Yesu aawoomola atthu yaatumiha mutemplu

Noovira miyeeri apatisinweene, Yesu aarowa oYerusalemu. Atthu antxipale yaari iwe weera emutxe mpaasika. Ompaasikani iwe, atthu yaakhovelela orowa otemplu weera yavahe mikuttho sa inama. Atthu akina yaakuxa inama saya weera yavahe, mene atthu akina yaathuma inama ephiñyeene oYerusalemu.

Yesu aphiyakaru otemplu, owo aawoona atthu etumihaka iputtiputthi, imompe ni ipompa. Atthu ale khayaakhanle iwe weera emukokhoreleke Yehova. Mene yaari iwe weera empakekewo nakoso! Moosuwela etthu Yesu aapankaawe? Owo aakuxa mikhoyi miili, aapaka murepettho ni aakukhulela vaate va etemplu iputtiputthi ni imompe. Avinyaka, aakunttula imeesa sa alipa ootumiha ni aarihela musurukhu aya vathi. Yesu aaweerela asilopwana ale yaatumiha ipompa: ‘Mukumihe itthu sootheene iya mu! Muhiye okhaliha empa ya Atiithi aka okhala empa yoomweetta nakoso!’

Atthu yaari otemplu iwe yaatikhiniheya ni etthu Yesu aapankaawe. Atthareli a Yesu yaahuupuwelela eprofesiya woohima sa Mesiya yeeyo yaahima ha: ‘Miyo kinoosivela vantxipale empa ya Yehova.’

Sivirakaru iyaakha tthaaru, Yesu aarowa otemplu ni aawiikara-tho alipa ootumiha. Owo aatthuna weera atthu ootheene ettittimiheke empa ya Atiithi awe.