Mwaha Yesu aapankaawe va mwaako

Nuumala waathanla atthareli awe 12, Yesu aahoona weera yaakhala atthu antxipale yanweherera owo. Antxipale yaawiiye mapuro oovirikana, ntoko oGalileya, oYudeya, oTiro, oSidoni ni waSiriya. Akina yanvoreiwa, akina yeettihiwa ni mademoniyu. Nto Yesu aahaalamiha ootheene. Avinyaka, owo aakilaathi ni aapatxera opaka mwaha yoowo olelo ori wootepa osuwanyeya, mwaha aapankaawe va mwaako. Wa mwaha ene yoowo, Yesu aahiiwanyeiha etthu nintthuneyaahu opaka weera nikhale nthamwene a Muluku. Owo aaxuttiha weera onnatthuneya okhala ni Yehova ni omusivela. Menento niheereke ninnamusivela Muluku neeraka nihaasivelaka atthu. Yesu aahima weera onnatthuneya opaka itthu sooreera wa atthu ootheene.

Yesu aahimme-tho weera: ‘Nyuwo khontthuneya waasivela asinthamwene anyuru paahi. Mene-tho onnatthuneya waasivela amwiitthani ahu ni waalevelela atthu. Wakhala weera ookhala mutthu oriipinwe murima ni nyuwo, murowe muulume nuuwo moowaakuveya, ni mwanvekele nlevelelo. Mwaapakeleke itthu akhwiinyu ntoko nyuwo muntthunaanyu opakeliwa.’

Yesu aahima-tho miruku woohima sa musurukhu. Owo enre: ‘Ti wootthuneya vantxipale okhala nthamwene a Yehova ohiya okhalano musurukhu muntxipale. Namwiiya pooti owiiyerani musurukhu anyu, menento khaavo anaawere owiiyerani onthamwene anyu ni Yehova. Muhixupeyeke ni etthu munrowaanyu otxa, owura naari owara. Nkawehani ipalame. Muluku onnavaha itthu sintthunaaya otxa. Okhala mutthu ooxupeya khommukhavihera mutthu okhalano ekumi yoowaatta. Muupuweleleke weera Yehova oosuwela etthu muntthunaanyu.’

Atthu ale khayaatonko omoona mutthu uulumaka ntoko Yesu. Asitokweene a ittiini, yaawo yaarowa waakhaviheraka atthu oxuttera woohima sa Muluku, awo khiyaaxuttiha iyo. Nto mwaha wa heeni Yesu aaxuttihaawe nnene? Mwaha wooweera Yehova aahimuleela Yesu etthu eeraawe axuttiheke.