Pedru aamukhootta Yesu

Emaara Yesu aalenlaawe atthareli awe weera: ‘Ootheene nyuwo munoorowa okihiya ohiyu ene yoola.’ Pedru aaheera: ‘Miyo hooye! Nnaamweera ootheene yoohiyakani, miyo nkinoohiyani.’ Mene Yesu aamweerela Pedru: ‘Muthupi ahinaaye wiipa, weyo onookikhootta ikwaha tthaaru weera khokisuwenle.’

Muhoolo mwaya, vaavo anakhotto yaamukunxaaya Yesu emuroihaka wa Kaifa, atthareli ootheene yaatthawa. Mene Pedru ni mutthareli mukina yannamutthara Yesu erakamenleene. Pedru aarowa owannyawe Kaifa ni aahaattamela nipuro wooriwa mooro. Emaara waara wa mooro waamwalenlaaya ekhove ya Pedru, kaporo mmoha muthiyana, aamusuwela owo, ni aaheera: ‘Miyo kohoosuwelani nyuwo! Nyuwo mweetta ni Yesu!’

Pedru aahaakhula: ‘Hooye! Nkinsuwela etthu munhimaanyu!’ Nto Pedru aarowa waattamela vamulako. Mene murumeyi mukina muthiyana aamoona ni aahaaleela atthu ootheene eeraka: ‘Mulopwana ola aari vamoha ni Yesu!’ Pedru aahaakhula: ‘Miyo nkimusuwenle naari vakhaani Yesu owo!’ Avinyaka, mulopwana mmoha aaheera: ‘Weyo mmoha a yaawo! Wuuluma waa onnoonihera weera weyo ta oGalileya, ntoko Yesu.’ Pedru aahaakhula: ‘Miyo nkimusuwenle owo!’

Emaara ene yeele, muthupi aahiipa. Yesu aarukunuwa ni anweha Pedru. Avinyaka, Pedru aahuupuwelela etthu Yesu aahimmaawe, ni owo aakhuma iwe ampatxera winla vantxipale.

Yeereyakaru ele, namakeya ni alopwana akina yaatthukumana weera emuthorihe Yesu owannyawe Kaifa. Awo yaatthuna omwiiva Yesu, menento weera epake eyo, awo waatthuneya ophwanya nthowa nooweera owo aapaka etthu yoonanara. Menento awo khiyaawenre, mwaha wooweera Yesu khintale opaka etthu yoonanara. Nto Kaifa aamukoha Yesu: ‘Nyuwo Mwaana a Muluku?’ Yesu aamwaakhula: ‘Aani.’ Kaifa aaheera: ‘Vano hiyo khontthuneya waasa mathowa makina. Owo onveeha Muluku!’ Atthu ootheene yaaheera: ‘Mulopwana owo onnaphwanela okhwa.’ Avinyaka, yammana Yesu ni omusenyera. Awo yaamukhuneela owiitho, ni yannammana yeeraka: ‘Mwaareene profeta, munleele taani oomanneni!’

Oxaakaru, Kaifa ni alopwana akina, yaathukumana ni yaamukoha: ‘Nyuwo Mwaana a Muluku?’ Yesu aahaakhula: ‘Nyuwo munhima weera ti yoomi.’ Nto alopwana ale yaaheera weera nthowa Yesu aaraaweno, mwaha wonveeha Muluku. Avinyaka, awo yaamukuxera owannyawe Ponciu Pilatu namalamulela oRoma. Eheeni yaakela weereya muhoolo? Nrowe noone.