Atthareli yaahaakhela munepa wootteela

Evirakaru mahiku 10 Yesu atthikenleene wiirimu, atthareli awe yaahaakhela munepa wootteela. Eyaakha ya 33 Kristu awiiyeene, atthu antxipale yaarowa oYerusalemu weera yatxe efeesta yiitthaniwa Pentekoste. Nihiku na Pentekoste, atthareli 120 a Yesu yaathukumana empa emoha. Mootutuxera, yaakhumelela etthu yootikhiniha! Onyakula wa epheyo ya ikuru waasareya mpaani mootheene. Avinyaka, yaakhumelela malumi amooro vamuru va mutthareli ori poothe, ni ootheene awo yaapatxera wuuluma muulumo oovirikana.

Atthu yaaxekura yaari oYerusalemu yaahiiwa onyakula wa epheyo ni yaathukumana weera yuulume woohima sa etthu eyo. Awo yaatikhiniheya yiiwakaru nuulumo naya atthareli ale yuulumaaya ni yaaheera: ‘Atthu ala ta oGalileya, moota heeni awo enweraaya wuuluma nuulumo nahu?’

Nto, Pedru ni atthareli akina yaarowa mpaka yaaraayavo atthu. Pedru aahaaleela atthu ale moota Yesu aakhwiiyaawe ni moota Yehova anvinyererinhaawe Yesu. Pedru-tho aaheera: ‘Vano, Yesu ori wiirimu vakhiviru va Muluku ni ti yoowo onnivaha munepa wootteela yoowo aanilaihenraawe. Mwaha ene ti yeeyo munoonaanyu miiriira iya seereyaka.’

Etthu Pedru uulummaawe yaahaatikhiniha atthu antxipale. Awo yaamukoha owo etthu yaatthuneyaaya opaka. Pedru aahiwaakhula: ‘Muttharuwe itthu soonanara mwaapakaanyu ni mpatisiwe mwa nsina na Yesu, nave nyuwo-tho munimwaakhela munepa wootteela.’ Nihiku nene nenne, atthu 3.000 yaapatisiwa. Waatta wa atthareli oYerusalemu wannaatxeerereya. Ekhaviheriwaka ni munepa wootteela, nummero na miloko nannaatta, ni atthareli ale yaawera waaxuttiha atthu antxipale itthu sootheene Yehova aarummaawe.