Yesu aahaatxiha atthu antxipale

Ekwaha emoha, arummwa yaaheetta ekwaha erowaka olaleera ni yaattinke ekhulumunweene vantxipale. Nto Yesu aalakela waakuxa awo aaroihaka esidade ya oBetisaida weera yiitthuuwe vakhaani. Awo yaawela mpaarkuni enneetta erowaka iwo. Muxerexere mwa ephareya, Yesu aawoona atthu antxipale. Yaari atthu antxipale yaamutthara Yesu. Owo aatthuna okhala meekhaawe vamoha ni atthareli awe, mene naamweera vareene hiiho, owo aahaakosoopa nnene atthu ootheene. Owo annaalamiha aretta ni nihiku nootheene annaaxuttiha atthu ale Omwene wa Muluku. Wiilakaru, atthareli yaarowa wuuluma ni Yesu yeeraka: ‘Atthu ala, aavoliwa etala. Onnaareerela weera epwaheke yaaseke yootxa.’

Menento Yesu aaweerela atthareli awe: ‘Atthu ala khontthuneya orowa. Mwaavahe nyeenyu yootxa weera etxe.’ Atthareli ale yaamukoha: ‘Pwiya, nyuwo muntthuna weera nathume yootxa weera naavahe atthu ala?’ Filipe mmoha a atthareli ale, aaheera: ‘Nnaamweera hiyo naarinono musurukhu, khawaarowa ophiyera weera nathume yootxa emphiyera atthu ootheene ala.’

Yesu aahaakoha atthareli ale: ‘Murinono eheeni?’ Andreya aaheera: ‘Nihanleno ipaahu 5 ni ihopa piili paahi. Iyo khasinrowa ophiyera.’ Yesu aaheera: ‘Nwiihe va ipaawu iyo ni ihopa.’ Ni aaruma weera atthu ale ekilaathi ikhurupu sene 50 ni akina 100. Yesu aakuxa ipaawu ni ihopa iye, ni aaweha wiirimu avekelaka. Avinyaka, owo aawinnya yootxa ele atthareli awe ni awo yaapatxera waakawela atthu. Alopwana 5.000 yaari vale, nihaakontariki athiyana ni anamwane, yaatxa mpaka ovona. Atthareli ale yaattottela yootxa yaahanle weera ehinanare. Mittanka soophiyeraka 12 saasareya yootxa! Mwiiriira ola wa Yesu waari wootepa otikhiniha, munoonela hayi?

Atthu yaatikhiniheya vantxipale mpaka otthuna weera Yesu aari mwene aya. Menento Yesu aasuwela weera Yehova khaatthuna weera owo akhale mwene mwa etempu ene yeele. Nto, owo aaweerela atthu ale weera eroweke ni aaweerela atthareli awe weera elapuwele ephareya ya oGalileya. Atthareli ale yaawela mpaarkuni, ni Yesu aarowa omwaako meekhaawe. Mwaha wa heeni? Mwaha wooweera owo aatthuna onvekela Yehova. Nnaamweera aari oowaatteliwa, ikwaha sootheene Yesu anniihiyera etempu weera avekele.