Yesu aapaka miiriira sintxipale

Yehova aamurumiha Yesu elapo ya vathi weera uulume woohima sa Omwene wa Muluku. Owo-tho aahinvaha Yesu owera woopaka miiriira. Miiriira iyo soonihera etthu Yesu onrowaawe waapakela atthu akhala Mwene a Omwene wa Muluku. Yesu aamurowa omaliha eretta eri poothe. Mwaha wa yeeyo, atthu ootheene yaavoreiwa yannamwaasa ni owo annaalamiha ootheene. Yesu annaalamiha atthu oohoona, oohiiwa, atthu oorakala ni annoomola minepa soonanara. Akina yannalama otavaru ikuwo sa Yesu. Atthu yannamutthara Yesu mapuro ootheene. Owo khaatthuna ohiya waakhavihera atthu nnaamweera emaara ekina aatthuna okhala meekhaawe.

Ekwaha emoha, alopwana yaamukuxa mutthu oorakala mpaka empa Yesu aaraawe. Menento empa ele yaasariwa vantxipale mpaka alopwana ale ohiwera ovolowa. Nto, alopwana ale yaawela vasulu va empa, yaathorola ni yaamukuruxela mpaka Yesu aaraawevo. Yesu aamweerela mulopwana ole: ‘Ovinye ni weetteke.’ Mulopwana ole aavinya aneetta, ni atthu ootheene yaatikhiniheya.

Nihiku nikina, Yesu aarowa muttetthe mmoha, avinyaka, alopwana 10 yaarinono eretta ya makokho, yannamwiitthana. Etempu ene yeele, mutthu akhalano eretta ya makokho, khaattamana ni mutthu mukina. Mwaha wa yeeyo, awosa erakamenleene yaakhuwela yeeraka: ‘Yesu, munikhavihere!’ Yesu aahaaleela weera eroweke otemplu, yeettaka erowaka otemplu, yaalamihiwa. Emaara namakokho mmoha onnaawe weera oolamihiwa, owo aatthika weera amuxukurele Yesu ni Muluku.Wa anamakokho ale 10, mmoha paahi taatthinke weera axukurele.

Muthiyana mmoha aavoreiwa mpuwa mwa iyaakha 12, annatthuna olamihiwa. Owo aavolowa variyari va atthu, aakhala ottuli wa Yesu ni aatava ikuwo sa Yesu. Etempu ene yeele, owo aalama! Yesu aahoonelela eyo ni aakoha: “Taani okitanve?” Muthiyana ole annoova vantxipale, mwaha wooweera mutthu aarinono eretta ele khawaatthuneya owaattamela atthu akina, nnaamweera vareene hiiho, owo aahima weera taamutanve. Yesu aahimmaaliha muthiyana ole ni aamweerela: ‘Mwanaka, oroweke ni murettele.’

Mulopwana mmoha iitthaniwa Jairo, anvekela Yesu: ‘Murowe owaani! Mwanaka mmoha ene mwaamuthiyana onoovoreiwa.’ Mene, Yesu ahinaaye ophiya owannyawe Jairo, mwaaruusi ole aahookhwa. Vaavo Yesu aaphiñyaawe iwe, aawoona atthu yinlaka vamoha ni amusi awe. Nto Yesu aaheera: ‘Mmaale winla, owo anookona paahi.’ Nto Yesu aavara ntata na mwaaruusi ole ni aaheera: “Mwaaruusi, ovinye!” Emaara ene yeele, mwaaruusi ole aavinya, ni Yesu aaweerela asipapawe weera envahe yootxa. Nkuupuwelani moota asipapawe yaahakalanlaaya!