Yehova aamukosoopa Yesu

Ohiyu omoha, ekhurupu emoha ya asilopwana yaakhala woorakamelana ni Israeli yaahoona waara wiirimu. Waakhala ntoko waara wa ithenyeeri. Awo yannaroromela weera ithenyeeri sannawera waahoolela ni waakhavihera atthu. Mwaha wa yeeyo, awo yaalakela otthara ethenyeeri ele. Ethenyeeri ele yaahaahoolela asilopwana ale mpaka oYerusalemu. Ephiyakaru iwe, awo yaahaakoha atthu: ‘Ori woowiini mwaana onrowa okhala mwene oYuda? Hiyo nookhalano itthu nintthunaahu onvaha.’

Herodi, mwene oYerusalemu, khiwaamusivenle wiiwa wuulumwasa mwene mukina. Menento aawiitthana anamakeya ootheene ni aahaakoha: ‘Mwene owo aakelaawe oyariwawo.’ Anamakeya ale yaamuleela weera aakela oyariwa oBetelehemu. Herodi aawiitthana asilopwana ale yaawiiye woorakamela ni aaweerela: ‘Murowe oBetelehemu mwamoone mwaana owo. Avinyaka, mutthike weeramukileele oraawewo mwaana owo. Miyo-tho kintthuna kamuxekure.’

Avinyaka, asilopwana ale yaavirelela otthara ethenyeeri ele mpaka ophiya oBetelehemu. Nto, ethenyeeri ele yaaheemela vasulu va empa. Asilopwana ale yaavolowa empa ele ni yamphwanya Yesu ni ameyawe, Maria. Awo yaakokhora ohoolo wa Yesu ni yanvaha soovaha iye yaakunxaaya sootepa orikaxa. Neereke aari Yehova aaruminhe asilopwana ale weera yamoone Yesu? Hooye.

Ohiyu ene yoole, Yehova aamuleela Yosefe moolohani: ‘Herodi antthuna omwiiva Yesu. Omukuxe Yesu ni Maria otthawele wExipitu. Nto miyo kinoorowa wooleela yaphiya etempu weera otthikeke.’ Moowaakuveya, Yosefe aatthawela wExipitu ni emusi awe.

Yehova aahuuluma-tho ni asilopwana ale yaakhumme ottayi weera ehirowe omuleela Herodi. Herodi onnaawe weera asilopwana ale yanwoka ni khiyaarowa otthika, aanyoonyiwa vantxipale. Okhala weera khaawera omphwanya Yesu, Herodi aalamula weera yiiviwe anamwane ootheene oBetelehemu yaawo yaayarinwe eyaakha emoha ni Yesu. Menento Yesu, eera akosoopinweene wExipitu.

Evinreene etempu, Herodi aakhwa. Yehova aamuleela Yosefe: ‘Vanonto weyo pooti otthikela wIsraeli.’ Nto, Yosefe, Maria ni Yesu, yaatthikela wIsraeli ni yaarowa okhala esidade yiitthaniwa Nazareti.