Yesu aarowa otemplu

Yosefe ni Maria yaakhala oNazareti vamoha ni Yesu ni anamwane aya akina asilopwana ni asithiyana. Yosefe aavara muteko wookaripinteiru, ni annaaxuttiha amusi awe woohima sa Yehova ni woohima sa malamulo awe. Emusi ya Yosefe ikwaha sootheene yannarowa osinakooka weera yamukokhorele Muluku, ni iyaakha sootheene yanneetta ekwaha yoorakama weera yamutthapele mpaasika oYerusalemu.

Emaara Yesu aaraaweno iyaakha 12, owo ni emusi awe yaapaka ekwaha erowaka oYerusalemu. Mpaasika ole amalakaru, Yosefe ni Maria yaapatxera weetta ekwaha etthikelaka owannyaya vamoha ni ekhurupu ya amusi aya. Awo yuupuwela weera Yesu aari ekhurupu ele. Mene erowakaru omwaasa Yesu, awo khayamphwannye.

Nto, Yosefe ni Maria yaatthikela oYerusalemu, ni yaamwaasa Yesu mahiku mararu, mene awo khayamphwannye. Avinyaka yaalakela otthikela otemplu oYerusalemu. Ni ti weiwo yamphwannyaayawo Yesu. Owo aari ni alipa ooxuttiha, awiiwelelaka etthu yaaxuttihaaya woohima sa Muluku ni aapakaka makoho. Alipa ooxuttiha ale yaatikhiniheya ni Yesu ni yaapatxera ompakela makoho. Ni awo wannaasivela moota Yesu aawaakhulaaya! Awo yannoona weera Yesu anniiwexexa nnene malamulo a Yehova.

Yosefe ni Maria yaaxupeya vantxipale. Maria aaheera: ‘Mwanaka, hiyo noowaasani mapuro ootheene! Mwaari woowi?’ Yesu aawaakhula: ‘Miyo kaari vaava, empa ya Atithi aka.’

Yesu aatthikela oNazareti ni asipapawe. Iwe Yosefe aamuxuttiha owo ovara muteko wa okaripinteiru. Yesu anninnuwa ni miruku sawe sannaatxeerereya. Atthu yannavirelela omusivela owo, ni Yehova annahakalala vantxipale mwaha wa etthu Yesu aapakaawe. Munnawera wuupuwelela moota Yesu aaraawe mwa etempu ene yeele?