Awo yaalaleya moolipa murima

Mulopwana mmoha oorakala aakilaathi otemplu vamulako avekaka musurukhu. Nihiku nimoha, Pedru ni Yohani yaarowa otemplu ni mulopwana ole aahaaveka musurukhu. Nto, Pedru aamwerela: ‘Miyo kinimoovaha etthu yootepa otthuneya opwaha musurukhu. Mwa nsina na Yesu, ovinye ni weetteke!’ Nto, mulopwana ole aapatxera weetta! Atthu antxipale yonne etthu ele yaatikhiniheya ni yaakhala atthareli a Yesu.

Menento anamakeya ni asaduki yaanyoonyiwa vantxipale ni yaahaaroiha otripunaale. Iwe yaamukoha Pedru ni Yohani, weera taani aavanhe oweera iwe woomulamiha mulopwana ole. Pedru aahaakhula eeraka: ‘Ti Yesu kristu onivanhe, mulopwana yoole mmwiivalaanyu.’ Nto, anamakeya ni asaduki yaaweerela: ‘Muhitthikele wuuluma woohima sa Yesu.’ Menento Pedru ni Yohani yaaheera: ‘Khaninrowa omaala. Hiyo ninnatthuneya wuuluma woohima sa Yesu!’

Emaara yaataphulinwaaya, Pedru ni Yohani yaarowa waaleela atthareli akina etthu yeereñye. Ootheene yaavekela ni yanvekela nikhavihero Yehova. Nto, Yehova aahaavaha munepa wootteela atthareli ale, ni awo yaavirelela olaleya moolipa murima ni yannaalamiha atthu. Nummeru na atthareli nanvira nriki waatxeerereya. Menento asaduki khayaasivelinwe ni etthu ele. Nto, awo yaahaawalela arumeyi ale. Nto, ohiyu ole, nlaika na Yehova naahula milako sa okateya, ni naaweerela: ‘Mutthikele otemplu ni mwavireleleke oxuttiha.’

Nihiku naattharelana, asaduki yaasuwela weera arumeyi ale yaakhumawo okateya ni yaamulaleya mutemplu. Ekwaha yanaaveeli, arumeyi ale yaawaleliwa ni yaakuxiwa eroihiwaka otripunaale. Mutokweene aanamakeya aaweerela: ‘Hiyo nohookhoottiherani nyuwosa wuuluma woohima sa Yesu!’ Mene Pedru aawaakhula eeraka: ‘Hiyo nimmwiiwelela Muluku ahu ori namalamulela, ohiya atthu.’

Asilopwana ale ootripunaale yaanyoonyiwa vantxipale mpaka otthuna owiiva arummwa ale. Mene nfarisi mmoha iitthaniwa Gamaliyeli aaheera: ‘Mwiikosoope pooti weera Muluku ori naasilopwana ala. Nyuwosa khamuntthuneya okhala amwiittani a Muluku.’ Asilopwana ale ootripunaale yaahaakhulela ni yaahaahiya arummwa ale erowaka. Mene ehinaaye waahiya, yaahaamana ni yaahaaleela weera ehitthikele olaleya. Nnaamweera vaari hiiho arummwa ale yaari oolipa murima. Mahiku ootheene, mutemplu, empa ni empa, awo yannalaleya mitthenka sooreera.