Yesu ni muthiyana musamariya

Avirakaru Mpaasika, Yesu ni atthareli awe yaavira oSamariya erowaka oGalileya. Waattamela muttetthe wa oSikari, Yesu aaheemela veehimeni weera iitthuuwe nipuro nenno niitthaniwa ehime ya Yakobe. Vaavo iitthuuwaawe, atthareli awe yaarowa osidade weera yathume yootxa.

Avinyaka, muthiyana mmoha aaphiya veehimeni weera arike maahi. Yesu annvekela: ‘Mukivahe maahi oowura.’ Muthiyana ole aahaakhula: ‘Mwaha wa heeni munuulumaanyu ni miyo? Miyo musamariya. Ayuda ni Asamariya kheniiwanana.’ Yesu aamweerela: ‘Nyuwo khamukisuwenle weera miyo taani, mwaakisuwenle, mwaamukivekela maahi ni miyo kaamoovahani maahi a ekumi.’ Muthiyana ole aamukoha: ‘Moota heeni? Nyuwo khamwaanoono epaalte weera murikeno maahi.’ Yesu aamweerela: ‘Ole onkela owura maahi kinkelaaka onvaha, khankela-tho ovoliwa ntthona veeli.’ Muthiyana ole aamweerela Yesu: ‘Apwiya, mukivahe maahi awo.’

Nto Yesu aamweerela: ‘Murowe, mwawiitthane aiyanyu, avinyaka mutthikele wenno.’ Mene muthiyana ole aamwaakhula: ‘Nkithelinwe.’ Nto Yesu aamweerela: ‘Munhima ekhaikhai. Mwaha wooweera mwaatheliwa ni alopwana 5, ni mulopwana muraanyuno vano, khaiyene iyanyu.’ Muthiyana ole aatikhiniheya ni aamweerela: ‘Apwiya, kinoona weera nyuwo profeta. Hiyo asamariya ninnaroromela weera pooti omukokhorela Muluku oSamariya wenno, mene nyuwosa ayuda munhima weera onnatthuneya omukokhorela Muluku oYerusalemu. Miyo koosuwela weera Mesiya onoophiya ni onoonileela moota woomukokhorela Muluku.’ Avinyaka, Yesu aamuleela muthiyana ole etthu ahaatonko awe omuleela mutthu: ‘Miyo ka Mesiya.’

Muthiyana ole aatthimakela osidade ni aahaaleela asamariya akina: ‘Kohuuluma ni mulopwana mmoha okilenle itthu sootheene kipankaaka. Miyo kinoona weera owo Mesiya. Nkawani mmoone!’ Asamariya yaarowa weehimeni ni muthiyana ole weera yamwiiwe Yesu.

Nto, asamariya yaahinvekela Yesu weera akhale naawo osidade iwe. Yesu aakhala iwe mahiku meeli aaxuttihaka atthu, ni antxipale yannaroromela weera owo aari Mesiya. Emwiiwakaru Yesu, atthu yaakhala oSamariya, yaamweerela muthiyana ole: ‘Vanonto hiyo noosuwela weera mulopwana ola ti yoowo onrowa ovuluxa elapo.’