Yootxa yoomalihera ya Yesu

Iyaakha sootheene Ayuda yannamutthapela mpaasika nihiku na 14 mweri wa Nisani. Awo yannapaka eyo weera yuupuwelele moota Yehova aakuminhaawe ana Israeli wExipitu. Eyaakha ya 33 Kristu awiiyeene, Yesu ni atthareli awe yaamutthapela mpaasika. Emalihakaru otxa, Yesu aaweerela atthareli awe: ‘Mmoha a nyuwo onookivariha.’ Atthareli ale yaahituthuwa ni yaamukoha Yesu weera taani eera apake eyo. Nto, Yesu aawaakhula: ‘Mulopwana yoole kineeraaka kinvahe epaawu.’ Nto, Yesu aameya epaawu anvahaka Yuda Iskarioti. Avinyaka Yuda aahivinya ni anakhumavo.

Yuda avinyakaruvo, Yesu aapaka nivekelo, ni aakawanya epaawu ni aahaavaha atthareli awe nave-tho aaweerela: ‘Emaara muntxaanyu epaawu ela, muupuweleleka erutthu aka, yeeyo kinrowaaka ovaha wa nyuwo’. Avinyaka, Yesu-tho aapaka nivekelo nikina. Nto, aakuxa ekoopho ni aahaavaha atthareli awe, ni aaweerela: ‘Mwaawuraka eviinyu ela, muupuweleleke ephome aka, yeeyo kinrowaaka ovaha weera Yehova ooleveleleni soottheka sanyu. Miyo kinnolaiherani weera munoorowa okhala mamwene ni miyo wiirimu. Mpakeke yootxa ela yoothanleya iyaakha sootheene weera mukuupuweleleke miyo.’

Mpaka olelo, atthareli a Yesu annathukumana iyaakha sootheene weera yuupuwelele etthu Yesu opankaawe. Muthukumano owo, oniitthaniwa wuupuwelela okhwa wa Yesu.

Emalakaru yootxa ele, atthareli yaapatxera onyakulihana etthunaka omoona taani aari ootepa otthuneya. Nto Yesu aaweerela: ‘Mutthu ootthuneyaxa ti yoole ohiniisoona okhala ootepa otthuneya waapwaha atthu akina.’ Yesu aaweerela-tho: ‘Nyuwo mwa asinthamwene aka, miyo kinnooleelani etthu eri poothe yeeyo Atiithi aka antthunaaya weera miyo kooleeleni. Mwa etempu vakhaani, miyo-tho kinoorowa wiirimu weera kakhale ni Atiithi aka ni nyuwosa munrowa ohala elapo ela ya vathi. Weera atthu ootheene esuwele weera nyuwo mwa atthareli aka, musivelaneke mukina ni mukhwaawe ntoko miyo koosivenlaakani.’

Amalihakaru wuuluma, Yesu aapaka nivekelo nikina. Owo anvekela Yehova weera aakosoopeke atthareli awe ni aakhavihereke ovara muteko vamoha moowiiraana. Yesu aavekela-tho weera atthu ootheene esuwele nsina na Yehova. Nto, Yesu ni atthareli awe yaamwiipela itxipo Yehova ni yaakhuma.Ni yannaattamela ewora weera Yesu avariwe.