Yesu aakhala Mesiya

Yohani annalaleya weera mutthu ootepa otthuneya ompwaha owo annawa. Nto, emaara Yesu aaraaweno iyaakha 30, owo aarowa omooloko Yordani, weiwo Yohani aapatisaawewo atthu. Yesu anvekela-tho Yohani weera ampatise, mene Yohani aaheera: ‘Miyo nkiphwanenle woopatisa. Weyo ophwanenle okipatisa miyo.’ Yesu aamwaakhula Yohani: ‘Yehova ontthuna weera weyo okipatise.’ Nto, awosa yaavolowa mmoolokoni Yordani, ni Yohani aamuruweya Yesu erutthu yootheene mmaahini.

Emaara Yesu aakhummaawe mmaahini, owo aapaka nivekelo. Avinyaka, wiirimu waahuleyawo ni munepa wootteela wa Muluku waamukhuruwela Yesu ntoko epompa. Nto, naahiiwanyeya nsu na Yehova wiirimu: ‘Nyuwo mwanaka, oosiveleyaxa, mwa nyuwo kinnahakalala.’

Yaari etempu ene yeele Yesu aakhanlaawe Kristu, naari Mesiya. Vano owo aari oolikaneene weera apatxere muteko Yehova anvanhaawe.

Apatisiwakaru, Yesu aaviriha mahiku 40 areene onikareni. Atthikakaru, aarowa wuuluma ni Yohani. Yohani amoonakaru Yesu awaaka aaheera: ‘Munweheke mwaaputtiputthi a Muluku, yoowo onkumiha yoottheka mulaponi.’ Yohani aamwiitthana Yesu okhala mwaaputtiputthi a Muluku mwaha wooweera, aatthuna weera atthu esuwele weera Yesu aari Mesiya. Mene, Yesu areene onikareni, yaamukhumelela etthu. Etthu heeni? Nrowe noone.