Yesu aatthikela wiirimu

Yesu aarowa okumana ni atthareli awe oGalileya. Iwe, owo aahaavaha atthareli awe muteko wootepa otthuneya. Owo aaheera: ‘Murowe ni mwaakhavihereke atthu a mapuro ootheene okhala atthareli aka. Mwaaxuttiheke itthu sootheene kooxuttinhaakani ni mwaapatiseke atthu awo.’ Owo oolaihera weera: ‘Ikwaha sootheene kinrowa okhala ni nyuwo.’

Mpuwa mwa mahiku 40, Yesu aahaakhumelela atthareli awe antxipale oGalileya ni oYerusalemu. Owo aahaaxuttiha atthareli awe itthu sootthuneya nave-tho Yesu aaweerela atthareli awe: ‘Muhikhumewo oYerusalemu. Nvireleleke oweherera etthu Muluku olaihenraawe.’

Atthareli ale khayiiwexenxe nnene etthu Yesu aatthunaawe ohima ni etthu ele. Avinyaka, Yesu aahikumana veeli ni atthareli awe ekwaha yoomalihera omwaako oliveira. Awo yaamukoha: ‘Pwiya munrowa okhala mwene a wIsraeli?’ Mene Yesu aahaaleela: ‘Wa Yehova, nlelo khephiyenre etempu weera miyo kikhale mwene. Moohipisa, nyuwo munimwaakhela munepa wootteela ni munoorowa okhala anamoonaaka. Mulaleereke oYerusalemu, oYudeya, oSamariya ni mpaka mapuro ootepa orakamela a elapo.’

Nto, Yesu aapatxera owela arowaka wiirimu. Avinyaka, nihutte nimoha naamukhuneela owo ni atthareli ale khiyaawera-tho omoona veeli.

Atthareli ale yaakhumawo omwaako oliveira ni yaarowa oYerusalemu. Ikwaha sootheene awo yannathukumana ni ovekela, ewehereraka weera Yesu ahime etthu awo yeeraaya epakeke.