Mitthenka sa Yohani mpatisa

Yohani mwaana a Zakariya ni Elizabeti, aahunnuwa ni aahikhala profeta, Yehova aamuthanla Yohani weera aaleele atthu weera Mesiya anwa. Yohani khaaxuttiha musinakooka naari mmawaani. Owo aaxuttiha mapuro oorakamela osidade. Atthu oYerusalemu ni oYudeya yannamwaasaasa Yohani weera exuttihiweke nuuwo. Owo annaxuttiha weera, weera atthu emuhakalaliheke Yehova wannatthuneya ohiya opaka itthu soonanara. Mene, atthu antxipale yannattharuwa ni yannapatisiwa ni Yohani.

Ekumi ya Yohani yaari yootepa okhweya. Ikuwo sawe saapakiwe ni mapururu a ikamelu, ni yootxa awe yaari misoope ni oravo. Atthu antxipale yaatthuna omusuwela owo. Mpaka afarisi, asaduki, yaawo yaari oowisunnuwiha, yannarowa wuuluma ni Yohani. Menento Yohani annaweerela awo: ‘Muhoone weera Muluku onnasiveliwa ni nyuwo waapwaha atthu akina. Nyuwo ontthuneya otxentxa ni ottharuwa.’

Atthu antxipale yannamukoha Yohani: ‘Etthu heeni nintthuneyaahu opaka weera nimuhakalalihe Muluku?’ Yohani aawaakhula: ‘Nyuwo mwakhalano ikuwo piili, munvahe emoha mukina ahikhanleno!’ Moosuwela mwaha wa heeni Yohani aahimaawe eyo? Owo aatthuna waaxuttiha atthu weera, weera emuhakalalihe Muluku, entthuneya waasivelaka atthu akina.

Wa asilopwana ale yaaliviha mpostu, Yohani annaweerela: ‘Mukhale oororomeleya ni muhaawokeke atthu akina.’ Wa anakhotto Yohani annaweerela: ‘Muhootheke ni muheerereke owiiyera musurukhu atthu akina.’

Emaara anamakeya ni alevi yaamukohaaya Yohani weera: ‘Weyo wa taani?’ Yohani annawaakhula: ‘Miyo tiyoole onaakuxa atthu aaroihaka wa Yehova. Profeta Yesaya aahuuluma woohima sa miyo.’

Atthu yannaasivela etthu ele Yohani aaxuttihaawe. Atthu akina-tho yanniikoha waari weera Yohani ari Mesiya. Menento Yohani annaakhula eeraka: ‘Mutthu ootepa otthuneya okipwaha miyo annawa. Miyo nkiphwanenle naari omurula isapatu sawe. Miyo kimpatisa ni maahi, menento owo onrowa opatisaka ni munepa wootteela.’