Okhwa wa Yesu

Asitokweene aanamakeya yaamukuxa Yesu enamuroiha wa koverntore Pilatu. Emaara Pilatu aamukonhaawe Yesu etthu aapankaawe, anamakeya yaahima itthu sintxipale soowootha emootheraka Yesu. Ni yaamoothera weera owo aatthuna okhala mwene. Nto, Pilatu aamukoha Yesu waari weera owo aari mwene aYuda. Menento Yesu aamwakula owo eeraka: ‘Omwene aka kooneerela eparte elapo ela.’

Pilatu khaamonneno nthowa Yesu ni aamurumihela Herodi, kovernatore oGalileya. Herodi-tho, khamphwannyeno nthowa Yesu, aahoona weera khaiyene aari nakirime ni aaruma otthikiheriwa wa Pilatu. Nto, Pilatu aahiruma weera ataphuliwe Yesu. Menento, atthu khayaasivelinwe ni etthu ele ni yaapatxera okhuwela ehimaka weera Yesu wannatthuneya wiiviwa. Avinyaka, anakhotto yammana Yesu ni ikopo, yaamusenyera ni yammana vantxipale. Anakhotto ale yaanwariha miiwa mmuruni mwawe ni yaapatxera omutheya Yesu. Pilatu aaweerela-tho veeli atthu ale weera Yesu aari oohittheka. Mene atthu ale yaanyeserera weera Yesu akhomeliwe vamwirini. Nto, Pilatu aahaakhulela weera Yesu iiviwe.

Yesu aakuxiwa aroihiwaka nipuro nenno niitthaniwa oGolgota. Avinyaka, yaakhomela inaani sawe ni matataawe. Nto, Yesu aavekela: ‘Tiithi, mwaalevelele atthu ala khensuwela etthu empakaaya.’

Atthu ale yaavirelela otheya okhove ya Yesu yeeraka: ‘Weyo khaiyene mwaana a Muluku wiivenxe vamwirini. Wiivuluxe!’ Vakhiviru va Yesu aakhalavo mulopwana aakhomelinwe nakirime. Nakirime ole anvekela Yesu eeraka: ‘Tiithi mwavolowa moomweneni mwanyu, mukuupuwelele.’ Yesu aamulaihera nakirime ole eeraka: “Weyo onrowa okhala ni miyo oparayiisu.”

Mootutuxera, nihiku nne yaakhumelela epiphi ntoko ohiyu, ni yaavirelela okhala epiphi ele mpuwa mwa iwoora 3. Maria ameyawe Yesu, ni atthareli akina, yaattamenle vamwirini vale aakhomelinwawevo Yesu. Nto, Yesu anvekela Yohani weera amukosoopeke Maria ntoko ameyawe. Omamaliheroni waya Yesu enre: ‘Yookwanela.’ Nto Yesu aahuramela vathi ni aahookhwa. Emaara ene yele, yaakhumelela etetere etokweene. Ni otemplu, ekuwo yaakawanya wootteela ni woottelaxa, yaapereya variyari. Nakhotto mmoha aaheera: ‘Mweekhaikai, ole aari Mwaana a Muluku!’