Yesu aalaleera woohima sa Omwene wa Muluku

Apatisiwakaru, Yesu aapatxera waalaleera atthu ootheene weera Omwene wa Muluku wannaattamela. Yesu aalaleera oGalileya ni oYudeya, atthareli awe yaarowa nuuwo. Avinyaka, Yesu aarowa oNazareti, esidade yeeyo aahuuwalaawewo. Iwe, aavolowa musinakooka ni aasoma moowiiwanyeya eprofesiya ya mprofeti Yesaya aalempaawe: ‘Yehova ookivaha munepa awe wootteela weera kilaleye mitthenka.’ Moosuwela mwaha wa heeni Yesu aahimmaawe eyo? Mwaha wooweera atthu yaatthuna weera owo apakeke miiriira. Mene Yehova aahinvaha munepa wootteela Yesu weera alaleere woohima sa Omwene wa Muluku. Nto Yesu aaheera: ‘Olelo eprofesiya ela ya Yesaya yookwanela.’

Avinyaka, Yesu aarowa ephareya ya oGalileya ni iwe aahaaphwanya atthareli awe 4. Awo yiitthaniwa Pedru, Andreya, Yakobe ni Yohani. Ni ootheene yaari anamatothela a ihopa. Nto, Yesu aaweerela: ‘Mukitthareke miyo, ni miyo kinimooxuttihani okhala anamatothela aatthu.’ Moowaakuveya, awo yaahiya matthavi aya enamutthara Yesu. Awo yaaheetta oGalileya wootheene weera elaleye woohima sa Omwene wa Yehova. Awo yannalaleera musinakooka, mapuro oowaatta atthu ni mphironi. Nipuro aarowaawe Yesu, atthu yannamutthara-tho owo. Mpaka wAsiriya woorakamelana ni iwe aaraawewo, atthu yaahiiwa woohima sa Yesu.

Muhoolo mwaya, Yesu aahaavaha atthareli awe owera woolamiha iretta ni owoomola mademoniyu. Yesu annalaleera esidade ni esidade, muttetthe ni muttetthe ni atthareli awe yannarowa nuuwo. Ni asithiyana oororomeleya ntoko Maria Madalena, Joana ni Susana, yannapaka ele yaaweraaya weera emukhavihere Yesu ni atthareli awe.

Exuttihiwakaru ni Yesu, atthareli ale yaarowa olaleera oGalileya wootheene. Antxipale yiiwale mitthenka iye sa Omwene, yaakhala atthareli ni yaapatisiwa. Nlelo atthu antxipale yannatthuna wiiwa woohima sa Omwene. Yaari atthu antxipale yaawo Yesu aalikanxenraawe ntoko ematta eri yoolikaneene weera ehemphwe. Mwaha wa yeeyo, Yesu aaheera: ‘Munvekeleke Yehova weera aarume atthu, weera evare muteko woohepha.’ Muhoolo mwaya, Yesu aahaathanla atthareli 70. Owo aahaakawa eeli-eeli weera yalaleereke woohima sa Omwene wa Muluku oYudeya wootheene. Atthareli ale yannaaxuttiha atthu eri poothe. Awo yaatthika ehakalanleene, weera yamuleele moota muteko wenttaaya nnene, naari Diabo khaarowa owera waahiiha.

Yesu aamurowa otthikela wiirimu, menento owo aatthuna weera atthareli awe evireleleke olaleera. Owo aahaaruma: ‘Mulaleere woohima sa Muluku elapo yootheene, mwaaxuttiheke atthu masu a Muluku ni mwaapatiseke.’