Yesu aatthukiwa ni amwiittani awe

Yesu ni atthareli awe yaarowa omwaako wa Olivera. Waari ohiyu mweeri okhummeene. Ephiyakaru ejardim ya oJethesemani, Yesu aahaaleela atthareli awe weera ekhale oowehaweha. Owo aaxupeya vantxipale. Avinyaka, aahaarakamela vakhaani atthareli awe, aakokhora ni aavekela: ‘Tiithi, yeereye ni miyo etthu nyuwo pwiya muntthunaanyu.’ Nto, Yehova aarumiha nlaika nimoha weera namulipihe Yesu. Avinyaka, Yesu aatthika ni aahaaphwanya atthareli awe ekonaka. Yesu aaheera: ‘Nvinye! Ela khaiyene ewoora yookona. Amwiittani aka ennawa weera ekivare.’

Evinreene etempu vakhaani, Yuda aaphiya ojardim areene ni atthu antxipale ekunxeene ikatana ni miri. Okhala weera ikwaha sootheene Yesu annarowa ojardim iwe ni atthareli awe, Yuda aasuwela weera owo aari iwe. Yuda aahiiwanana ni anakhotto ale weera aamurowa owoonihera taani aari Yesu. Nto, Yuda aamwaattamela Yesu ni anvaha epeexu. Yesu aaheera: ‘Weyo Yuda onanvariha mwaana a Muluku ni epeexu?’

Avinyaka, Yesu aahaakoha atthu ale mutthu yaamwaasaaya. Awo yaahima weera yaamwaasa Yesu. Nto Yesu aahaaleela weera: ‘Ti miyo.’ Amwiittani ale yaatikhiniheya ni olipa murima wa Yesu ni yannatthika ni nttuli-nttuli ni yaamorela vathi. Avinyaka, Yesu aahaakoha veeli atthu ale taani yaamwaasaaya. Etthikelakaru weera yaamwaasa Yesu owo aaheera: ‘Miyo koohima weera ti miyo. Mwaahiye atthareli aka eroweke.’

Pedru oonakaru etthu yeereya, owo aakuxa ekatana ni aathikila naaru na mulopwana mmoha iitthaniwa Marko. Mene Yesu aatava naaru na Marko ni aalama. Avinyaka Yesu aaheera: ‘Pedru wiikaathi ekatanaa. Ole onvarihela muteko ekatana onrowa wiiviwa ni ekatana.’ Anakhotto ale yaatthuka matata a Yesu, ni atthareli awe yaatthawa. Nto, Yesu aakelihiwa wa namakeya mutokweene Anas. Anas ampakela makoho mantxipale Yesu, ni aamurumiha wa namakeya Kaifa. Ankha woohima sa atthareli awe? Etthu heeni yeereñye naawo?