Amiravo axexe yaamwiiwelenle Yehova

Mwene Nabukodonosori aatthuna weera amiravo akina oYuda envareleke muteko. Nto owo aamuruma mulopwana mmoha eeriwa Axipenazi, waathanla amiravo yaakhanleno ekumi yooreera ni ootxentxera. Amiravo awo yaamurowa oxuttihiwa mwa iyaakha 3, ni yaamurowa oxuttera osoma, olepa ni wuuluma nuulumo na oBabilonia. Nave-tho awo yaahereke otxa yootxa ya mwene, ni atthu ootheene oowannyawe. Masina aamiravo ale axexe yaathanliwe yaari, Daniyeli, Ananiya, Misayeli ni Azariya. Axipenazi aahavaha masina manyowani amiravo awo. Awosa yiitthaniwa Baltasari, Xadraki, Mexaki ni Abedinego. Neereke oxuttihiwa wa amiravo ala oBabilonia waamurowa onanariha onthamwene aya ni Yehova?

Amiravo ale axexe yaalakela omwiiwelela Yehova. Awo yaasuwela weera atthu a oBabilonia yannatxa yootxa, yeeyo malamulo a Yehova yahaakhulelaaya. Mwaha wa yeeyo, awo yaahuluma ni Axipenazi, ni yanvekela weera ahaavaheke yootxa ya mwene. Axipenazi aawakhula: ‘Mene nyuwo mwaahitxaka yootxa ya mwene, ni owo oonelela weera nyuwo munoovoreiwa, miyo kinoorowa wiiviwa.’

Daniyeli aarowa wuuluma ni mulopwana aakosoopa amiravo awo: ‘Munoonela hayi pwiya opaka yooweerera? Mpuwa mwa mahiku 10 munivaheke nipontta ni maahi paahi. Avinyaka, mwinlikanxere hiyo ni amiravo akina yaawo antxa yootxa ya mwene.’

Mulopwana ole aahaakhulela, ni evirakaru mahiku 10, Daniyeli ni asinthamwenaawe yaakhalano ekumi yooreera waapwaha amiravo akina. Yehova aahakalala vantxipale oonakaru wiiwelela wayasa. Mpaka owo aanvaha Daniyeli osuwela weera iiwexexeke, etthu entaphulelaaya sooloha.

Oxuttihiwa iwe omalakaru, Axipenazi aahaakuxa aaroihaka wa mwene amiravo ootheene. Mwene aatthekula naawo ni aahoonelela weera Daniyeli, Ananiya, Misayeli ni Azariya yaari a miruku ni oomaaleleya. Mwaha wa yeeyo, aahaathanla amiravo ala, weera evareke muteko owannyawe. Mwene ole ikwaha sootheene annaavekela nikhavihero naya, weera ekosoopeke itthu sootthuneya. Yehova aamukhavihera Daniyeli ni asinthamwene awe okhalano miruku sintxipale waapwaha anahako ni anathenyeeri a mwene.

Daniyeli, Ananiya, Misayeli ni Azariya yaarakamelana ni owannyaya ni amusi aya. Nnaamweera vareene hiiho, awo khiyamuttiwanle Yehova. Ankha nyuwo? Neereke ikwaha sootheene muneereke omuupuwela Yehova naari asipapinyu ehikhanle vakhiviru?