Yesu aahaathanla atthareli awe 12

Alaleerakaru eyaakha emoha ni emeya, Yesu aapaka etthu yootepa otthuneya. Owo aatthuneya waathanla atthu yaarowa olaleeraka nuuwo ni yaarowa okosoopaka miloko soopatxerera. Yesu annatthuna nikhavihero na Yehova weera apake eyo. Mwaha wa yeeyo, owo aarowa omwaako meekhaawe ni aavekela ohiyu wootheene. Oxeexelo, Yesu ahaathukumanya oohuseraawe ni ahaathanla atthareli awe 12. Nyuwo munnuupuwelela masina aakina a yawo? Awo yiitthaniwa: Pedru, Andreya, Yakobe, Yohani, Filipe, Bartolomewu, Tome, Matheyo, Yakobe mwaana a Alfewu, Tadewu, Simoni ni Yuda Iskarioti.

Asilopwana ale 12 yannapaka ikwaha vamoha ni Yesu. Exuttihiwakaru, atthareli ale yannarowa olaleera meekhaaya. Yehova aahaavaha owera woowoomola mademoniyu ni woolamiha iretta.

Wa Yesu, atthareli ale 12 yaari asinthamwene awe. Yesu annaroromela awo. Atthareli ale yannakhala vakhiviru ni Yesu mwa itempu sootthuneya, ntoko ahinaaye okhwa ni avinyererihiwakaru. Hiihaale ntoko Yesu, atthareli antxipale yaari oGalileya. Ni akina yaathela. Afarisi khiyaawoona okhala ootthuneya atthareli ale mwaha wooweera ootheene 12 khaavo aasomme exikola yoovuwa. Mene atthareli ale yaaxuttihinwe ni Yesu weera evareke muteko woolaleera.

Atthareli ale khaiyene yaari oomalela. Naari neere ikwaha sootheene khiyaapaka itthu sooreera. Awo yannuuluma ehuupuwelenle, yannathanla itthu soonanara ni yaari atthu oohipixa murima. Ikwaha ikina awo yannanyakulihana etthunaka woona taani aari ootthuneyaxa. Mene awo yaari ooreera murima ni yannamusivela Yehova. Yesu akhwiyeene, awo yaamurowa okhavihera opaka miloko sa ekristu.