Yesu aahaakhumelela atthareli awe

Evirakaru etempu, Pedru aarowa ototha ihopa ephareya ya oGalileya. Tome, Yakobe, Yohani ni atthareli akina, yaarowa nuuwo. Awo yaaviriha ohiyu wootheene etothelaka, mene khayaaphwannye naari ehopa emoha.

Oxeexelo, awo yaamoona mulopwana mmoha eemenleene ophareya. Owo annakhuwela vantxipale, ni aahaakohasa: ‘Nyuwo moovara ihopa vakhaaneene’? Awo yaamwaakhula: “Hooye!” Avinyaka, owo aaweerela: “Nvonyere ntthavi moono woolopwana wa paarku.” Atthareli ale yaapaka eyo, ni emaara yaavinxaaya ntthavi nne, naasareya ihopa. Saari ihopa sintxipale mpaka awo ohiwera okumiha mmaahini weera ehele mpaarkuni. Emaara ene yeele, Yohani aahoonelela weera mulopwana ole aari Yesu, ni aaheera: “Ta Apwiya!” Moowaakuveya, Pedru aakhuma mpaarkuni aahiivonyera mmaahini ni aarapela mpaka ophiya aaraawewo Yesu. Atthareli akina yannamutthara Pedru ereene mpaarkuni.

Atthareli ale ephiyakaru okhopela iwe, yaahoona ipaawu ni ihopa sooxiwaka. Yesu aaweerela atthareli ale weera ekuxe ihopa ikina weera yooxe. Ni Yesu aaheera: ‘Nweeke mutxeeke.’

Avinyaka, Yesu aamukoha Pedru: ‘Pedru, weyo onnakisivela opwaha muteko onvaraawe?’ Pedru aahaakhula: ‘Aani! Pwiya, nyuwo moosuwela eyo.’ Yesu aamweerela: ‘Mutxiheke iputtiputthi saka.’ Yesu aamukoha-tho: ‘Pedru, munnakisivela?’ Pedru aahaakhula: ‘Pwiya, nyuwo moosuwela weera miyo kinnoosivelani.’ Yesu aamweerela: “Mutxiheke iputtiputthi saka.” Vaavo Yesu aamukonhaawe ekwaha yanaararu, Pedru aaxupeya ni aaheera: ‘Apwiya, nyuwo moosuwela itthu sootheene, nyuwo moosuwela weera miyo, kinnoosivelani.’ Yesu aamweerela: “Mutxiheke iputtiputthi saka.” Avinyaka, Yesu aamweerela-tho Pedru: “Nvirelele okitthara.”