukodonosori aakuxa mihakhu sootheene saari mutemplu mwa Yehova. Menento Nabukodonosori aamweeriha Sedesiya okhala mwene oYuda nipuro na Yoyakimi.

Woopatxerani, Sedesiya annamwiiwelela Nabukodonosori. Menento maprofeta oowootha ni atthu akina, yaamuleela Sedesiya weera ahiwiiweleleke maBabilonia. Nto Yeremiya aamuleela ha: ‘Wakhala weera nyuwo munoomurukunuwela mwene a oBabilonia, oYuda sinookhumelela itthu soonanara. Atthu antxipale enimookhwa, enoovoliwa etala ni akina enoovoreiwa.’

Sivinreene iyaakha 8, Sedesiya aalakela omurukunuwela Babilonia ni ovekela nikhavihero na anakhotto a wExipitu. Nto Nabukodonosori aahaaruma anakhotto awe orowa omutuphela Yerusalemu, ni aamaka waattamela esidade ele. Yeremiya aamweerela Sedesiya: ‘Yehova ohimme weera weyo wiivaherere wa mwene oBabilonia, wapaka eyo, onoovuluxa esidade ni atthu enookhala nnene. Mene mwakhootta, aBabilonia enoomuhisa Yerusalemu ni enimookuxani weera yootthukeni.’ Mene Sedesiya waakhula enre: ‘Wiiveleela? Nkineera!’

Evinreene eyaakha emoha ni emeya, aBabilonia yaavolowa oYerusalemu ni yaahisa esidade ele. Awo yaahisa etemplu, yaawiiva atthu antxipale, ni yaahaakuxa atthu akina ntoko akaporo.

Sedesiya aatthawa oYerusalemu, mene aBabilonia yaamutthimakela. Awosa yanvara waattamela oYerikho ni yaamuroiha wa mwene Nabukodonosori. Nto mwene aalamula weera yiiviwe anamwane a Sedesiya ohoolo wawe. Avinyaka, owo aasonyola maitho a Sedesiya ni aanwalela mukateya mpaka okhwa. Mene Yehova aahaalaihera atthu oYuda eeraka: ‘Savira iyaakha 70, miyo kinoorowa wootthikiherani oYerusalemu.’

Eheeni yaarowa okhumelela ni amiravo yaamusivela Yehova yaawo yaakuxerinwe oBabilonia? Neereke yanvirelela okhala oororomeleya wa Yehova?