Yesu aaheetta vasulu va maahi

Ohiya paahi olamiha iretta ni waavinyereriha alipa ookhwa, Yesu-tho annawera omaaliha epula ni epheyo. Emaara aawenlaawe omwaako weera avekele, Yesu aaweha ephareya ya oGalileya ni aahoona weera epheyo yaapatxera woopa. Mwa yeeyo, owo aawoona atthareli awe ereene mpaarkuni emweettihaka ni ikuru mwaha wa epheyo. Yesu aakhuruwa omwako ni aapatxera weetta vasulu va maahi mpaka omphwanya paarku. Atthareli ale emoonakaru mutthu eettaka vasulu va maahi, yaahoova vantxipale. Menento Yesu aaweerela ha: ‘Muhoove! Ti miyo.’

Pedru aaheera: ‘Pwiya, mwaareene nyeenyu, mukileele miyo weera kiwe mpaka vaavo nyuwo muraanyuvo.’ Yesu aamweerela: ‘Oweeke.’ Nto, variyari va epheyo, Pedru aakhuma mpaarkuni ni aapatxera weetta vasulu va maahi. Mene, vaavo aamwaattamelaawe Yesu, Pedru aaweha mukhwipi ni aahoona epheyo ni aahoova vantxipale. Avinyaka, owo aapatxera oneela! Pedru aakhuwela: ‘Pwiya, mukivuluxe!’ Yesu aavara ntata na Pedru ni aamweerela: ‘Mwaha wa heeni weyo onoovaawe? Nroromelo naa nri woowiini?’

Emaara Pedru ni Yesu yaawenlaaya mpaarkuni, epheyo yaamaala. Munnuupuwela moota atthareli ale yiisoonenlaaya? Awo yenre: “Mweekhaikhai, nyuwo Mwaana a Muluku.”

Ela khaiyene yaari ekwaha emoha paahi Yesu aawenraawe omaaliha epheyo. Nihiku nimoha, Yesu ni atthareli awe yaari mpaarkuni, ni owo aapatxera okona. Ariki okona hiihaale, yaapatxera epheyo ya ikuru. Mutekuteku wannammana paarku mpaka owo osareya maahi. Atthareli ale yaahinvenxa Yesu ekhuwelaka: ‘Pwiya, hiyo nnookhwa! Munikhavihere!’ Yesu aavinya ni aaheerela ephareya ele: “Omaale!” Moowaakuveya, epheyo yaamaala. Yesu aahaakoha atthareli awe: ‘Nyuwo khamwaanoono nroromelo?’ Awosa yanneerelana: ‘Mpaka epheyo ni ephareya ennamwiiwelela owo.’ Mwa yeeyo, atthareli ale yaaxuttera weera, yaamuroromenle Yesu, khawaatthuneya woova etthu eri poothe.